រាជធានីភ្នំពេញ ៖ បុរស២នាក់រងរបួសធ្ងន់គ្រាន់បើ ដោយសារជួបគ្រោះថ្នាក់ចរាចរណ៍រវាងរថយន្តឡង់គ្រីស្ស័រ ដែលបើកដោយមេធាវីជួង ជូងី បុកគ្នាជាមួយនឹងម៉ូតូវីវ៉ានៅចំណុចកែងផ្លូវលេខ១៧៨ និង១៩ ស្ថិតក្នុងសង្កាត់ជ័យជំនះ ខណ្ឌដូនពេញ កាលពីវេលាម៉ោង៩និង៤៥នាទីព្រឹកថ្ងៃទី២៧ សីហា ២០១២ ។
សាក្សីបាននិយាយថា នៅមុនពេលកើតហេតុមានរថយន្តមួយគ្រឿងម៉ាកឡង់គ្រីស្ស័រ បើកតាមផ្លូវលេខ១៩ ពីត្បូងទៅជើង លុះដល់កែងផ្លូវលេខ១៧៨ ស្ថិតក្នុងសង្កាត់ជ័យជំនះ ខណ្ឌដូនពេញ រថយន្តនោះបានបត់ស្តាំក្នុងគោលបំណងទៅមាត់ទន្លេ ស្របពេលនោះមានម៉ូតូវីវ៉ាមួយគ្រឿងជិះគ្នាពីរនាក់បើកលើកំណាត់ផ្លូវលេខ១៧៨ ឆ្ពោះទៅទិសខាងលិចដល់កែងផ្លូវលេខ១៩ បានបត់ឆ្វេងក៏បុកគ្នាជាមួយរថយន្តឡង់គ្រីស្ស័រ បណ្តាលឱ្យម៉ូតូនៅពីក្រោមរថយន្តផ្នែកខាងមុខ ចំណែកអ្នកជិះម៉ូតូខ្ទាតចេញពីម៉ូតូរងរបួសខ្នងដោយសារកោស នឹងថ្នល់ ពោលគឺអ្នកទាំង២រងរបួសធ្ងន់គ្រាន់បើ ។
នគរបាលមូលដ្ឋានបាននិយាយថា រថយន្តឡង់គ្រីស្ស័របើកដោយលោកជួង ជូងី មេធាវីការពារក្តីគណបក្សសមរង្ស៊ី ដោយឡែកភាគីអ្នកបើកម៉ូតូមិនស្គាល់អត្តសញ្ញាណទេ ។ កាលដែលបង្កឱ្យមានគ្រោះថ្នាក់ចរាចរណ៍នេះបណ្តាលមកពីភាគីខាងម៉ូតូបើកចូលចំណែកផ្លូវខាងរថយន្ត ក៏ប៉ុន្តែភាគីទាំង២មិនបានប្រកែកគ្នាយកត្រូវនោះទេ គឺលោកមេធាវីបាននាំភាគីខាងម៉ូតូដែលរងរបួសខ្នងទៅកាន់មន្ទីរពេទ្យកាល់ម៉ែត ដោយមិនរំខានដល់នគរបាលចរាចរឡើយ ៕
ចែករំលែកព័តមាននេះ