រាជធានីភ្នំពេញ ៖ អង្គភាពប្រឆាំងអំពើពុករលួយ និងក្រុមមេធាវីសំរិទ្ធ កាលពីថ្ងៃទី២០ សីហា ២០១២ បានចុះ MOU ជាមួយគ្នាក្នុងគោលបំណងពង្រឹងបន្ថែមទៀតនូវកិច្ចសហប្រតិបត្តិការដែលអង្គភាពទាំងពីរបានធ្វើ និងទទួលលទ្ធផលនាពេលកន្លងមក ។ ពិធីចុះ MOU នាពេលនោះមានការអញ្ជើញចូលរួមពីលោកឱម យិនទៀង ទេសរដ្ឋមន្ត្រី និងជាប្រធានអង្គភាពប្រឆាំងអំពើពុករលួយ និងតំណាងក្រុមមេធាវីសំរិទ្ធ ។
លោកឱម យិនទៀង បានមានប្រសាសន៍ថា គោលបំណងនៃការចុះ MOU រវាងអង្គភាពប្រឆាំងអំពើពុករលួយ និងក្រុមមេធាវីសំរិទ្ធ នាពេលនេះគឺដើម្បីពង្រឹងកិច្ចសហប្រតិបត្តិការដែលអង្គភាពទាំងពីរបានរួបរួមគ្នាអនុវត្តន៍ និងទទួលបានជោគជ័យនាពេលកន្លងមក ។ លោកបញ្ជាក់ថា គោលដៅនៃកិច្ចសហប្រតិបត្តិការនោះ គឺមានពីរ ទី១-ជួយគ្នាក្នុងការបណ្តុះបណ្តាល និងទី២-រួមគ្នាដើម្បីរៀបចំការប្រជុំលើការអនុវត្តច្បាប់ និងការពន្យល់លើមាត្រានីមួយៗនៃច្បាប់សម្រាប់ទុកឱ្យស្ថាប័នទាំងអស់បំពេញការងារស៊ើបអង្កេត និងការងារពាក់ព័ន្ធដទៃទៀតមានភាពងាយស្រួល ។
ទាក់ទិននឹងការដោះលែងឱ្យនៅក្រៅឃុំបណ្តោះអាសន្នមន្ត្រីក្រសួងដែនដីនគរូបនីយកម្ម និងសំណង់៤នាក់ កាលពីពេលថ្មីៗនេះលោកឱម យិនទៀង បានពន្យល់ថា កន្លងមកអង្គភាពប្រឆាំងអំពើពុករលួយបានធ្វើការស៊ើបអង្កេតនៅលើភាពមិនប្រក្រតីរបស់មន្ត្រីនៅក្រសួងដែនដីនគរូបនីយកម្ម និងសំណង់ដោយមានការសហការយ៉ាងល្អជាមួយលោកទេសរដ្ឋមន្ត្រី អឹុម ឈុនលឹម រដ្ឋមន្ត្រីក្រសួងដែនដីនគរូបនីយកម្ម និងសំណង់ ។ បន្ទាប់មកយើងប្រមូលបានភស្តុតាង ដែលពាក់ព័ន្ធនឹងបញ្ហាការកេងប្រវ័ញ្ចដោយខុសច្បាប់ ហើយបញ្ជូនសំណុំរឿងទៅតុលាការដើម្បីចាត់វិធានការតាមផ្លូវច្បាប់ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ