ក្រុមយុវជនបដិវត្តន៍អេហ្ស៊ីបចំនួន២០ក្រុមកាលពីថ្ងៃទី៤ កក្កដាបានដាក់ឱសានវាទមួយចំពោះប្រធានាធិបតីថ្មីជនអ៊ិស្លាមនិយមលោកម៉ូហាម៉េដ ម័រស៊ី ដោយឱ្យលោកពន្យល់លើការបន្តឃុំឃាំងពួកបាតុករដែលទទួលការកាត់ទោសដោយតុលាការយោធា។
ក្នុងសេចក្តីប្រកាសមួយក្រុមទាំងនេះបានទុកពេល៥ថ្ងៃដល់ប្រមុខរដ្ឋឱ្យឆ្លើយតបនឹងសំណួរដូចតទៅ៖ តើលោកជាប្រធានាធិបតីរបស់ប្រជាជនអេហ្ស៊ីបហើយនឹងដោះលែងពួកអ្នកទេសដូចលោកសន្យាដែរឬទេ ?
សកម្មជនម្នាក់លោកអាម៉េដដូមម៉ា នៅក្បែរវិមានប្រធានាធិបតីអះអាងប្រាប់សារព័ត៌មានថា យើងរង់ចាំចម្លើយច្បាស់របស់លោកបណ្ឌិតម៉ូហាម៉េដ ម័រស៊ី។ តើលោកជាប្រធានាធិបតីដែលមានអំណាចដូចជាសិទ្ធិក្នុងការដោះលែងពួកអ្នកទោសឬទុកបញ្ហានេះឱ្យនៅដដែល ដូចជាកាលពីមុនពេលប្រទេសស្ថិតក្នុងកណ្តាប់ដៃរបស់ក្រុមប្រឹក្សាយោធាជាន់ខ្ពស់ឬយ៉ាងណា ?
លោកម័រស៊ីបានបញ្ចេញប្រតិកម្មចំពោះការអំពាវនាវនោះដោយបង្កើតគណៈកម្មការស៊ើបអង្កេតមួយទទួលបន្ទុកពិនិត្យសំណុំរឿងរបស់ពួកអ្នកទោសទាំងអស់ដែលកាត់ទោសដោយតុលាការយោធាចាប់តាំងពីថ្ងៃទី២៨មករា ឆ្នាំ២០១១ ជាកាលបរិច្ឆេទនៃការចាប់ផ្តើមបះបោរឈានទៅផ្តួលរំលំលោកហូស្នី មូបារ៉ាក់មក ។ គណៈកម្មការនោះដឹកនាំដោយចៅក្រមម្នាក់ ក៏នឹងពិនិត្យផងដែរនូវសំណុំរឿងរបស់បណ្តាសកម្មជនដែលកាត់ទោសដោយតុលាការស៊ីវិល។
កាលពីថ្ងៃទី៣០ មិថុនាកន្លងមកនេះ ពួកឧត្តមសេនីយ៍ដែលកាន់អំណាចចាប់តាំងពីការផ្តួលរំលំលោកមូបារ៉ាក់ កាលពីខែកុម្ភៈ ឆ្នាំ២០១១មកបានប្រគល់អំណាចដល់ប្រធានាធិបតីស៊ីវិលដែលទើបជាប់ឆ្នោតតែឱ្យដឹងយ៉ាងច្បាស់ថាកងទ័ពប៉ុនប៉ងរក្សាផ្នែកមួយដ៏សំខាន់នៃឥទ្ធិពល ៕
ចែករំលែកព័តមាននេះ