រថយន្តហ៊ីយ៉ាន់ដាយបើកលឿនបុកគល់ឈើរបួសធ្ងន់ និងស្រាល៩នាក់
បញ្ចូលអត្ថបទ ៖ បុប្ផា កោះ
ថ្ងៃអាទិត្យ ទី១៥ ខែកក្កដា ឆ្នាំ២០១២ ម៉ោង ១៦:៤៨
ខេត្តព្រះសីហនុ ៖ ស្នូរលាន់កក្រើកដូចរន្ទះបង្កឱ្យមានការភ្ញាក់ផ្អើលដោយសារតែរថយន្តមួយគ្រឿងដែលបើកបរក្នុងល្បឿនលឿនហួសកំណត់ លុះមកដល់ចំណុចផ្លូវបត់ដោយសារតែអ្នកបើកបរយកចង្កូតមិនទាន់ក៏ជ្រុលទៅបុកផ្ទប់នឹងគល់ដើមគគីរ បណ្តាលឱ្យអ្នកបើកបររួមទាំងអ្នកជិះក្នុងរថយន្តចំនួន៩នាក់ ត្រូវរងរបួសធ្ងន់ និងស្រាល ។
ក្រោយពេលកើតហេតុភ្លាមៗនោះគេឃើញរថយន្តសង្គ្រោះតាមគ្លីនិកឯកជន ក្នុងខេត្តព្រះសីហនុ បានទៅដឹកជញ្ជូនយកជនរងគ្រោះទៅព្យាបាលនៅតាមគ្លីនិកផ្សេងៗគ្នា ។
លោកវរសេនីយ៍ទោ ព្រហ្ម ពៅ នាយការិយាល័យចរាចរផ្លូវគោកនៃស្នងការដ្ឋាននគរបាលខេត្តព្រះសីហនុ បានឱ្យដឹងថា ករណីគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១៦និង៥០នាទីរសៀលថ្ងៃទី១៣ កក្កដា ២០១២ តាមបណ្តោយវិថីឯករាជ្យ ត្រង់ចំណុចផ្លូវកោងបត់ទល់មុខអតីតសាលាដំបូងក្រុងព្រះសីហនុចាស់ ស្ថិតនៅភូមិ៣ សង្កាត់លេខ៤ ក្រុងព្រះសីហនុ ។
លោកបន្តទៀតថា រថយន្តដែលបង្កឱ្យមានគ្រោះថ្នាក់ម៉ាកហ៊ីយ៉ាន់ដាយ (PORTER) ប្រភេទដឹកធុនតូច ពណ៌ស ជាកម្មសិទ្ធិរបស់ក្រុមអាជីវករទទួលម៉ៅការរៀបចំតម្លើងឆាក និងប្រគំតន្ត្រីផ្សព្វផ្សាយពាណិជ្ជកម្មឱ្យក្រុមហ៊ុនស្រាបៀរ លីអូ ។ បើកបរដោយឈ្មោះគង់ ញ៉ា ភេទប្រុស អាយុ២៥ឆ្នាំ មានទីលំនៅរាជធានីភ្នំពេញ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
