រាជធានីភ្នំពេញ ៖ កាលពីរសៀលថ្ងៃទី៣០ កក្កដា ក្រុមប្រហុកខ្មែរ បានជូនលោក ណុប បាយ៉ារិទ្ធ តារាចម្រៀងប្រចាំផលិតកម្មរស្មីហង្សមាស ក៏ដូចជាសមាជិក Retth FC និងមិត្តភក្តិ ព្រមទាំងក្រុមរាំប្រចាំខ្លួន Winner Boys ហើយក៏មានការចូលរួមពីអ្នកសារព័ត៌មានម្នាក់របស់វិទ្យុ ABC 107.5 FM គឺលោក បញ្ញា រួមគ្នាធ្វើដំណើរទៅជួបស្ត្រីមេម៉ាយក្រីក្រចំនួន២គ្រួសារ មានកូនប្រុសស្រីសរុបចំនួន១០នាក់ គ្មានផ្ទះសម្បែង សព្វថ្ងៃស្នាក់នៅជាប់របងភោជនីយដ្ឋាន«ម្ហូបខ្មែរ» ។
បន្ទាប់មកក៏បានបន្តដំណើរទៅជួបក្មេងប្រុស នៅ ចិត្រា ដែលកើតជំងឺទឹកនោមប្រៃ រស់នៅក្នុងឃុំភូមិធំ ស្រុកកៀនស្វាយ ខេត្តកណ្តាល និងក្មេងកំព្រា៣២នាក់នៅអង្គការកុមារម្លប់ឆត្រ ស្ថិតនៅផ្ទះលេខ១៨៤៧ ផ្លូវលំ ភូមិជ្រោយអំពិល សង្កាត់ក្បាលកោះ ខណ្ឌមានជ័យ រាជធានីភ្នំពេញ (ច្រកចូលនៅក្រោយវត្តជ្រោយអំពិល) ។
ក្នុងឱកាសនោះក៏មានការចែកអំណោយមួយចំនួនរួមមាន ៖ ១-ស្ត្រីមេម៉ាយក្រីក្រ២គ្រួសារក្នុងមួយគ្រួសារៗទទួលបានអង្ករផ្កាខ្ញី២៥គីឡូក្រាម មីយើងចំនួន១កេសធំមាន៥០កញ្ចប់ ទឹកត្រី៣ដប ទឹកស៊ីអ៊ីវ៣ដប សាប៊ូបោកខោអាវ១គីឡូក្រាម ស្ករស១គីឡូក្រាម សាប៊ូលុច្ស២ដុំ ធូបមូស៣ប្រអប់ និងថវិកាចំនួន១០០ដុល្លារ។ ២-កុមារា នៅ ចិត្រា ដែលកើតជំងឺទឹកនោមប្រៃ ឧបត្ថម្ភមីយើងចំនួន២កេសធំ និង១កេសតូច ត្រីខ២យួរ ស្ករស២គីឡូក្រាម សាប៊ូបោកខោអាវ១ថង់ធំ ស្មើនឹង២គីឡូក្រាម និងថវិកាចំនួន១០០ដុល្លារ។ ៣-ក្មេងកំព្រា៣២នាក់នៅអង្គការកុមារម្លប់ឆត្រ ឧបត្ថម្ភអង្ករផ្កាខ្ញី៤បាវស្មើនឹង២០០គីឡូក្រាម មីយើង៦កេសធំ ស្ករស៦គីឡូក្រាម ទឹកត្រី២យួរ ទឹកស៊ីអ៊ីវ២យួរ ប្រេងឆា២ដបធំ ត្រីខ៤យួរ សាប៊ូបោកខោអាវ២ថង់ធំ សាប៊ូលុច្ស៨ដុំ សម្ភារសិក្សា សៀវភៅ១២០ទំព័រចំនួន១៥០ក្បាល ប៊ិច១៥០ដើម ខ្មៅដៃ១៥០ដើម បន្ទាត់១៥០ នំ២កេសធំ ស្ករគ្រាប់ Milkkita មួយចំនួន សរុបថវិកាអស់ចំនួន៣០០ដុល្លារ ។ ៤-ក្រុមប្រហុកខ្មែរ ក៏បានពាំនាំយកអំណោយមួយចំនួនជូនដល់ក្មេងៗកំព្រាទាំង៣២នាក់ មានដូចជា ទឹកក្រូច Coca ចំនួន២យួរ (ស្មើនឹង៣៦ដប) នំ និងស្ករគ្រាប់មួយចំនួន ។ នារសៀលថ្ងៃនោះដែរ លោក ណុប បាយ៉ារិទ្ធ ក៏បានជូនថវិកាចំនួន៤០០ដុល្លារអាមេរិក មកឱ្យក្រុមប្រហុកខ្មែរទុកប្រើប្រាស់ដើម្បីជួយដល់ជនខ្វះខាតដទៃទៀត តាមគោលដៅរបស់ក្រុមប្រហុកខ្មែរ ក្នុងការងារមនុស្សធម៌នៅលើកក្រោយៗទៀត ។
សូមបញ្ជាក់ថា កាលពីថ្ងៃទី៧ កក្កដា ឆ្នាំ២០១២ កន្លងមកនេះ ក្រុមប្រហុកខ្មែរ បានធ្វើទំនាក់ទំនងលោក ណុប បាយ៉ារិទ្ធ ដើម្បីស្នើសុំស្វែងរកជំនួយឧបត្ថម្ភដល់អង្គការម្លប់ឆត្រ ដែលកំពុងចិញ្ចឹមក្មេងកំព្រាចំនួន៣២នាក់ ។ បន្ទាប់មក លោក ណុប បាយ៉ារិទ្ធ ក៏បានទទួលតាមសំណើ និងបានចាប់ផ្តើមធ្វើការអំពាវនាវជាបន្តបន្ទាប់ផងដែរ ។ ក្រោយមក រូបលោកក៏បានទទួលអំណោយជាបន្តបន្ទាប់ពីបងៗ និងបណ្តាមិត្តភក្តិរបស់លោកទាំងក្នុង និងក្រៅប្រទេសមានដូចជា អូស្ត្រាលី ជប៉ុន កាណាដា បារាំង អាមេរិក និងមិត្តភក្តិក្នុងប្រទេស នៅរាជធានីភ្នំពេញ និងនៅប៉ោយប៉ែត រួមទាំងសមាជិក Reth FC និងមិត្តភក្តិរបស់គេ ព្រមទាំងក្រុមរាំប្រចាំខ្លួនរបស់លោក គឺក្រុម Winner Boys ដែលរហូតមកដល់ថ្ងៃទី៣០ កក្កដា ២០១២ ថវិកាដែលទទួលបានជាបន្តបន្ទាប់សរុបមានចំនួន១.០៦៧ដុល្លារ និង១៧១.០០០រៀល៕
ចែករំលែកព័តមាននេះ