រាជធានីភ្នំពេញ ៖ បន្ទាប់ពីហក់ចូលទៅក្នុងផលិតកម្មហង្សមាស ជាងកន្លះឆ្នាំមកនេះ ស្រីស្រស់ ទេព បូព្រឹក្ស បានវាយលុកលើទីផ្សារគួរសម ដែលអាចធ្វើឱ្យគេទទួលស្គាល់ថា នាងជាតារាចម្រៀងដែលមានទេពកោសល្យល្អ និងលេចធ្លោនៅក្នុងឆ្នាំ២០១២ នេះ ។ នាងកំពុងតែត្រូវអ្នកគ្រប់គ្រងផលិតកម្មហង្សមាសយកចិត្តទុកដាក់រៀបចំបទចម្រៀងថ្មីឱ្យជាបន្តបន្ទាប់ ។ ដោយសាររឿងនេះហើយទើបលេចឮថា នាងពេជ្រ សោភា បានប៉ះពាក្យសម្តី និងឌឺដងផ្លែផ្កាឱ្យកញ្ញា ទេព បូព្រឹក្ស និងមានបំណងចង់ចាកចេញពីផលិតកម្មហង្សមាសទៀតផង ដោយសារតែមានការអន់ចិត្តជាមួយផលិតកម្មដែលរៀបចំបទចម្រៀងឱ្យកញ្ញា ទេព បូព្រឹក្ស ច្រើនជាង ។
នៅតាមស្ថានីយទូរទស្សន៍គេតែងតែឃើញវត្តមានរបស់ស្រីស្រស់ធ្មេញច្រពើស ទេព បូព្រឹក្ស ជាញឹកញាប់ដោយនាងបង្ហាញក្បាច់រាំយ៉ាងរស់រវើកដូចជាតារាបរទេស ដែលកម្រនឹងមានតារាចម្រៀងផ្សេងរាំបានល្អដូចនាងណាស់។ ស្របពេលជាមួយគ្នានោះស្រាប់តែមានព័ត៌មានវាយប្រហារកញ្ញា ទេព បូព្រឹក្ស ថា នាងជានារីខ្មែរហេតុអ្វីក៏រាំអាក្រក់មើលខ្លាំងម៉្លេះ មើលទៅដូចជាអឺរ៉ុប ។ ជានារីខ្មែរមិនគួររាំរលាក់ដើមទ្រូង រែងចង្កេះបែបនោះទេ មើលទៅដូចជាមិនសមរម្យសោះ ពិបាកយកភ្នែកមើលណាស់។
ទាក់ទិនទៅនឹងបញ្ហានេះ យើងមិនអាចសុំការបកស្រាយពីកញ្ញា ទេព បូព្រឹក្ស បានទេ ប៉ុន្តែលោកទី តូ ដែលជាជំនួយការនៅក្នុងផលិតកម្មរស្មីងហង្សមាស បានប្រាប់កោះសន្តិភាពតាមទូរស័ព្ទថា «ជាធម្មតាអ្វីក៏ដោយតែងតែមានការរិះគន់ និងការសរសើរ ប៉ុន្តែយើងក៏ព្យាយាមកែទៅតាមអ្វីដែលពួកគាត់ចង់បាន ។ សម្រាប់ខ្ញុំដែលជាអ្នកគ្រប់គ្រងពួកគាត់ ខ្ញុំគិតថាវាមិនជាបញ្ហាអ្វីដែលធ្ងន់ទេ ដោយអ្នកមួយភាគធំគាត់បានស្រែកថា ទេព បូព្រឹក្ស គាត់រាំឡូយណាស់ ដូចជាបរទេស ប៉ុន្តែក៏នៅមានមួយផ្នែកទៀតពួកគាត់គិតថា បូព្រឹក្ស រាំសាហាវពេក ។ ជាធម្មតាអ្នកចម្រៀងដែលច្រៀងផងរាំផងនៅក្នុងស្រុកខ្មែរវាកម្រមានណាស់» ។ លោកទី តូ ថ្លែងអំណរគុណចំពោះមតិរិះគន់សម្រាប់ក្បាច់រាំរបស់កញ្ញា ទេព បូព្រឹក្ស ហើយលោកនឹងកែសម្រួលឡើងវិញ។ ទោះជាយ៉ាងណាក្តីលោកក៏សំណូមពរដល់ទស្សនិកជនថា សូមកុំគិតតែពីផលអវិជ្ជមានរបស់េទព បូព្រឹក្ស ពេក សូមគិតអំពីការខំប្រឹងរបស់នាងផង ។
លោកទី តូ បន្ថែមថា «ខ្មែរយើងតែងតែប្រកាន់ចំពោះភាពសិចស៊ី ភាពអាសអាភាស ចំណុចនេះខ្ញុំនឹងមិនឱ្យកើតមានឡើងសម្រាប់តារាចម្រៀងពួកខ្ញុំទេ ។ ខ្ញុំចង់សួរថា យើងគ្រប់គ្នាតែងតែសរសើរថៃ កូរ៉េ អំពីក្បាច់រាំ ហេតុអ្វីបានជាយើងមិនព្រមសរសើរខ្មែរផង ព្រោះពេលដែលថៃ ឬកូរ៉េ ឡើងរាំយើងសរសើរគេថារាំឡូយ រាំល្អ ចុះខ្មែរយើងដូចគ្នា ហេតុអ្វីក៏មិនសរសើរផងទៅ ពេលខ្លះកូរ៉េ និងថៃ រាំអាសអាភាសជាងខ្មែរផងនោះ ប៉ុន្តែទោះបីជាយ៉ាងណាក៏យើងនៅតែទទួលយកមតិរិះគន់ពីអ្នកទស្សនាដើម្បីមកកែលម្អដដែល» ។
កញ្ញា ទេព បូព្រឹក្ស ជាចៅទួតរបស់លោកយាយសារាំ ប៉ាក់ ជាអ្នកចម្រៀងអាយ៉ៃដ៏ល្បីដោយនាងបានចូលប្រឡូកក្នុងពិភពសិល្បៈតាំងពីអាយុ៩ឆ្នាំ ។ នាងធ្លាប់ជាប់ជ័យលាភីលេខ១ក្នុងកម្មវិធីប្រឡងចម្រៀងសម័យរបស់ស្ថានីយទូរទស្សន៍ប៉ុស្តិ៍លេខ៩ ក្នុងកម្មវិធី «តម្លៃនៃទេពកោសល្យ» កាលពីឆ្នាំ២០០០ ។ នាងទេព បូព្រឹក្ស បានចូលរួមថតក្នុងខ្សែភាពយន្តឱ្យក្រុមហ៊ុនហូលីវូដ ដែលមកថតនៅស្រុកខ្មែរផងដែរ កាលពីនាងមានអាយុ២១ឆ្នាំ ។ លើសពីនេះបានថតស្ប៉តពាណិជ្ជកម្មជាច្រើនទៀត ។
នៅក្នុងឆ្នាំ២០០៨ បូព្រឹក្ស ត្រូវបានផលិតកម្មរស្មីស្ទឹងសង្កែជ្រើសរើសឱ្យធ្វើជាតារាថ្មីជំនួស នាងសួស សេងសប្តាហ៍ ដែលទៅរស់នៅប្រទេសអាមេរិក ធ្វើឱ្យមានឱកាសបានថតសំឡេងចូលស៊ីឌី ជាលើកដំបូង ។ នៅផលិតកម្មរស្មីស្ទឹងសង្កែបានមួយឆ្នាំ នាងក៏ចាកចេញដោយលើកហេតុផលថា ផលិតកម្មរស្មី ស្ទឹងសង្កែ និពន្ធបទឱ្យនាងច្រៀងតិចពេកមិនអាចឱ្យនាងវាយលុកទីផ្សារបានទេ ។
បន្ទាប់មកនាងបូព្រឹក្ស ចូលច្រៀងក្នុងផលិតកម្ម TV Production ដែលមាន នាងញឹម ចាន់ថន ជាថៅកែស្រី ។ ក្រោយមកផលិតកម្មនេះ បិទទ្វារនាងក៏ឃ្លាតឆ្ងាយពីសិល្បៈ ហើយរហូតមកដល់ចុងឆ្នាំ២០១១ ទើបឃើញនាងមានវត្តមាននៅក្នុងផលិតកម្មរស្មីហង្សមាស ដែលជាផលិតកម្មធំ និងមានគ្រឹះរឹងមាំ សម្រាប់ឱ្យនាងឈរជើងបានយូរ ។
ពេលនេះនាងកំពុងតែមានការមមាញឹកក្នុងការថតសំឡេងបញ្ចូលក្នុងស៊ីឌី សម្រាប់អាល់ប៊ុមថ្មី ៕
ចែករំលែកព័តមាននេះ