ច្បាប់ថ្មីប្រឆាំងលោកស្រីស៊ូជី និងគណបក្សលោកស្រី
ដោយ ៖ អប្សរា
ថ្ងៃសៅរ៏ ទី១៣ ខែមិនា ឆ្នាំ២០១០ ម៉ោង ១៥:០៨
របបយោធាដែលកាន់អំណាចនៅភូមា បានចេញផ្សាយកាលពីថ្ងៃទី១១ មីនា នូវច្បាប់ថ្មីៗដែលពុំគ្រាន់តែហាមឃាត់មេដឹកនាំប្រឆាំងលោកស្រីអ៊ួង សាន់ស៊ូជី មិនឱ្យចូលរួមបោះឆ្នោតដែលគ្រោងធ្វើក្នុងឆ្នាំនេះប៉ុណ្ណោះទេក៏ប៉ុន្ដែក៏លុបចោលជាផ្លូវការដែរនូវសុពលភាពនៃជ័យជំនះរបស់គណបក្សសម្ព័ន្ធភាពជាតិដើម្បីលទ្ធិប្រជាធិបតេយ្យ ឡណឌ ក្នុងការបោះឆ្នោតកាលពីឆ្នាំ១៩៩០ ទៀតផង ។លោកស្រីស៊ូជី បានបរិហារចំពោះច្បាប់ថ្មី ទាំងនេះក៏ប៉ុន្ដែអំពាវនាវដល់ប្រជាជន និងកំលាំងប្រជាធិបតេយ្យឱ្យធ្វើសកម្មភាពដោយឯកច្ឆ័ន្ទប្រឆាំងច្បាប់ទាំងនះដែលអយុត្ដិធម៌ ។ នេះជាការអះអាងរបស់លោក នីយ៉ានវីន អ្នកនាំពាក្យរបស់គណបក្ស ឡណឌ ដែលបានចូលជួបលោកស្រីស៊ូជី ក្នុងផ្ទះលោក ស្រីនៅទីក្រុងរ៉ង់ហ្គូនជាកន្លែងដែលលោកស្រីជាប់ឃុំឃាំងក្នុងនោះរហូតដល់ខែវិច្ឆិកាខាងមុខនេះ ។
ពួកយោធាកាន់អំណាចនៅពុំទាន់កំណត់ កាលបរិច្ឆេទច្បាស់លាស់សំរាប់ការបោះឆ្នោត សភានេះនៅឡើយក៏ប៉ុន្ដែបានចេញច្បាប់ ជាច្រើនបង្កឧបសគ្គសំរាប់ពួកប្រឆាំង ហើយជាពិសេសសំរាប់មេដឹកនាំពួកគេ ។ មានច្បាប់៥ ក្នុងនោះច្បាប់៤បានចេញផ្សាយជាសាធារណៈ ហើយចូលជាធរមានចាប់តាំងពី ថ្ងៃទី៨ មីនា មក ។ កាលពីថ្ងៃទី១១ មីនា មានចេញផ្សាយច្បាប់ដែលលុបចោលសុពល ភាពលទ្ធផលនៃការបោះឆ្នោតសភាឆ្នាំ ១៩៩០ ដែលពួកប្រឆាំងទាមទារឱ្យទទួលស្គាល់ ហើយហាមអ្នកដែលទទួលការកាត់ទោសជាប់គុកមិនឱ្យចូលរួមបោះឆ្នោត ដូច ជាលោកស្រីស៊ូជីជាដើម ។ របបយោធាក៏ប្រកាសម្យ៉ាងទៀត ពីការបង្កើតគណៈកម្មាធិការបោះឆ្នោតមួយដែលនឹងដឹកនាំដោយអតីតនាយទាហានជាន់ខ្ពស់មួយរូប ។
