បង្ក្រាបហាងកាហ្វេបញ្ចាំងរឿងអាសអាភាស ម្ចាស់ហាងភ័យលោតពីលើផ្ទះបាក់ចង្កេះ
ដោយ ៖ អប្សរា
ថ្ងៃព្រហស្បត្ត៏ ទី៩ ខែកញ្ញា ឆ្នាំ២០១០ ម៉ោង ០៩:៤៨
ចាន់ថេត
ទីតាំងបញ្ចាំងរឿងអាសអាភាស
ខេត្តកំពង់ចាម ៖ ហាងកាហ្វេមួយកន្លែងដែលលួចបញ្ចាំងរឿងអាសអាភាស បានត្រូវកំលាំងនគរបាលការិយាល័យប្រឆាំងការជួញដូរមនុស្សនិងការពារអនីតិជន នៃស្នងការដ្ឋានខេត្តសហការជាមួយនគរបាលស្រុកចំការលើធ្វើការបង្រ្កាប កាលពីវេលាម៉ោង៦ព្រឹកថ្ងៃទី៦កញ្ញា ២០១០ទៅតាមដីកាឆែកឆេរលេខ១៣៤៦ របស់លោកជុំ សែនសទ្ធា ព្រះរាជអាជ្ញារងអមសាលាដំបូងខេត្ត ។ ក្នុងការបង្ក្រាបនេះសមត្ថកិច្ច បានឃាត់ខ្លួនអ្នកផឹកកាហ្វេចំនួន១៣នាក់ ចំណែកបុរសជាថៅកែហាងភ័យស្លន់ស្លោស្ទុះរត់ឡើងទៅជាន់ខាងលើ កំពស់៤ម៉ែត្រ រួចលោតចុះមកដីផុងដំបូលសង្កសីបាក់ចង្កេះ និងបាក់ដៃស្តាំ៣កំណាត់ ព្រមទាំងបាក់ឆ្អឹងផាល ហើយភ្លាមៗនោះត្រូវបានសាច់ញាតិនាំមកសង្រ្គោះជាបន្ទាន់នៅមន្ទីរពេទ្យខេត្តនិងនាំបន្តទៅសង្រ្គោះនៅប្រទេសវៀតណាមទៀត ។
លោកវរសេនីយ៏ត្រីថុល ម៉េង ប្រធានស្តីទីការិយាល័យប្រឆាំងការជួញដូរមនុស្សនិងការពារអនីតិជនបានឧ្យដឹងថា ក្រោមការណែនាំរបស់លោកឧត្តមសេនីយ៏ត្រី នួន សាមិន ស្នងការនគរបាលខេត្ត និងលោកវរសេនីយ៍ឯក ជឹម សេងហុង ស្នងការរងនគរបាលខេត្តទទួលផែនកណ្តាលយុត្តិធម៌ បានឱ្យកំលាំងមូលដ្ឋានចុះទៅឃ្លាំមើលហាងកាហ្វេមួយកន្លែងស្ថិតនៅភូមិថ្នល់បែកលិច ឃុំស្វាយទៀប ស្រុកចំការលើ ដែលលួចបញ្ចាំងវីដេអូអាសអាភាសនៅពេលព្រឹកៗ ។ បន្ទាប់ពីបានស៊ើបដឹងច្បាស់លាស់ថា ពិតជាមានលួចបញ្ចាំងរឿងអាសអាភាសមែនក៏បានសុំដីកាពីសាលាដំបូងខេត្ត ហើយរូបលោកបានដឹកនាំកំលាំងក្រោមឱវាទសហការជាមួយនគរបាលស្រុកចំការលើ ឡោមព័ទ្ធហាងកាហ្វេរបស់ឈ្មោះសាយ ចន្ថា ហៅម៉ាប់ ភេទប្រុស អាយុ៣៦ឆ្នាំ នាវេលាម៉ោង៦ព្រឹកថ្ងៃទី៦កញ្ញា ។
ក្នុងប្រតិបត្តិការនេះ សមត្ថកិច្ចបានឃាត់ខ្លួនអ្នកមកអង្គុយផឹកកាហ្វេបានចំនួន១៣នាក់ ដកហូតម៉ូតូ១៤គ្រឿង កង់៥គ្រឿង ទូរទស្សន៍៧គ្រឿង ក្នុងនោះប្រភេទLCDពីរគ្រឿង ម៉ាក ប៉ាណាសូនិក១គ្រឿង ម៉ាកJVCទំហំ២១អ៊ីញបី គ្រឿង និងទំហំ១៤អ៊ីញ១គ្រឿង ក្បាលវីស៊ីឌី ៣គ្រឿង វីស៊ីឌីចំនួន៨បន្ទះ អាំព្លី១គ្រឿង និងធុងបាស់៣ ។ សំភារដែលដកហូតត្រូវបាននាំមក កាន់អធិការដ្ឋាននគរបាលស្រុកចំការលើ ចំណែកអ្នកផឹកកាហ្វេត្រូវបានធ្វើការអប់រំនិង ឲ្យត្រឡប់ទៅផ្ទះវិញ ។ ក្នុងពេលដែលកំលាំង សមត្ថកិច្ចចុះបង្រ្កាបនេះស្ត្រីឈ្មោះទី វណ្ណី អាយុ ៣២ឆ្នាំ ត្រូវជាប្រពន្ធថៅកែហាងបានរត់គេចខ្លួនតាមទ្វារក្រោយបាត់ស្រមោល ។ តាមការកត់សំគាល់ ហាងកាហ្វេរបស់ឈ្មោះម៉ាប់នេះ បានលួចបញ្ចាំងរឿងអាសអាភាសរយៈពេលជាយូរមកហើយរហូតដល់ដុះស្នឹមហើយកាលពីមុនមិនដែលឃើញសមត្ថកិច្ចខាងណាធ្វើការបង្រ្កាបឡើយ ។
លោកវរសេនីយ៏ឯក ជឹម សេងហុង ស្នងការរងនគរបាលខេត្តមានប្រសាសន៏ថា ដោយសារតែយុវជនឈាមរាវមកមើលរឿងអាសអាភាសនៅហាងកាហ្វេនេះទើបបណ្តាលឱ្យភ្លើតភ្លើនអាចហ៊ានប្រព្រឹត្តបទល្មើសចាប់រំលោភស្រ្តីភេទទន់ខ្សោយ ហើយនាពេលកន្លងទៅ គេសង្កេតឃើញមានបទល្មើសរំលោភសេពសន្ថវៈកើតឡើងជាបន្តបន្ទាប់នៅស្រុកចំការលើ ។ ចណែកហាងកាហ្វេនៅចំណុចថ្នល់បែកលិចនេះត្រូវបានសមត្ថកិច្ចស្រុកមើលរំលង មិនមានចំណាត់ការបង្រ្កាបទេ ហេតុដូច្នេះហើយទើបរូបលោកបញ្ជាឱ្យកំលាំងពីខេត្តចុះទៅឃ្លាំមើល ព្រោះមានប្រជាពលរដ្ឋរាយការណ៍មកជាហូរ ហែ ។ ចំពោះសំភារៈដែលដកហូតត្រូវបាននាំមកកាន់ស្នងការដ្ឋានខេត្តទៀត ដើម្បីបំពេញបែបបទបញ្ជូនទៅសាលាដំបូងចាត់ការតាមនីតិវិធីច្បាប់ ៕
