សេដ្ឋកិច្ចរបស់អាមេរិកក្នុងឆ្នាំ2012 រីកចម្រើនមិនលើសពី2%ខណៈពេលបំណុលសាធារណៈមានដល់ទៅ 103% នៃ GDP
បញ្ចូលអត្ថបទ ៖ ស្រីណា កោះ
ថ្ងៃព្រហស្បត្ត៏ ទី៥ ខែកក្កដា ឆ្នាំ២០១២ ម៉ោង ១៧:២០
គេហទំព័របរទេស
សេដ្ឋកិច្ចរបស់អាមេរិកក្នុងឆ្នាំ2012 រីកចម្រើនមិនលើសពី2%ខណៈពេលបំណុលសាធារណៈមានដល់ទៅ 103% នៃ GDP
មូលនិធីរូបិយវត្ថុអន្តរជាតិ(IMF) ឱ្យដឹងថា សេដ្ឋកិច្ចរបស់អាមេរិក ដែលមានឈ្មោះថា ស្ថិតនៅលំដាប់ទី១នៅលើពិភពលោក នឹងមានការរីកចម្រើនត្រឹមតែ២%ក្នុងឆ្នាំ២០១២ ឬអាចរីកធំធាត់ត្រឹម២,២៥%នៅឆ្នាំ២០១៣ ព្រោះតែមានផលប៉ះពាល់ពីវិបត្តិបំណុលនៅអឺរ៉ុប រួមទាំងការរីកចម្រើនមានសភាពយឺតនៃសេដ្ឋកិច្ចអាមេរិកដោយផ្ទាល់ ។
នៅក្នុងសេចក្តីថ្លែងការណ៍របស់IMFបានបញ្ជាក់ថា សហរដ្ឋអាមេរិកនៅតែស្ថិតក្នុងស្ថានភាពប្រឈមមុខ នឹងបញ្ហាសេដ្ឋកិច្ចពីវិបត្តិដែលកើតឡើងនៅតំបន់អឺរ៉ុប និងលក្ខណៈមិនប្រាកដប្រជាទាក់ទងនឹងផែនការរូបិយវត្ថុផ្ទៃក្នុងរបស់ប្រទេសអាមេរិក ធ្វើឱ្យមានការកែសម្រួលគោលដៅការរីកចម្រើនសេដ្ឋកិច្ចអាមេរិក ដែលIMFធ្លាប់បានព្យាករកាលពីខែមេសា ថា សេដ្ឋកិច្ចអាមេរិកក្នុងឆ្នាំនេះ នឹងកើនឡើង២,១% និងនៅឆ្នាំក្រោយប្រហែល២,៤%។
ចំណែកលោកគ្រីស្ទីន ឡាហ្គាដ អគ្គលេខាធិការនៃមូលនិធិរូបិយវត្ថុអន្តរជាតិជនជាតិបារាំង បានក្រើនរំលឹកថា ក្រៅពីមានផលប៉ះពាល់ពីបញ្ហានៅអឺរ៉ុប គឺភាពមិនប្រាកដប្រជាក្នុងផ្នែកហិរញ្ញវត្ថុអាមេរិក ក៏មិនអាចសម្រេចកិច្ចព្រមព្រៀងទាក់ទងនឹងការពង្រីកបំណុលរបស់រដ្ឋាភិបាលបាន និងចាត់ទុកថាជាកត្កាមួយអាចបង្កផលប៉ះពាល់ដល់ការរីកចម្រើនសេដ្ឋកិច្ចក្នុងលក្ខណៈជារួម ។
ម្យ៉ាងទៀតក៏ស្ទើរតែគ្មានប្រទេសណាមួយនៅលើពិភពលោកអាចបង្កឱ្យមានការរីកចម្រើនផ្នែកសេដ្ឋកិច្ចបានជាបន្តបន្ទាប់ និងមានស្ថិរភាព ខណៈពេលមានបំណុលដ៏ធំក្នុងខ្លួន ។ តាមទិន្នន័យរបស់ក្រសួងហិរញ្ញវត្ថុអាមេរិក បានបញ្ជាក់ឱ្យដឹងកាលពីខែមិថុនា ថាតួលេខបំណុលសាធារណៈរបស់អាមេរិកសរុបមានប្រហែល១៥,៨៥លានដុល្លារ ឬមានអត្រាបំណុលខ្ពស់ដល់ទៅ១០៣% នៃផលិតផលសរុបក្នុងស្រុក ឬGDP ៕
