បញ្ជាការដ្ឋានកងអង្គរក្សបើកវគ្គហ្វឹកហ្វឺនជំនាញរាវមីន និងដោះមីន
បញ្ចូលអត្ថបទ ៖ ស្រីណា កោះ
ថ្ងៃសៅរ៏ ទី២៨ ខែកក្កដា ឆ្នាំ២០១២ ម៉ោង ០៩:០០
កោះសន្តិភាព
ទិដ្ឋភាពក្នុងពិធីបើកវគ្គហ្វឹកហ្វឺនជំនាញរាវមីន និងដោះមីន
ខេត្តព្រះវិហារ ៖ នៅព្រឹកថ្ងៃទី២៥ កក្កដា លោកឧត្តមសេនីយ៍ឯក យង់ សារិទ្ធិ មេបញ្ជាការរងបញ្ជាការដ្ឋានកងអង្គរក្សប្រចាំជួរមុខ បានអញ្ជើញជាអធិបតីភាពក្នុងពិធីបើកវគ្គហ្វឹកហ្វឺនដល់នាយ នាយរង និងពលទាហាន លើជំនាញរាវមីននិងដោះមីន ។ ពិធីនេះប្រារព្ធធ្វើឡើងនៅក្នុងបញ្ជាការដ្ឋានកងអង្គរក្សប្រចាំជួរមុខដោយមានការអញ្ជើញចូលរួមពីលោក ស ថាវី តំណាងអាជ្ញាធរខេត្ត និងនាយទាហានមកពីអង្គភាពចំនួន១៨ ប្រចាំជួរមុខ ព្រមទាំងមានសិក្ខាកាមចូលរួមប្រមាណ១៥០នាក់ មកពីគ្រប់បណ្តាកងឯកភាព ។
ក្នុងពិធីនេះ ក៏មានការនិមន្តព្រះសង្ឃដែលគង់នៅក្នុងវត្តកែវគិរីស្វារៈធ្វើការប្រោះព្រំ ដល់នាយ នាយរង និងពលទាហានផងដែរ ។ ការបើកវគ្គហ្វឹកហ្វឺនជំនាញរាវមីន និងដោះមីន ដល់នាយ នាយរង និងពលទាហានប្រចាំជួរមុខ ក្នុងតំបន់ប្រាសាទព្រះវិហារនាពេលនេះមានរយៈពេលចំនួន៣១ថ្ងៃ ចាប់ពីថ្ងៃទី២៥ កក្កដា តទៅ និងមានចំនួន២១៧ម៉ោង ក្នុងនោះមានការសិក្សាឱ្យយល់ដឹងអំពី GPS ចំនួន៦ថ្ងៃ ស្មើនឹង៤២ម៉ោង តាមបច្ចេកវិទ្យាម៉ាស៊ីនរាវមីនថ្មីទំនើបជាផលិតផលរបស់ប្រទេសជប៉ុន ។ ជារៀងរាល់ឆ្នាំ ការហ្វឹកហ្វឺនបច្ចេកទេសយោធាប្រចាំជួរមុខ គឺតែងតែបានបើកវគ្គជាបន្តបន្ទាប់ ។
នៅក្នុងឱកាសនោះ លោក ស ថាវី អភិបាលរងខេត្ត បានមានមតិផ្តាំផ្តើដល់នាយ នាយរង និងពលទាហាន ជាសិក្ខាកាម ត្រូវខិតខំត្រងត្រាប់ស្តាប់គ្រូបង្វឹកឱ្យបានចេះស្ទាត់ ដើម្បីជាទុនសម្រាប់ការពារជាតិ និងប្រជាពលរដ្ឋ ។ លោកឧត្តមសេនីយ៍ឯក យង់ សារិទ្ធិ មេបញ្ជាការរង បញ្ជាការដ្ឋានកងអង្គរក្ស បានមានប្រសាសន៍ថា ការបើកវគ្គហ្វឹកហ្វឺននេះគឺជាកាតព្វកិច្ចយ៉ាងសំខាន់ សម្រាប់កងកម្លាំងទូទៅប្រចាំជួរមុខ ក្នុងការត្រៀមលក្ខណៈខ្ពស់ លើវិស័យការពារជាតិ ។ លោកឧត្តមសេនីយ៍ បញ្ជាក់ថា បើនិយាយអំពីសព្វាវុធ កាលពីទសវត្សមុនៗ មិនទាន់ទំនើបដូចពេលនេះទេ ដូច្នេះពេលនេះគឺសព្វាវុធទំនើបណាស់តាមសម័យកាល ។ យើងទាំងអស់គ្នាជាកងកម្លាំងបានឃើញនិងបានយល់ហើយថា បច្ចុប្បន្ន គ្រឿងសព្វាវុធ គឺទំនើបនិងមានប្រសិទ្ធភាពខ្ពស់ក្នុងការប្រើប្រាស់ ដូច្នេះពេលនេះ យើងជាកងកម្លាំងក៏ត្រូវមានធនធានមនុស្សក្នុងកងទ័ព ដើម្បីប្រើប្រាស់គ្រឿងសព្វាវុធទាំងនោះឱ្យមានប្រសិទ្ធភាពផងដែរ ។
លោកឧត្តមសេនីយ៍ យង់ សារិទ្ធិ បន្តថា ជាក់ស្តែងការបើកវគ្គហ្វឹកហ្វឹនជំនាញរាវ និងដោះមីន នាពេលនេះ គឺត្រូវឱ្យសិក្ខាកាមទាំងអស់យល់ដឹងអំពីម៉ាស៊ីនរាវរកគ្រាប់មីនប្រភេទថ្មី ទំនើបដែលជាផលិតផលរបស់ប្រទេសជប៉ុន ក្នុងទសវត្សនេះ ដើម្បីត្រៀមខ្លួនធ្វើការបោសសម្អាតគ្រាប់មីននៅតាមបណ្តោយព្រំដែន ពិសេសគឺតំបន់ទេសចរណ៍វប្បធម៌ប្រាសាទព្រះវិហារ ៕
