រាជធានីភ្នំពេញ ៖ បើទោះបីជាក្រុមកីឡាបាល់ឱបជម្រើសជាតិកម្ពុជាបានយកឈ្នះក្រុមកីឡាករប្រទេសប្រ៊ុយណេនៅតង់ទី១ ក្នុងលទ្ធផល១៥ទល់នឹង០យ៉ាងណាក៏ដោយ ក៏ទីបំផុតក្រុមជម្រើសជាតិប្រ៊ុយណេបានវាយបកយកឈ្នះវិញនៅតង់ទី២ ក្នុងលទ្ធផល១៩ទល់នឹង១៥ធ្វើឲ្យក្រុមកម្ពុជាចាញ់ទំាងមិនអស់ចិត្ត ។
គ្រូបង្វឹកក្រុមជម្រើសជាតិកម្ពុជាលោក Richard Flanagan បាននិយាយនៅពេល បញ្ចប់ការប្រកួតនៅទីលានស្តាតចាស់ថា លោកមានការខកចិត្តយ៉ាងខ្លាំង ដោយកីឡាករធ្វើមិនបានល្អនៅតង់ទី២ ថែមទាំងអត់ឱកាសវាយបកទាល់តែសោះ បានត្រឹមទប់ទល់កីឡាករប៊្រុយណេ ។ ចំណែកគ្រូបង្វឹកក្រុមជម្រើសជាតិប្រ៊ុយណេ លោក Julian Pestone បានប្រាប់ក្រុម អ្នកកាសែតទាំងទឹកមុខរីករាយថា តង់ទី១ គឺកម្ពុជា តែតង់ទី២គឺប្រ៊ុយណេ ។ ក្រុមរបស់លោកទាំងការការពារនិងប្រយុទ្ធ គឺធ្វើបានល្អដូចគ្នាមិនគួរឲ្យជឿនៅតង់ទី២ ខណៈក្រុមកម្ពុជាមានការថមថយកម្លាំងច្រើន ។
កីឡាករកម្ពុជាដែលរកពិន្ទុបាននៅក្នុងការប្រកួតនេះឈ្មោះ Alexis Chevalier, Dan Wetherall និង Mong Morrison ។ ចំណែកកីឡាករប្រ៊ុយណេដែលរកពិន្ទុឲ្យក្រុមនោះមាន Azhar Timbang, Muiz Pg.Ismail, Petrus Tuan, ។ក្រុមកីឡាបាល់ឱបជម្រើសជាតិកម្ពុជា នឹងប៉ះជាមួយឡាវនៅថ្ងៃទី៣០មិថុនា ឆ្នាំ២០១២ វេលាម៉ោង៣រសៀល នៅទីលានស្តាតចាស់ ។ ចំណែកក្រុមបាល់ឱបប្រ៊ុយណេប៉ះឡាវនៅថ្ងៃទី ២៨ មិថុនានេះ ។ នេះជាការប្រកួតដណ្ដើមជើងឯក HSBC Asian 5 Nation Division 5 ។ សូមបញ្ជាក់ថា ការប្រកួតនេះមិនមានការលក់សំបុត្រចូលទស្សនានោះទេ ៕
ចែករំលែកព័តមាននេះ