ខេត្តកណ្តាល ៖ យុវជនទំនើង២នាក់ត្រូវបានកម្លាំងប៉ូលិសស្រុកអង្គស្នួល សហការជាមួយកម្លាំងប៉ូលិសប៉ុស្តិ៍ដំណាក់អំពិល និងប៉ុស្តិ៍លំហាចចាប់ឃាត់ខ្លួន បន្ទាប់ពីពួកគេជិះម៉ូតូបំពាក់ស៊ីរ៉ែនមួយគ្រឿងឌុបគ្នា រួចបើកសំឡេងស៊ីរ៉ែនលាន់ឮកងរំពងបង្កការភ្ញាក់ផ្អើលតាមដងផ្លូវពេលយប់ ។
ហេតុការណ៍នេះបានកើតឡើងកាលពីវេលាម៉ោង៩និង១៥នាទីយប់ថ្ងៃទី២៦ សីហា ២០១២ នៅលើកំណាត់ផ្លូវជាតិលេខ៤១ ស្ថិតក្នុងភូមិទូករទេះ ឃុំលំហាច ស្រុកអង្គស្នួល។ ជនទំនើងទាំង២នាក់នោះម្នាក់ឈ្មោះប៊ី វណ្ណៈ អាយុ២៣ឆ្នាំ មានទីលំនៅភូមិតាំងឫស្សី ឃុំធម្មតាអរ ស្រុកសំរោងទង ខេត្តកំពង់ស្ពឺ និងម្នាក់ទៀតឈ្មោះអឿន វុទ្ធី អាយុ១៨ឆ្នាំ មានទីលំនៅភូមិក្រាំងស្វាយ ឃុំធម្មតាអរ ស្រុកសំរោងទង ពួកគេជិះម៉ូតូ១គ្រឿងម៉ាកឌ្រីមសេ១២៥ ស៊េរី២០០៥ ពណ៌ខ្មៅ ឡើងស៊េរី២០១២ ដែលម៉ូតូនេះមានបំពាក់ស៊ីរ៉ែនផងដែរ ។
សមត្ថកិច្ចបានឱ្យដឹងថា នៅមុនពេលកើតហេតុយុវជនទំនើងទាំង២នាក់នោះបានជិះម៉ូតូ១គ្រឿងខាងលើឌុបគ្នាធ្វើដំណើរតាមផ្លូវជាតិលេខ៤ ពីកើតទៅលិចក្នុងល្បឿនលឿន លុះពេលទៅដល់ត្រង់មុខផ្សារបែកចាន ស្ថិតក្នុងភូមិបែកចាន ឃុំបែកចាន ពួកគេបានបើកស៊ីរ៉ែនធ្វើឱ្យមានសំឡេងលាន់កងរំពងដូចជាស៊ីរ៉ែនក្បួនរថយន្តថ្នាក់ដឹកនាំដែលបង្កឱ្យមានការភ្ញាក់ផ្អើល និងខូចសណ្តាប់ធ្នាប់នៅពេលយប់ ឃើញដូច្នេះប៉ូលិសក៏ចេញបង្ក្រាបចាប់ឃាត់ខ្លួនតែម្តង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ