រាជធានីភ្នំពេញ ៖ អតីតអ្នកចំរៀងដ៏ល្បីមួយរូបក្នុងទសវត្សឆ្នាំ៨០ នៃក្រុមតន្ត្រីសហជីពលោកអ៊ីន សុផារ៉ា កំពុងស្វះស្វែងរកការគាំទ្របញ្ចូលបទចំរៀងបណ្ដាំទួលស្លែងក្នុងបញ្ជីស្មារតីចងចាំពិភពលោករបស់អង្គការយូណេស្កូ។ទាក់ទិនរឿងនេះមន្ត្រីអង្គការយូណេស្កូឱ្យដឹងថា ក្រុមការងារនឹងពិនិត្យបទចំរៀងនេះ ហើយពិចារណាថាតើវាមានខ្លឹមសារអាចដាក់បញ្ចូលក្នុងស្មារតីចងចាំពិភពលោកដែរឬយ៉ាងណា? បទចំរៀងបណ្ដាំទួលស្លែងដែលចាក់ផ្សាយញឹកញាប់តាមវិទ្យុជាតិក្នុងអំឡុងទសវត្សឆ្នាំ៨០ហើយបានសុសសាយម្តងទៀតខណៈសាលាក្តីខ្មែរក្រហមបើកសវនាការកាត់ទោសកាំង ហ្កេចអ៊ាវ ហៅឌុចនេះ គឺជាស្នាដៃនិពន្ធនិងច្រៀងដោយលោកអ៊ីន សុផារ៉ា បច្ចុប្បន្នជានិពន្ធនាយកសារព័ត៌មានមួយ ។ ទោះបីជាបទចំរៀងនេះមានអាយុជិត៣០ឆ្នាំ ហើយហាក់ដូចជាកប់បាត់ក៏ដោយ គេតែងតែចាក់ផ្សាយជារៀងរាល់ឆ្នាំ នៅថ្ងៃទី២០ ខែឧសភា ទិវារំលឹកការឈឺចាប់នឹងរបបប៉ុលពត និងនៅទិវាជ័យជំនះ៧មករា។ បទចំរៀង«បណ្តាំទួលស្លែង»អ្នកនិពន្ធសរសេររំលឹកឡើងវិញពីទារុណកម្មដ៏សែនឈឺចាប់ក្នុងរបបប្រល័យពូជសាសន៍ប៉ុលពតនៃអ្នកទោសក្នុងមន្ទីរស-២១ ឬគុកទួលស្លែង។ លោកអ៊ីន សុផារ៉ា ឱ្យដឹងថា លោកបាននិពន្ធបទចំរៀងពាក់ព័ន្ធសម័យខ្មែរក្រហមរាប់រយបទ ប៉ុន្តែបទបណ្ដាំទួលស្លែងបានចាក់ដោតបេះដូងប្រជាជនខ្មែរគ្រប់រូប ហើយជាបទដែលធ្វើឱ្យលោកល្បីឈ្មោះ ។ លោករំឭកថា លោកនិពន្ធបទនេះឡើងក្រោយពេលបានទៅមើលគុកទួលស្លែងនាដើមឆ្នាំ១៩៨០ ដែលពេលនោះគុកទួលស្លែងនៅបន្សល់ទុកសាកសពស្អុយរលួយនៅឡើយ។ បទចំរៀងបណ្ដាំទួលស្លែងត្រូវបានកប់បាត់ជាច្រើនឆ្នាំមកហើយ តែត្រូវគេចាប់អារម្មណ៍ឡើងវិញស្របពេលតុលាការខ្មែរក្រហមត្រូវបានបង្កើតឡើង ហើយបើកសវនាការកាត់ទោសឌុច អតីតមេគុកទួលស្លែង ពីព្រោះបទនេះរំលឹកឡើងវិញពីការឈឺចាប់របស់អ្នកទោសនៅគុកទួលស្លែងក្នុងអំឡុងរបបវាលពិឃាត ៣ឆ្នាំ ៨ខែ និង២០ថ្ងៃ។ លោក អ៊ីន សុផារ៉ា បានសំដែងនូវការត្រេកអរយ៉ាងខ្លាំងនៅពេលអង្គការយូណេស្កូរៀបចំឱ្យច្រៀងបទបណ្ដាំទួលស្លែងក្នុងពិធីរំលឹកការចងចាំរបស់ពិភពលោកដើម្បីឱ្យក្មេងជំនាន់ក្រោយបានដឹង និងចងកំហឹងឈឺចាប់ចំពោះឧក្រិដ្ឋកម្មដ៏ព្រៃផ្សៃនៃរបបប៉ុលពត។ដូច្នេះហើយទើបលោកខិតខំស្វះស្វែងរកការគាំទ្រដើម្បីបញ្ចូលបទចំរៀងនេះក្នុងបញ្ជីស្មារតីចងចាំពិភពលោករបស់អង្គការយូណេស្កូ។ មន្ត្រីអង្គការយូណេស្កូឱ្យដឹងថា ក្រុមការងារកំពុងតែពិនិត្យនូវអត្ថន័យនៃបទនេះ ហើយពិចារណាថាតើវាមានគ្រប់លក្ខណៈដើម្បីបញ្ចូលក្នុងបញ្ជីស្មារតីចងចាំរបស់ពិភពលោកដែរឬអត់់? លោកអ៊ីន សុផារ៉ា រហូតមកដល់ពេលនេះបានផលិតស៊ីឌីនិងវីស៊ីឌីមួយចំនួន ហើយគ្រោងនឹងផលិតបន្តស៊ីឌីនិងវីស៊ីឌីបទចំរៀងរៀបរាប់ពីទុក្ខវេទនាក្នុងរបបខ្មែរក្រហម និងផ្សារភ្ជាប់សកម្មភាពថែរក្សាការពារប្រាសាទព្រះវិហារក្រោមការដឹកនាំដោយសម្ដេចអគ្គមហាសេនាបតីតេជោហ៊ុន សែន ប្រមុខនៃរាជរដ្ឋាភិបាលកម្ពុជា ៕
ចែករំលែកព័តមាននេះ