សាលាដំបូងបើកសវនាការ អសាធារណៈលើសំណុំរឿងនេត ខៃ លួចថតនារីងូតទឹកមន្តស្រាត
ដោយ ៖ អប្សរា
ថ្ងៃអាទិត្យ ទី៥ ខែកញ្ញា ឆ្នាំ២០១០ ម៉ោង ០៩:២៧
រាជធានីភ្នំពេញ ៖ កាលពីល្ងាចថ្ងៃទី២ ខែកញ្ញា សាលាដំបូងរាជធានីភ្នំពេញ បានបើកសវនាការលើសំណុំរឿងព្រហ្មទណ្ឌមួយករណីដែលមានជនជាប់ចោទឈ្មោះនេត ខៃ ដែលបានបោកបញ្ឆោតឱ្យនារីប្រមាណជាង៦០០នាក់ ងូតទឹកមន្តស្រាតក្នុងបន្ទប់រួចលួចថត ខណៈជននេះស្ថិតក្នុងភេទជាបព្វជិត ។ សវនាការនេះមានលោកស្រីគឹម ដានី ជាប្រធានក្រុមប្រឹក្សាចៅក្រម និងលោកប្លង់ សុផល ជាព្រះរាជអាជ្ញារងតំណាងអយ្យការ ព្រមទាំងជនជាប់ចោទឈ្មោះនេត ខៃ ប៉ុន្តែសវនាការនេះធ្វើឡើងជាអសាធារណៈ ពោលគឺមិនអនុញ្ញាតឱ្យអ្នកសារព័ត៌មាន ឬមហាជនបានចូលស្តាប់ក្នុងសវនាការនោះឡើយ ។ សវនាការបានប្រព្រឹត្តទៅក្នុងរយៈពេលខ្លីបំផុត ដោយសារល្ងាចណាស់ទៅហើយ និងមិនត្រូវបានប្រកាសសាលក្រមអ្វីនោះឡើយ ។ បន្ទាប់ពីសវនាការត្រូវបានបញ្ចប់យ៉ាងស្ងៀមស្ងាត់នោះ ជនជាប់សង្ស័យឈ្មោះនេត ខៃ ត្រូវបានអនុរក្សពន្ធនាគារព្រៃសដឹកយកទៅឃុំខ្លួនវិញ ។
លោកស្រីនូ ណាវី មេធាវីរបស់ជនរងគ្រោះបានថ្លែងថា កូនក្តីរបស់លោកស្រីទាមទារប្រាក់២ម៉ឺនដុល្លារជាសំណងពីនេត ខៃ ។ លោកស្រីបានថ្លែងថា ជាមួយការទាមទារសំណង ក៏មានការស្នើឱ្យដាក់ទោសធ្ងន់ ទៅលើជននេះដែរ ។ លោកជា ហៃ មេធាវីចុងចោទបានថ្លែងថា កូនក្តីរបស់លោកបានសារភាពថា ខ្លួនបានលួចថតវីដេអូស្ត្រីទាំងនោះមែន ប៉ុន្តែគាត់បានបដិសេធថា ខ្លួនមិនបានចែកចាយរូបថតនោះទេ ។ លោកបានទាមទារឱ្យមានការរួមបញ្ចូលការចោទប្រកាន់ទាំងអស់ប្រឆាំងនឹងកូនក្តីរបស់លោក ហើយដោះស្រាយក្នុងរឿងក្តីតែមួយ ។ លោកស្រីចៅក្រមដានី បានថ្លែងថា អតីតសង្ឃរូបនេះត្រូវបានកាត់ទោសក្រោមមាត្រានៃច្បាប់ប្រឆាំងការជួញដូរមនុស្ស ។ ច្បាប់នេះកំណត់ទោសជាប់ពន្ធនាគាររយៈពេលរវាងពីមួយខែទៅមួយឆ្នាំ និងពិន័យជាប្រាក់រហូតដល់៤៧៥ដុល្លារ ។ លោកស្រីបានថ្លែងដោយមិនទាន់កំណត់កាលបរិច្ឆេទថ្មីថា យើងនឹងសំរេចសាលក្រមនៅពេលបន្ទាប់ ពីព្រោះពេលវេលាមិនគ្រប់គ្រាន់ដើម្បីពិចារណារឿងក្តីនេះ ។ នៅព្រឹកថ្ងៃ៣ កញ្ញា មិនអាចរកការបំភ្លឺបន្ថែមបានទេ ៕
