រាជធានីភ្នំពេញ ៖ មន្ត្រីរាជរដ្ឋាភិបាលកម្ពុជា បានអះអាងថា សហរដ្ឋអាមេរិកមិនអាចដាក់សម្ពាធណាមួយមកលើរាជរដ្ឋាភិបាលកម្ពុជា ដើម្បីឱ្យទណ្ឌិត សម រង្ស៊ី បានវិលចូលស្រុកបន្តធ្វើនយោបាយនោះទេ ព្រោះបញ្ហាមេបក្សប្រឆាំងរូបនេះ មិនមែនជាបញ្ហានយោបាយឡើយ ប៉ុន្តែជាការប្រព្រឹត្តខុសច្បាប់នៃព្រះរាជាណាចក្រកម្ពុជា ។
ថ្លែងប្រាប់អ្នកសារព័ត៌មានកាលពីព្រឹកថ្ងៃទី២៥ កក្កដា នៅទីស្តីការគណៈរដ្ឋមន្ត្រី លោក កែវ រ៉េមី រដ្ឋលេខាធិការ និងជាអនុប្រធានអង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រី បញ្ជាក់ថា សហរដ្ឋអាមេរិកនឹងមិនមានហេតុផលណាមួយដាក់សម្ពាធមកលើរាជរដ្ឋាភិបាលកម្ពុជា ទាក់ទិននឹងបញ្ហាលោក សម រង្ស៊ី ទេ ។ លោកបន្តថា កន្លងមកអង្គការឃ្លាំមើលសិទ្ធិមនុស្សអន្តរជាតិក៏ធ្លាប់បានចេញសេចក្តីថ្លែងការណ៍មួយទាមទារឱ្យលោកជំទាវ ហ៊ីលឡារី គ្លីនតុន រដ្ឋមន្ត្រីការបរទេសសហរដ្ឋអាមេរិក ដាក់សម្ពាធមកលើកម្ពុជាដែរ ។ ប៉ុន្តែពេលដែលលោកជំទាវរដ្ឋមន្ត្រីការបរទេសសហរដ្ឋអាមេរិករូបនោះមកកម្ពុជាកាលពីពេលថ្មីៗនេះ គឺគេអត់និយាយអំពីការដាក់សម្ពាធអ្វីទាំងអស់ ព្រោះគេបានយល់ច្បាស់ហើយថា បញ្ហាលោក សម រង្ស៊ី មិនមែនជាបញ្ហានយោបាយ ប៉ុន្តែជាបញ្ហាទាក់ទងនឹងការប្រព្រឹត្តខុសច្បាប់របស់បុគ្គល ។
លោក កែវ រ៉េមី បានលើកឡើងថា កម្ពុជាគឺជារដ្ឋឯករាជ្យមួយ និងមិនមែនជាប្រទេសដែលរណបប្រទេសណាមួយឡើយ ដូច្នេះវាមិនអាចទៅរួចទេ នៅពេលដែលគេនិយាយថា ប្រទេសណាមួយមកដាក់សម្ពាធលើប្រទេសឯករាជ្យណាមួយទៀត ។ ទន្ទឹមនោះ លោកសម្តែងនូវការសោកស្តាយផងដែរចំពោះអ្នកនយោបាយខ្លះដែលបានដក់ជាប់ផ្នត់គំនិតធ្វើជាអាយ៉ងបរទេស និងឱ្យតម្លៃទៅបរទេសខ្ពស់ជាងតម្លៃជាតិសាសន៍ខ្លួន ។
ការលើកឡើងរបស់លោក កែវ រ៉េមី គឺជាការឆ្លើយតបទៅនឹងគណបក្សប្រឆាំងដែលបាននិងកំពុងស្វះស្វែងរកអន្តរាគមន៍ពីសហរដ្ឋអាមេរិក ដើម្បីឱ្យលោក សម រង្ស៊ី បានវិលចូលស្រុកវិញ និងចូលរួមក្នុងនយោបាយសម្រាប់ការបោះឆ្នោតនាឆ្នាំ២០១៣ខាងមុខ។
ពាក់ព័ន្ធនឹងករណីលោក សម រង្ស៊ី នេះដែរ លោក កែវ រ៉េមី បញ្ជាក់ថា បញ្ហាលោក សម រង្ស៊ី គឺជាបញ្ហាបុគ្គលដែលប្រព្រឹត្តខុសច្បាប់ មិនមែនជារឿងនយោបាយ ហើយបរទេសសុទ្ធតែបានដឹងអំពីបញ្ហានេះ ។ លោកបន្ថែមថា លោក សម រង្ស៊ី បានប្រព្រឹត្តខុសលើករណីពីរ គឺការដកតម្រុយបង្គោលព្រំដែន និងការបង្ហោះផែនទីក្លែងក្លាយ ។ លោក កែវ រ៉េមី បានបង្ហាញនូវការសោកស្តាយផងដែរ ចំពោះការដែលលោក សម រង្ស៊ី បានបង្ហោះផែនទីក្លែងក្លាយ និងធ្វើឱ្យបាត់បង់ប្រាសាទព្រះវិហាររបស់ខ្មែរយើងចូលទៅថៃ។
ចំពោះការបង្រួបបង្រួមរវាងគណបក្សប្រឆាំងទាំងពីរ លោក កែវ រ៉េមី បានបញ្ចេញទស្សនៈថា ការបង្រួបបង្រួមគណបក្សប្រឆាំងទាំងពីរនោះ គឺជាសិទ្ធិសេរីភាពរបស់អ្នកនយោបាយ គ្មានអ្នកណាអាចរារាំងបានទេ ។ ប៉ុន្តែការបង្រួបបង្រួមនោះ គឺមិនបានធ្វើឱ្យគណបក្សប្រជាជនកម្ពុជាព្រួយបារម្ភឡើយ ព្រោះសំឡេងគាំទ្រពួកគេគឺនៅតែចំនួនដដែលគ្មានការប្រែប្រួល ឬកើនឡើងទេ ។
ទាក់ទងនឹងការចោទប្រកាន់របស់គណបក្សប្រឆាំងដែលថា ការបោះឆ្នោតឆ្នាំ២០១៣ នឹងមិនដំណើរការដោយសេរី និងយុត្តិធម៌ ដោយសារតែលោក សម រង្ស៊ី មិនអាចមកចូលរួមក្នុងការបោះឆ្នោតបាននោះត្រូវបានលោក កែវ រ៉េមី ច្រានចោលដោយអះអាងថា ការបោះឆ្នោតនាឆ្នាំ២០១៣ខាងមុខនេះ នឹងដំណើរការជាធម្មតា ដោយមានលក្ខណៈសេរី យុត្តិធម៌ ។ គណបក្ស ឬក៏បុគ្គលណាក៏អាចមានសិទ្ធិចូលរួមប្រកួតប្រជែងក្នុងការធ្វើនយោបាយបានដែរ ប៉ុន្តែត្រូវចុះបញ្ជីនៅក្រសួងមហាផ្ទៃ ខណៈពេលដែលបុគ្គលអ្នកនយោបាយមិនពាក់ព័ន្ធនឹងការជាប់ចោទ ដូចមានចែងក្នុងច្បាប់ ។ លោកបានចាត់ទុកការលើកឡើងរបស់គណបក្សប្រឆាំងទាំងពីរដែលទាមទារឱ្យមានការកែទម្រង់គណៈកម្មាធិការជាតិរៀបចំការបោះឆ្នោតថាជាលេសនយោបាយរបស់គណបក្សប្រឆាំងតែប៉ុណ្ណោះ ហើយការរួបរួមគ្នាជាចលនាសង្គ្រោះជាតិស្អីគេនោះមិនអាចធ្វើឱ្យគណបក្សប្រជាជនកម្ពុជាបារម្ភឡើយ ៕
ចែករំលែកព័តមាននេះ