អាមេរិកៈ សេចក្តីត្រូវការប្រេងធ្លាក់ចុះមកពីសេដ្ឋកិច្ចខ្សោយ
បញ្ចូលអត្ថបទ ៖ ស្រីណា កោះ
ថ្ងៃអង្គារ ទី២៤ ខែកក្កដា ឆ្នាំ២០១២ ម៉ោង ០៩:៥៨
គេហទំព័របរទេស
អាមេរិកៈ សេចក្តីត្រូវការប្រេងធ្លាក់ចុះមកពីសេដ្ឋកិច្ចខ្សោយ
ក្រុមឧស្សាកម្មអាមេរិកធំមួយក្នុងរបាយការណ៍របស់ខ្លួនចេញផ្សាយកាលពីថ្ងៃទី២០ កក្កដាកន្លងមកនេះអះអាងថា សេចក្តីត្រូវការប្រេងជាសាកលរបស់សហរដ្ឋអាមេរិកមានការធ្លាក់ចុះជាថ្មីកាលពីខែមិថុនា ក្រោយឡើងបន្តិចកាលពីខែឧសភា ហើយមានតែមួយខែគត់ដែលមានខ្ពស់ក្នុងរយៈពេល៦ខែដំបូងនៃឆ្នាំ២០១២នេះ ។
វិទ្យាស្ថានប្រេងអាមេរិក API ក្នុងរបាយការណ៍ស្តីពីស្ថិតិប្រចាំខែរបស់ខ្លួននិយាយថា ការផ្គត់ផ្គង់ប្រេងសរុបដែលវាស់ពីទំហំនៃសេចក្តីត្រូវការបានចុះថយ៣% ក្នុងខែមិថុនា បើប្រៀបធៀបទៅនឹងដំណាក់កាលដូចគ្នានៃឆ្នាំទៅមិញ ។ ការផ្គត់ផ្គង់មាននិន្នាការចុះថយ ហើយរួមចំណែកដល់ការកាត់បន្ថយសេចក្តីត្រូវការប្រេងក្នុង៦ខែដំបូងនៃឆ្នាំនេះចំនួន២,៦% បើប្រៀបធៀបទៅនឹងដំណាក់កាលដូចគ្នានេះដែរ កាលពីឆ្នាំ២០១១ ។ ក្នុងខែមិថុនាការផ្គត់ផ្គង់ ប្រេងសាំងចុះថយមកនៅត្រឹម៨,៨២១លានធុងក្នុងមួយថ្ងៃគឺចុះថយ២,៥%។
លោកJOHN FELMY អ្នកទទួលខុសត្រូវខាងសេដ្ឋកិច្ចរបស់API និយាយថា ការចុះថយនៃសេដ្ឋកិច្ចធ្វើឱ្យសេចក្តីត្រូវការប្រេងចុះទាបដែរ ។ API តំណាងឱ្យក្រុមហ៊ុនប្រេងនិងឧស្ម័នធម្មជាតិ ដល់ទៅជាង៥០០ដែលផ្គត់ផ្គង់ថាមពលភាគច្រើនដល់សហរដ្ឋអាមេរិក ហើយដែលជួយទ្រទ្រង់ដល់សេដ្ឋកិច្ចអាមេរិក ៕
