ខេត្តបាត់ដំបង ៖ អ្នកលក់ត្រីម្នាក់ត្រូវសមត្ថកិច្ចឃាត់ខ្លួនក្រោយពីប្រើអំពើហិង្សាវាយអ្នកទិញត្រីជាអតិថិជនរបស់ខ្លួនឲ្យរងរបួសធ្ងន់ដោយបោចសក់មូល.ករហូតសន្លប់ កាលពីល្ងាចថ្ងៃទី១៤ កក្កដា នៅក្នុងផ្សារតាឡន ស្ថិតក្នុងភូមិត្រពាំងព្រលិត ឃុំសន្តិភាព ស្រុកសំពៅលូន ដែលគេអះអាងថា បណ្ដាលមកពីការទិញដូរមិនត្រូវចិត្តគ្នា ។
សមត្ថកិច្ចស្រុកសំពៅលូនបានឲ្យដឹងថា ស្រ្តីអ្នកលក់ត្រីចិត្តក្ដៅដែលត្រូវចាប់ខ្លួនឈ្មោះ នួន បូផល អាយុ៣៦ឆ្នាំ នៅភូមិ-ឃុំខាងលើ ។ រីឯស្រ្តីរងគ្រោះឈ្មោះ ឆាន់ ផាលី ហៅលីវ អាយុ២៩ឆ្នាំ នៅភូមិ-ឃុំជាមួយគ្នា ។ សមត្ថកិច្ចនិយាយថា ការឈានដល់ប្រើអំពើហិង្សានេះ គឺដោយសារអ្នកលក់ក្ដៅក្រហាយ នឹងអ្នកទិញត្រីដែលទិញហើយបែរជាមកដូរយកប្រាក់វិញ ។ ដោយមិនអាចសម្រួលគ្នាបានទើបមានការប្រទូស្ដរាយគ្នា តែអ្នកលក់ដៃធ្ងន់ជាងក៏ចាប់បោចសក់អ្នកទិញបោកមូល.កសន្លប់នៅកន្លែងកើតហេតុ ។
ប្ដីស្រ្តីរងគ្រោះលោក សំ វុត្ថា ប្រាប់សមត្ថកិច្ចថា គាត់មិនបានដឹងរឿងនោះទេ ក្រោយមកក៏មានអ្នកភូមិមកប្រាប់ ពេលគាត់រត់ទៅមើលឃើញភរិយាដេកសន្លប់ស្ដូកនៅក្នុងផ្សារក្រោមការចោមរោមមើលពីមនុស្សរាប់សិបនាក់។ លោកក៏នាំប្រពន្ធទៅសង្គ្រោះដោយមិនទាន់បានសួរនាំអ្វីទេ ។ បុរសនេះបញ្ជាក់ថា ភរិយាគាត់ទើបនឹងឆ្លងទន្លេរួចថ្មីៗប្រហែលអាចប៉ះពាល់ធ្ងន់ធ្ងរហើយ ។នៅក្នុងកំណត់ហេតុស្រ្តីឈ្មោះ នួន បូផល បាននិយាយថា ស្រ្តីរងគ្រោះបានប្រើកូនស្រីឲ្យមកទិញត្រីដំរី១ក្បាលថ្លៃ២០០០រៀល លុះទិញទៅហើយបែរជាម្ដាយមកដូរយកប្រាក់វិញ ។ គាត់និយាយថា គ្រានោះក៏មានការប្រកែកគ្នាយ៉ាងខ្លាំង តែដោយសារស្រ្តីរងគ្រោះដាល់គាត់១ដៃចំមុខ ទើបរូបគាត់ក្ដៅក្រហាយវាយវិញទៅ។
ប៉ុន្តែសាក្សីដែលជួយអន្តរាគមន៍បានប្រាប់សមត្ថកិច្ចដែរថា កូនស្រីរបស់ជនរងគ្រោះបានសួររកទិញត្រីកញ្ចុះ តែអត់មានហើយគ្រានោះអ្នកលក់បានបង្ខំឲ្យក្មេងស្រីនោះទិញត្រីដំរីវិញ ហើយក្មេងស្រីក៏ទិញតាមការបង្ខំនោះ ។ សាក្សីបញ្ជាក់ថា លុះទិញទៅបានបន្តិចស្រាប់តែម្ដាយនាងកាន់ត្រីមកដូរយកប្រាក់វិញ ដោយគាត់ប្រាប់ថា គាត់ហូបមិនកើតខ្លាចទាស់សរសៃខ្ចី ព្រោះទើបសម្រាលកូនរួច ។ ប៉ុន្តែអ្នកលក់បានប្រកែកមិនប្ដូរវិញទេ រហូតតឹងសរសៃ.កដាក់គ្នាខ្លាំងឡើងៗ ។ ប្រភពដដែលបញ្ជាក់ថា គ្រានោះគេឃើញភាគីទាំង២បោះត្រីដំរីឲ្យគ្នាទៅវិញទៅមកដូចលេងបោះឈូងអ៊ីចឹង។ តែដល់ភាគីអ្នកទិញបោះត្រីនោះត្រូវចំមុខអ្នកលក់ ទើបអ្នកលក់ក្ដៅក្រហាយស្ទុះទៅវាយបោចសក់អ្នកទិញ បោកមូលករហូតដល់សន្លប់ ព្រោះអ្នកទិញមាឌតូចជាង ហើយសរសៃខ្ចីទៀត ។ ការពិតមិនមែនអ្នកទិញដាល់មុខអ្នកលក់ទេ ។
សមត្ថកិច្ចបញ្ជាក់ថា ស្រ្តីអ្នកលក់ត្រីនោះត្រូវបានបញ្ជូនទៅសាលាដំបូងខេត្តហើយ រីឯស្រ្តីរងគ្រោះនៅមិនទាន់ដឹងស្ថានភាពរបួសយ៉ាងណានោះទេ តែប្រភពពីក្រុមគ្រួសារថា កំពុងស្ថិតក្នុងស្ថានការសង្គ្រោះបន្ទាន់ក្នុងមន្ទីរពេទ្យបង្អែកខេត្ត៕
ចែករំលែកព័តមាននេះ