លោកប៊ុន សុខ អញ្ជើញជាអធិបតីក្នុងពិធីប្រកាសបើកការប្រកួតកីឡាប្រដាល់ជ្រើសរើសជើងឯកទូទាំងប្រទេសប្រចាំឆ្នាំ2012
បញ្ចូលអត្ថបទ ៖ ស្រីណា កោះ
ថ្ងៃអង្គារ ទី១៧ ខែកក្កដា ឆ្នាំ២០១២ ម៉ោង ១៦:៤៩
កោះសន្តិភាព
លោក ប៊ុន សុខ រដ្ឋលេខាធិការក្រសួងអប់រំ យុវជន និងកីឡា ជាអធិបតីក្នុងពិធី
រាជធានីភ្នំពេញ ៖ ការប្រកួតកីឡាប្រដាល់ជ្រើសរើសជើងឯកទូទាំងប្រទេសប្រចាំឆ្នាំ ២០១២ សម្រាប់ថ្ងៃទី១៦ កក្កដា មានទាំងអស់៥៤គូ ក្នុងនោះប្រដាល់ក្បាច់បុរាណខ្មែរមាន៣២គូ ចែកចេញជាក្របខណ្ឌ ក-១ មាន២០គូ គឺទម្ងន់៤៥គីឡូក្រាម៤គូ, ៥៧គីឡូក្រាម៤គូ, ៦០គីឡូក្រាម៨គូ និង៦៧គីឡូក្រាម៤គូ និងក្របខណ្ឌក-២ មាន១២គូ គឺទម្ងន់៦០គីឡូក្រាម៨គូ និងទម្ងន់៦៧គីឡូក្រាម៤គូ ។ ចំណែកការប្រកួតប្រដាល់សាកលវិញមាន២២គូ ប្រកួតក្នុងក្របខណ្ឌ ក-១ ទាំងអស់ដែលមាន៥ប្រភេទទម្ងន់ គឺទម្ងន់៤៩គីឡូក្រាម២គូ, ទម្ងន់៥២គីឡូក្រាម៤គូ, ទម្ងន់៥៦គីឡូក្រាម៤គូ, ទម្ងន់៦០គីឡូក្រាម៨គូ និងទម្ងន់៧៥គីឡូក្រាម៤គូ។
លោកឧត្តមសេនីយ៍ តែម ម៉ឺន ប្រធានសហព័ន្ធកីឡាប្រដាល់កម្ពុជាបានឱ្យដឹងថា ការប្រកួតប្រដាល់ជ្រើសរើសជើងឯកទូទាំងប្រទេសប្រចាំឆ្នាំ២០១២នេះមានទាំងអស់៤៥១ប្រកួត ក្នុងនោះប្រដាល់ក្បាច់គុនបុរាណខ្មែរមានចំនួន២៦៨ប្រកួត និងប្រដាល់សាកលមានចំនួន១៨៣ប្រកួត ។លោកប៊ុន សុខ រដ្ឋលេខាធិការក្រសួងអប់រំ យុវជន និងកីឡា បានសំណូមពរឱ្យសហព័ន្ធកីឡាប្រដាល់កម្ពុជាត្រូវប្រមូលកីឡាករតាមរាជធានី-ខេត្ត, ក្រសួង-ស្ថាប័ន ធ្វើការប្រកួតជ្រើសរើសកីឡាករឆ្នើមមុននឹងចូលរួមប្រកួតថ្នាក់ជាតិ ហើយកីឡាករទាំងអស់ត្រូវបញ្ចេញទេពកោសល្យ និងគោរពបទបញ្ជាបច្ចេកទេសឱ្យបានល្អ ដើម្បីទទួលបានជ័យជម្នះ។
លោករដ្ឋលេខាធិការមានប្រសាសន៍បែបនេះក្នុងឱកាសលោកអញ្ជើញជាអធិបតីក្នុងការប្រកាសបើកជាផ្លូវការនូវការប្រកួតប្រដាល់ជ្រើសរើសជើងឯកទូទាំងប្រទេសប្រចាំឆ្នាំ២០១២ នៅសាលដំបូលទូក ស្ថិតក្នុងពហុកីឡដ្ឋានជាតិអូឡាំពិក កាលពីថ្ងៃទី១៥ កក្កដា ឆ្នាំ២០១២ ។ គួរបញ្ជាក់ថា ការប្រកួតកីឡាប្រដាល់ជ្រើសរើសជើងឯកទូទាំងប្រទេសប្រចាំឆ្នាំ២០១២ បានចាប់ផ្តើមដំណើរការប្រកួតជាផ្លូវការកាលពីថ្ងៃទី១១ កក្កដា និងបញ្ចប់នៅថ្ងៃទី២៤ កក្កដា ខាងមុខ ៕
