ជ្រើសតាំងបេសកជនពិសេសថ្មីសម្រាប់ស៊ីរី
បញ្ចូលអត្ថបទ ៖ ស្រីណា កោះ
ថ្ងៃអាទិត្យ ទី១៩ ខែសីហា ឆ្នាំ២០១២ ម៉ោង ១៦:០០
គេហទំព័របរទេស
លោកឡាក់ដា ប្រាហ៊ីមី
អគ្គលេខាធិការអ.ស.ប លោកបានគីមូន និងអគ្គលេខាធិការសម្ព័ន្ធអារ៉ាប់លោកណាប៊ីល អែល អារ៉ាប៊ី ប្រកាសកាលពីថ្ងៃទី១៧ សីហា កន្លងមកនេះ ពីការតែងតាំងអ្នកការទូតអាល់ហ្សេរីលោកឡាក់ដាប្រា ហ៊ីមី ជាតំណាងពិសេសរួមថ្មីសម្រាប់ស៊ីរី ។ ក្នុងសេចក្តីប្រកាសព័ត៌មានមួយអ្នកនាំពាក្យរបស់លោកបានគីមូនថ្លែងថា អំពើហិង្សា និងការឈឺចាប់នៅស៊ីរី ត្រូវតែបញ្ឈប់ ។
អគ្គលេខាធិការអ.ស.បដឹងគុណ ដែលលោកប្រាហ៊ីម៉ី ព្រមទទួលយកតំណែងនេះ ដើម្បីប្រើទេពកោសល្យ និងបណ្តាបទពិសោធន៍ដ៏ច្រើនរបស់លោក ដើម្បីបំពេញភារកិច្ចដ៏ចម្បងនេះ ដែលលោកនឹងត្រូវការនូវការជួយទ្រទ្រង់យ៉ាងច្បាស់ និងខ្លាំងក្លាពីសហគមន៍អន្តរជាតិ។ អ្នកនាំពាក្យរូបនេះថ្លែងថា ដំណោះស្រាយដោយសន្តិវិធីតាមមធ្យោបាយការទូតនៃជម្លោះនៅស៊ីរី នៅតែជាអាទិភាពរបស់អ.ស.ប ។
ការបង្កើនការប្រយុទ្ធ និងការបង្កើនយោធាភាវូបនីយកម្មនៃជម្លោះវានឹងកាន់តែបង្កើនការឈឺចាប់ និងធ្វើឱ្យមានការលំបាកកាន់តែខ្លាំង ដល់ដំណោះស្រាយដោយសន្តិវិធីចំពោះជម្លោះដែលនឹងអាចដើរទៅរកមាគ៌ានៃការឆ្លងកាត់មួយដែលគោរពបំណងប្រាថ្នាស្របច្បាប់របស់ប្រជាជនស៊ីរីអ្នកនាំពាក្យអះអាងទៀតថា លោកបានគីមូន បានថ្លែងអំណរគុណ និងសម្តែងការដឹងគុណចំពោះអតីតអគ្គលេខាធិការអ.ស.ប លោកកូហ្វ៊ី អាណាន់ចំពោះការខិតខំប្រឹងប្រែង និងការរួមចំណែករបស់លោក ដើម្បីជំរុញសន្តិភាពនៅស៊ីរី ៕
