លោកឧបនាយករដ្ឋមន្ត្រីស ខេង អំពាវនាវឱ្យបង្កើតក្រុមកីឡាករប៉េតង់ឱ្យបានច្រើន
បញ្ចូលអត្ថបទ ៖ ស្រីណា កោះ
ថ្ងៃអង្គារ ទី២៦ ខែមិថុនា ឆ្នាំ២០១២ ម៉ោង ១៧:៣៤
រាជធានីភ្នំពេញ ៖ ក្នុងចំណោមវិញ្ញាសាកីឡាទាំងអស់ដែលកម្ពុជាបញ្ជូនទៅចូលរួមប្រកួតថ្នាក់តំបន់និងក្រៅតំបន់នោះ គឺមានតែវិញ្ញាសាប៉េតង់មួយគត់ដែលដណ្តើមបានពានរង្វាន់ និងមេដាយច្រើនជាងគេរហូតដល់១០០គ្រឿង ។ នេះបើយោងតាមប្រសាសន៍របស់លោកឧបនាយករដ្ឋមន្រ្តី ស ខេង រដ្ឋមន្រ្តីក្រសួងមហាផ្ទៃ និងជាប្រធានកិត្តិយសសហព័ន្ធកីឡាប៊ូល និងប៉េតង់កម្ពុជា ដែលថ្លែងក្នុងពិធីបិទការប្រកួតកីឡាប៉េតង់ពានរង្វាន់របស់លោកឧបនាយករដ្ឋមន្រ្តីផ្ទាល់នៅពហុកីឡាដ្ឋានជាតិអូឡំាពិកកាលពីរសៀលថ្ងៃទី២៥ មិថុនា ២០១២ ។
មានប្រសាសន៍នៅក្នុងឱកាសបិទបញ្ចប់ការប្រកួតកីឡាប៉េតុងនេះផងដែរ លោកឧបនាយករដ្ធមន្រ្តី ស ខេង បានសង្កត់ធ្ងន់ថា ដោយសារកម្ពុជាមានស្ថេរភាពនយោបាយ និង សុខសន្តិភាពពេញលេញទូទំាងប្រទេស ក្រោមការដឺកនំារបស់សម្តេចនាយករដ្ឋមន្រ្តី ហ៊ុន សែន នោះ អ្វីៗគ្រប់យ៉ាងបាននិងកំពុងមានការអភិវឌ្ឍរីកចម្រើនឥតឈប់ឈរ រួមទំាងវិស័យកីឡាក៏មានការអភិវឌ្ឍន៏យ៉ាងខ្លាំង ក្នុងនោះក៏មានវិញ្ញាសារកីឡាប៉េតង់ ដែលបានចូលរួមចំណែកលើកកិតិ្តយសកិត្យានុភាព និងមុខមាត់កម្ពុជាផងដែរ ។
លោកឧបនាយករដ្ឋមន្រ្តីស ខេង ក៏បានអំពាវនាវដល់គ្រប់ស្ថាប័នទំាងអស់ អោយបង្កើតនូវកីឡានេះ ព្រោះវាសាមញ្ញមិនសូវចំណាយច្រើនដូចកីឡាដទៃទៀត ។ លោកឧបនាយករដ្ឋមន្រ្តី ស ខេង ក៏បានលើកទឹកចិត្តនិងបន្តគំាទ្រ កីឡានេះតទៅទៀតនិងបានកោតសសើរដល់ក្រុមកីឡាករទំាងអស់ ដែលបានខិតខំប្រឹងប្រែងនៅក្នុងការប្រកួតទោះជាចាញ់ ឬឈ្នះចាត់ទុកជាបទពិសោធន៍នៅក្នុងការប្រកួត ។ នៅក្នុងឱកាសនោះដែរ លោកឧបនាយករដ្ឋមន្រ្តី ស ខេង ក៏បានផ្តល់ពានរង្វាន់់ជ័យលាភីទំាងអស់។
តាមការឲ្យដឹងពីគណៈកម្មការរៀបចំការប្រកួតនេះបានឲ្យដឹងថា ក្រុមដែលទទួលបានចំណាត់ថ្នាក់លេខ១ពានធំនេះ គឺក្រុមក្រសួងមហាផ្ទៃដែលមានកីឡាករសៀង វណ្ណា-តឹប នរ៉ា-យ៉ាច័ន្ទដារ៉ារិទ្ធ និងខែម សុភ័ក្ត្រ ។ លេខ២ ក្រុមយោធភូមិភាគពិសេស ដែលមានកីឡាករថោង ឈឿន -ឱ សុបញ្ញា-ហេង ស៊ូមាន និងកីឡាករផាន់ ណារ៉េត ។ លេខ៣ ក្រុមអគ្គភស្តុភារហិរញ្ញវត្ថុក្រសួងការពារជាតិ ៕
