រាជធានីភ្នំពេញ ៖ ជឹម សារ៉ាត់ មកពីសមាគមកីឡាប្រដាល់ក្រសួងមហាផ្ទៃ ត្រូវបានផ្គូផ្គងឱ្យជួបប្រកួតជាមួយធិន សុវណ្ណ មកពីក្លិបកងពលតូចលេខ៧០ នៅលើសង្វៀនស្ថានីយទូរទស្សន៍ប៉ុស្តិ៍លេខ៥ នាថ្ងៃអាទិត្យទី២២ កក្កដា សាជាថ្មីម្តងទៀត ខណៈសួង សុវណ្ណថា មកពីសមាគមកីឡាប្រដាល់ក្រសួងការពារជាតិ ណាត់ជួបប្រកួតជាមួយសូយ ភិរម្យ មកពីក្លឹបអូដឹមកីឡា ។
សារ៉ាត់ និងសុវណ្ណ ធ្លាប់បានប៉ះគ្នាច្រើនលើកច្រើនសារួចមកហើយក្នុងនោះភាគច្រើនគេតែងជួបសំណាងច្រើនជាង ។ សារ៉ាត់ មានដៃខ្លីជើងក៏ខ្លី ហើយចូលចិត្តប្រើកម្លាំងច្រើនជាងល្បិច រីឯចិត្តរបស់គេវិញ គឺសឿងខ្លាំងណាស់វាយត្រូវកាន់តែខ្លាំងកាន់តែដើរចូល ។ ចំណេកឯសុវណ្ណវិញ ល្បិចប្រយុទ្ធនៅលើសង្វៀនល្អជាងសារ៉ាត់ ប៉ុន្តែមានពេលខ្លះចង់យ៉ាប់ម្តងៗដែរនៅពេលគូប្រកួតវាយសម្រុកខ្លាំងពេក ។ សុវណ្ណមិនត្រឹមតែពូកែស្នៀតជើង និងស្នៀតកណ្តាប់ដៃប៉ុណ្ណោះទេ ឯស្នៀតកែង និងជង្គង់ក៏មិនអន់ប៉ុន្មានដែរ ប៉ុន្តែកម្លាំងរបស់គេមិនសូវជាខ្លាំងដូចសារា៉ាត់ឡើយ។ រាល់ពេលជួបគ្នាម្តងៗត្រូវសារ៉ាត់វាយសង្គ្រប់ឱ្យដកថយអែបខ្សែរេញរហូត ។
សួង សុវណ្ណថា និងសូយ ភិរម្យ វិញ មិនសូវដែលបានជួបគ្នានោះទេ ប៉ុន្តែល្បិចប្រយុទ្ធនៅលើសង្វៀនរវាងពួកគេទាំង២មិនអន់ជាងគ្នាប៉ុន្មានឡើយ ។ សុវណ្ណថា មានល្បិចប្រយុទ្ធនៅសង្វៀនខ្ពស់គ្រាន់បើទាំងវិធីសាស្ត្រវាយលុក និងការពារ គឺល្អដូចគ្នា រីឯចរិតរបស់គេវិញក៏មិនសូវចេះឆេវឆាវថែមទៀត ស្នៀតកែងរបស់គេពេលខ្លះបានធ្វើឱ្យគូប្រកួតញាក់សាច់មិនតិចនោះទេ ។ ទោះបីបែបណា លើកនេះមិនទាន់ដឹងថា យ៉ាងណានោះទេ នៅពេលមកប៉ះភិរម្យ ដែលជាជើងខ្លាំងនៅលើសង្វៀនម្នាក់ដែរនោះ ។ ភិរម្យ មានល្បិចប្រយុទ្ធនៅលើសង្វៀនមិនចាញ់ជើងចាស់ប៉ុន្មានឡើយ ប៉ុន្តែចិត្តរបស់គេរាងតូចបន្តិច ទោះបីចរិតរបស់គេពូកែអត់ធ្មត់ក្តី ។ គូនេះពិបាកធ្វើការវាយតម្លៃខ្លាំងណាស់ចាំមើលអ្នកណាគ្រាន់បើជាងអ្នកណា ។
ធា រិទ្ធី មកពីក្លិបអេភូថងកីឡា ជួបប្រកួតជាមួយចាន់ រតនៈ មកពីក្លិបកងពលធំអន្តរាគមន៍លេខ៣ព្រះវិហារ ។ ធី តុងហ៊ី មកពីក្លិបសាលវ័ន្តកីឡា ជួបប្រកួតជាមួយផល សុភាព មកពីក្លិបឃ្លាំងមឿងកីឡា និងប៊ី យីម មកពីក្លិបឥន្ទ្រីកីឡាជួបប្រកួតជាមួយខៀវ វណ្ណី មកពីមជ្ឈមណ្ឌលកីឡាកងយោធពលខេមរភូមិន្ទ ៕
ចែករំលែកព័តមាននេះ