ខេត្តបាត់ដំបង ៖ ក្រុមអ្នកតវ៉ាជាង១០០នាក់នៅតំបន់«អណ្ដូងកន្ទួត»ឃុំដូនបា ស្រុកគាស់ក្រឡ បានលើកគ្នាមកតវ៉ាជាថ្មីម្តងទៀត កាលពីវេលាម៉ោង១០ព្រឹកថ្ងៃទី២០ កក្កដា ដែលលើកនេះពួកគេបានមកដល់ខាងមុខសាលាដំបូងខេត្តតែម្ដង ដើម្បីទាមទារសុំឲ្យដោះលែងតំណាងពួកគេចំនួន៥នាក់ ក្នុងចំណោម៦នាក់ដែលតុលាការបានសម្រេចឃុំខ្លួនក្នុងពន្ធនាគារកាលពីល្ងាចថ្ងៃទី១៩ កក្កដា ក្រោមបទចោទថា «ឆបោកប្រាក់» ប្រជាពលរដ្ឋដែលពាក់ព័ន្ធនឹងការកាន់កាប់ដីធ្លីរបស់រដ្ឋដោយមិនស្របច្បាប់។
សូមបញ្ជាក់ថា ប្រជាពលរដ្ឋដែលលើកគ្នាមកតវ៉ានេះ បានមកម្ដងហើយ កាលពីព្រឹកថ្ងៃទី១៩ កក្កដា ក្នុងបំណងមករំដោះតំណាងពួកគេចំនួន៦នាក់ ដែលសមត្ថកិច្ចឃាត់ខ្លួនតាមអំណាចដីការបស់ព្រះរាជអាជ្ញា។ ប៉ុន្តែពួកគេត្រូវបានរារាំងដោយកម្លាំងសមត្ថកិច្ចស្រុកបាណន់ ក្នុងគ្រាដែលក្រុមនេះធ្វើដំណើរឆ្លងកាត់ស្រុកបាណន់។ នៅរសៀលថ្ងៃដដែលក្រុមអ្នកភូមិបានយល់ព្រមត្រឡប់ទៅភូមិឋានរបស់ពួកគេវិញ ក្រោយពីមន្រ្តីតុលាការ និងសមត្ថកិច្ចធ្វើការសម្របសម្រួលថា នឹងដោះស្រាយជូនពួកគេតាមនីតិវិធីច្បាប់ និងក្រោយពីសមត្ថកិច្ចអនុញ្ញាតឲ្យក្រុមគ្រួសារជួបជាមួយក្រុមជនសង្ស័យ។ ពិសេសពួកគេបានសម្រេចវិលត្រឡប់មកវិញភ្លាមៗ បន្ទាប់ពីមានបញ្ជាពីមេខ្លោងរបស់ពួកគេឈ្មោះឃឿន សារ៉េត ដែលពួកគេចាត់ទុកជា «អាទិទេព» និងគោរពកោតខ្លាចបំផុតនៅតំបន់ «អណ្តូងកន្ទួត» នោះ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ