ប្រជានេសាទលើកគ្នាមកតវ៉ាដល់សាលាខេត្តពីមន្ត្រីជលផលកាប់ព្រួល និងលប
ដោយ ៖ អប្សរា
ថ្ងៃពុធ ទី៨ ខែកញ្ញា ឆ្នាំ២០១០ ម៉ោង ១៥:៤៩
ប្ញទ្ធិសែន
ប្រជាពលរដ្ឋបាននាំគ្នាមកតវ៉ានៅមុខសាលាខេត្ត
ខេត្តកំពង់ឆ្នាំង ៖ ប្រជាពលរដ្ឋចំនួន២៥នាក់ តំណាងឱ្យ២៥គ្រួសារ ដែលមានទីលំនៅក្នុងភូមិសំរោង សង្កាត់ផ្សារឆ្នាំង ក្រុងកំពង់ឆ្នាំង នាព្រឹកថ្ងៃទី៨ កញ្ញា ដោយមានកាន់កំណាត់លប និងព្រួលផង បាននាំគ្នាមកតវ៉ានៅមុខសាលាខេត្ត ដើម្បីឱ្យអាជ្ញាធរខេត្តជួយដោះស្រាយពីករណីមន្ត្រីជលផលចុះកាប់ព្រួល និងលបរបស់ពួកគាត់កាលពីរសៀលថ្ងៃទី៧ កញ្ញា ។ បន្ទាប់ពីធ្វើការតវ៉ាអស់រយៈពេលប្រហែលជាង១ម៉ោងពួកគាត់ក៏ត្រឡប់ទៅលំនៅឋានវិញ ក្រោយពីមន្ត្រីសាលាក្រុងបានពន្យល់ឱ្យពួកគាត់ទៅផ្ទះ ហើយផ្ញើពាក្យប្តឹងតវ៉ាដោយផ្តិតមេដៃមិនមែនមកតវ៉ាដោយគ្មានឯកសារ និងដៃទទេ និងធ្វើឱ្យខូចសណ្តាប់ធ្នាប់ ។ ទោះបីជាយ៉ាងណា ក៏តវ៉ានេះត្រូវបានមន្ត្រីជលផលនិយាយថា នេះជាបទល្មើសនេសាទក្នុងរដូវហាមឃាត់ ។
ស្ត្រីឈ្មោះស៊ឹម អ៊ូ អាយុ៤២ឆ្នាំ ដែលស្ថិតក្នុងចំណោមអ្នកតវ៉ាទាំង២៥នាក់ បានយំរៀបរាប់ថា លបគាត់ដែលត្រូវបានមន្ត្រីជលផលកាប់បំផ្លាញមានចំនួន១៥ និងព្រួលប្រវែង៣៥ម៉ែត្រ ក៏ត្រូវកាប់បំផ្លាញដែរ ។ ចំណែកស្ត្រីមួយរូបទៀតឈ្មោះម៉ី សំអុន អាយុ៤២ឆ្នាំដែរ ក៏បានយំរៀបរាប់ថា លបគាត់ត្រូវកាប់បំផ្លាញអស់ចំនួន១០ រួមទាំងព្រួលប្រវែងប្រហែល៣០ម៉ែត្រផង ។ ពួកអ្នកតវ៉ាបាននិយាយថា ពួកគាត់បានចងការប្រាក់ធនាគារអម្រឹតក្នុងម្នាក់ៗចំនួន៩០ម៉ឺនរៀល ដើម្បីយកលុយទិញព្រួល និងធ្វើលបដាក់យកត្រី ដោយសងប្រាក់រំលាស់ ប៉ុន្តែពួកគាត់ទើបសងបាន១ខែក៏ត្រូវគេកាប់បំផ្លាញលបអស់ធ្វើឱ្យពួកគាត់គ្មានលទ្ធភាពរកលុយសងប្រាក់ធនាគារអម្រឹតបានទេ ។ ពួកគាត់បានលើកលប និងព្រួលដែលត្រូវកាប់ខ្ទេចដោយនិយាយថា លបគាត់តូចៗ និងព្រួលមានកំពស់ត្រឹម៦តឹកប៉ុណ្ណោះ ហើយម្នាក់ៗមានលបត្រឹមតែ១០ទៅ១៥ ឯព្រួលប្រហែល៣០ទៅ៤០ម៉ែត្រទេ តែមន្ត្រីជលផលមិនយោគយល់ពួកគាត់ធ្វើនេសាទនេះ គឺរយៈពេលត្រឹមពី២០ថ្ងៃទៅ១ខែផុតហើយពេលទឹកឡើ់ងធំ ។
លោកកែវ ថាយ នាយខណ្ឌរដ្ឋបាលជលផលដែលដឹកនាំការបង្ក្រាបបទល្មើសនេសាទមានរបាំងព្រួល និងលបនោះបាននិយាយឱ្យដឹងថា នេះជាបទល្មើសនេសាទក្នុងរដូវហាមឃាត់ ដោយពួកគាត់បានប្រើព្រួលតឿក្រឡាញឹកដាក់កាត់ការចរាចរណ៍ត្រីឡើងរកជម្រកពងកូនដែលខុសនឹងច្បាប់ជលផលហាមឃាត់ ។ លោកបញ្ជាក់ថា មួយម្ចាស់មានលបពី១០ទៅ១៥ និងដាក់ព្រួលកាក់ពី៣០ទៅ៤០ម៉ែត្រ ឯម្ចាស់ម្នាក់ទៀតមានប្រហាក់ប្រហែលគ្នា លុះពេលដាក់តគ្នាទៅវាឡើងប្រវែងរាប់ពាន់ម៉ែត្រ ។ នេះជាបទល្មើសធ្ងន់ធ្ងរបង្គួរដែរ ខណៈពេលដែលត្រីឡើងពងកូនក្នុងរដូវហាមឃាត់ ។ លោកកែវ ថាយ បញ្ជាក់ថា លទ្ធផលដែលបានបង្ក្រាបកាលពីរសៀលថ្ងៃទី៧ កញ្ញា នៅចំណុចព្រែកត្រពាំង រហូតដល់ចំណុចដើមត្នោត១ដើម ក្នុងភូមិសាស្ត្រភូមិសំរោង ភូមិកំពង់អូស ភូមិកណ្តាល និងភូមិស្រែព្រីង ទឹកដីក្រុងកំពង់ឆ្នាំង ដោយកាប់បំផ្លាញចោលនៅនឹងកន្លែងនូវរបាំងព្រួលប្រវែង១.០៥០ម៉ែត្រ ដែលមាន១៧កន្លែង លបចំនួន២១០ និងបង្គោល២៥០ដើម ។ ការបង្ក្រាបនោះមានការចូលរួមពីកំលាំងប៉ូលិស ប៉េអឹម និងមន្ត្រីសាលាក្រុងផងដែរ ។ ចំណែកមន្ត្រីជំនាញមានខណ្ឌ ផ្នែក និងសង្កាត់រដ្ឋបាលជលផល ៕
