ពួកក្មេងៗនៅភូមិថ្មី មានជំនឿចងរូបទីងមោងនៅមុខផ្ទះដេញជំងឺរាតត្បាត EV-71
បញ្ចូលអត្ថបទ ៖ បុប្ផា កោះ
ថ្ងៃអាទិត្យ ទី២៩ ខែកក្កដា ឆ្នាំ២០១២ ម៉ោង ១៨:០៧
កោះសន្តិភាព
ទីងមោងដែលអ្នកភូមិធ្វើដើម្បីដេញជំងឺរាតត្បាត
ខេត្តបន្ទាយមានជ័យ ៖ ដោយសារល្បីរឿងជំងឺឈិក និងជំងឺ EV-71 បានផ្ទុះឡើងពួកក្មេងៗនៅភូមិថ្មី ឃុំភូមិថ្មី ស្រុកថ្មពួក ខេត្តបន្ទាយមានជ័យ បាននាំគ្នាធ្វើរូបទីងមោងចង នឹងរបងមុខផ្ទះការពារជំងឺថ្មីដែលកំពុងតែរាតត្បាតទៅលើកុមារ ។
បើយើងធ្វើដំណើរឆ្លងកាត់ឃុំភូមិថ្មី គឺមានភូមិ១ដែលមានចងរូបទីងមោងច្រើនជាងគេ ។ បើតាមការសាកសួរពីអ្នកយកព័ត៌មានកាលពីព្រឹកថ្ងៃទី២៨ កក្កដា ២០១២ មានអ៊ុំប្រុសម្នាក់បាននិយាយប្រាប់ថា ការចងរូបទីងមោងនេះ គឺពុំមែនជំនឿដែលទាក់ទងនឹងមនុស្សចាស់នោះទេ ប៉ុន្តែគឺពួកក្មេងប្រុស ក្មេងស្រីនៅក្នុងភូមិនាំគ្នាធ្វើ រួចហើយក៏យកមកចងនឹងរបងមុខផ្ទះ។ មូលហេតុដែលពួកគេនាំគ្នាធ្វើរបៀបនេះដោយសារល្បីពីរឿងកើតជំងឺថ្មីដូចជាជំងឺឈិក ពិសេសជាងនេះទៀតនោះគឺពួកគេភ័យ និងព្រួយបារម្ភពីជំងឺថ្មីមួយទៀតដែលកាចសាហាវនោះ គឺជំងឺ EV-71 ។ ដូច្នេះពួកគេធ្វើរូបទីងមោងនេះប្លែកៗពីគ្នា ដោយចងដបទឹកបរិសុទ្ធមានលាយលក្ខណ៍ពណ៌ឈាមខ្លះកាន់ដាវ ពាក់មួកសុវត្ថិភាព ខ្លះទៀតកាន់ធ្នូ និងខ្លះទៀតចងឆ្កាង ប៉ុន្តែភាគច្រើនគឺកាន់ដាវក្នុងបំណងដែលពួកគេធ្វើបែបនេះ កុំឱ្យជំងឺថ្មីទាំង២ប្រភេទនោះមកយាយីដល់សុខភាពរបស់ពួកគេប៉ុណ្ណោះ វាមិនមែនជារឿងចម្លែកនោះទេ៕
