រាជធានីភ្នំពេញ ៖ យុវជនម្នាក់បានរងរបួសធ្ងន់ ដោយសារខ្មាន់កាំភ្លើងមិនស្គាល់អត្តសញ្ញាណមួយក្រុមជិះម៉ូតូតាមបាញ់ប្រហារ ខណៈយុវជនរូបនេះជិះម៉ូតូចេញពីផឹកស៊ីនៅក្លិបកម្សាន្តយីហោលុច្សសារី ដែលមានទីតាំងនៅកែងផ្លូវលេខ១៩៩ និងផ្លូវលេខ៣២៨ និងត្រូវបាញ់នៅកែងផ្លូវលេខ១៩៣ និងផ្លូវលេខ៣២៨ ស្ថិតក្នុងសង្កាត់ទួលស្វាយព្រៃទី១ ខណ្ឌចំការមន ដែលមានចម្ងាយប្រមាណតែ២០០ម៉ែត្រពីក្លិបកម្សាន្តលុច្សសារី កាលពីវេលាម៉ោង១ និង៣០នាទីរំលងអធ្រាត្រឈានចូលថ្ងៃទី១៣ កក្កដា ។
តាមប្រភពព័ត៌មានពីកន្លែងផ្ទុះអាវុធបណ្តាលឱ្យរងរបួសយុវជនម្នាក់ខាងលើនេះ បានឱ្យដឹងថា មុនពេលយុវជនរងគ្រោះត្រូវក្រុមខ្មាន់កាំភ្លើងតាមបាញ់ប្រហារ គឺរូបគេរួមជាមួយមិត្តភក្តិចំនួន៤នាក់បានចូលផឹកស៊ីរាំកម្សាន្តនៅក្លិបលុច្សសារីតាំងពីម៉ោង៩យប់រហូតដល់ម៉ោងជាង១រំលងអធ្រាត្រទើបនាំមិត្តភក្តិជិះម៉ូតូចេញពីក្លិប ។ ខណៈនោះក៏ត្រូវជនមិនស្គាល់មុខតាមបាញ់ប្រហារចំនួន៨គ្រាប់សំដៅយុវជនរងគ្រោះបណ្តាលឱ្យត្រូវចំចង្កេះខាងស្តាំបៀមគ្រាប់រងរបួសធ្ងន់ បច្ចុប្បន្នកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ។
ជុំវិញហេតុការណ៍ខាងលើនេះ សមត្ថកិច្ចនគរបាលប៉ុស្តិ៍ទួលស្វាយព្រៃទី១ ដឹកនាំដោយលោកនាយប៉ុស្តិ៍ ពៅ ពិដោរ បានចុះអន្តរាគមន៍សួរនាំនិងបានដឹងភ្លាមៗថា ការផ្ទុះអាវុធនេះ គឺបណ្តាលមកពីក្រុមយុវជនរងគ្រោះមានទំនាស់គ្នាជាមួយក្រុមផ្សេងក្នុងក្លិបលុច្សសារី លុះពេលចេញពីក្លិបមកវិញក៏កើតមានអំពើគុំកួនតាមបាញ់ប្រហារគ្នាកើតឡើង ។ ពេលមានទំនាស់គ្នានៅក្នុងក្លិបនោះក្រុមសន្តិសុខក្លិបបានជួយសម្របសម្រួលឱ្យពួកគេស្ងប់ចិត្ត និងបន្តផឹកស៊ីរហូតពេលបែកគ្នាជិះម៉ូតូចេញរៀងៗខ្លួនដោយពុំដឹងថា មានការគុំកួនតាមបាញ់ប្រហារគ្នាកើតឡើងបែបនេះឡើយ ។
ក្នុងហេតុការណ៍បាញ់ប្រហារគ្នានេះដែរឈ្មោះអ៊ុត ពិទូ អាយុ២២ឆ្នាំ មានទីលំនៅក្នុងសង្កាត់ទួលសង្កែ ខណ្ឌឫស្សីកែវ ដែលជាអ្នកទទួលរងនូវការបាញ់ប្រហារ បានរត់គេចពីគ្រាប់កាំភ្លើងដោយលូនចូលក្រោមរថយន្តម៉ាកតូយ៉ូតាពណ៌ខ្មៅ១បាំងកន្លះមួយគ្រឿងដែលម្ចាស់គេចតស្ងៀមនៅតាមផ្លូវកន្លែងកើតហេតុ ដើម្បីរួចផុតពីគ្រោះថ្នាក់ដល់អាយុអាជីវិត ។ នៅមុនពេលឈ្មោះ អ៊ុត ពិទូ រងនូវការបាញ់ប្រហារ គឺរូបគេបានជិះម៉ូតូម៉ាកឃ្លិក ពណ៌លឿងចេញពីក្លិបលុច្សសារី ដោយមានមិត្តភក្តិម្នាក់ជាអ្នកឌុប ។ ប៉ុន្តែសកម្មភាពនៃការបាញ់ប្រហារនោះ ក្រុមខ្មាន់កាំភ្លើងបាញ់តម្រង់រកតែឈ្មោះអ៊ុត ពិទូ ម្នាក់ប៉ុណ្ណោះ នេះបញ្ជាក់ថា ក្រុមខ្មាន់កាំភ្លើងប៉ុនប៉ងបាញ់ប្រហារតែឈ្មោះអ៊ុត ពិទូ ក្នុងរឿងគំនុំអ្វីមួយជាក់ជាពុំខានឡើយ ។ ដោយឡែកឈ្មោះអ៊ុត ពិទូ និយាយប្រាប់សមត្ថកិច្ចថា ខ្លួនគ្មានទំនាស់អ្វីធំដុំដល់ថ្នាក់គេតាមបាញ់ទេ ។
សូមរំលឹកថា កាលពីយប់ថ្ងៃទី១១ កក្កដា ក៏មានការផ្ទុះអាវុធនៅមុខក្លឹបស្កាយ តាមបណ្តោយផ្លូវលេខ៣១០ ស្ថិតក្នុងសង្កាត់បឹងកេងកងទី៣ ខណ្ឌចំការមន បណ្តាលឱ្យរងរបួសបុរសម្នាក់បញ្ជូនទៅសម្រាកព្យាបាលរបួសនៅមន្ទីរពេទ្យកាល់ម៉ែត ប៉ុន្តែក្រុមខ្មាន់កាំភ្លើងពុំទាន់ត្រូវបានចាប់ខ្លួននៅឡើយទេ រហូតមកដល់ថ្ងៃទី១៣ កក្កដា ។ ដូច្នេះចាំមើលករណីបាញ់ប្រហារដោយផ្តើមចេញពីក្នុងក្លិបលុច្សសារីខាងលើនេះទៀត តើសមត្ថកិច្ច និងអាជ្ញាធរ អាចស្វែងរកចាប់ខ្លួនខ្មាន់កាំភ្លើងទាំង២កន្លែងខាងលើយកមកផ្តន្ទាទោសតាមច្បាប់បានដែរឬយ៉ាងណា ?
ចែករំលែកព័តមាននេះ