ទឹកប្រាក់10ម៉ឺនរៀលតាមរយៈកោះសន្តិភាពជូនកុមារកំព្រាដែល2នាក់ស្លាប់ដោយលង់ទឹក
បញ្ចូលអត្ថបទ ៖ ស្រីណា កោះ
ថ្ងៃចន្ទ ទី២៥ ខែមិថុនា ឆ្នាំ២០១២ ម៉ោង ០៩:០៨
កោះសន្តិភាព
ថវិកា១០ម៉ឺនរៀលទៀតត្រូវបានប្រគល់ដល់ជីដូននិងចៅ
ខេត្តកំពង់ឆ្នាំង ៖ ទឹកប្រាក់ចំនួន១០ម៉ឺនរៀលជាថ្មីទៀត ត្រូវបានភ្នាក់ងារកោះសន្តិភាពនាំយកទៅប្រគល់ជូនលោកយាយ ឡេង ផេន អាយុ៦២ឆ្នាំដែលជាអ្នកអាណាព្យាបាលកុមារកំព្រា៥នាក់បងប្អូន ត្រូវឪពុកម្តាយបោះបង់ចោល ហើយកុមារា២នាក់ក្នុងចំណោម៥នាក់នោះបានទទួលគ្រោះថ្នាក់ដោយសារលង់ទឹកកាលពីពេលថ្មីៗនេះ ។ អំណោយបានយកទៅប្រគល់ដល់លំនៅឋានរបស់គ្រួសារនេះក្នុងភូមិជ្រៃបាក់ ឃុំជ្រៃបាក់ ស្រុករលាប្អៀរ ។ អំណោយជាទឹកប្រាក់១០ម៉ឺនរៀលនេះជារបស់លោក ស្រេង លឹមហ៊ាង និងភរិយាអ្នកស្រី ម៉ឹង មានិត ព្រមទាំងបុត្រជាអាជីវករលក់ដូរនៅកែងផ្សារខេត្តស្ទឹងត្រែង ។
ក្រោយពីបានទទួលអំណោយជាថ្មីទៀតនេះលោកយាយ ឡេង ផេង បានលើកដៃសំពះថ្លែងអំណរគុណដល់សប្បុរសជនទាំងអស់ និងសូមបួងសួងដល់វត្ថុសក្តិសិទ្ធិក្នុងលោក សូមជួយបីបាច់ថែរក្សាដល់សប្បុរសជនទាំងអស់ឱ្យជួបតែពុទ្ធពរទាំង៤ប្រការកុំបីឃ្លាងឃ្លាតឡើយ ។កុមារកំព្រាទាំង៥នាក់នេះគឺឪពុកម្តាយបានបោះបង់ចោលទៅមានប្តីប្រពន្ធថ្មីចោលពួកគេទុកឱ្យរស់នៅជាមួយជីដូន ឈ្មោះ ឡេង ផេន ។
កាលពីរសៀលថ្ងៃទី១៤ មិថុនា កុមារាឈ្មោះ រ៉េត កុសល អាយុ១៣ឆ្នាំ និងកុមារាឈ្មោះ រ៉េត ណារាជ អាយុ៩ឆ្នាំ បានលង់ទឹកស្លាប់នៅក្នុងស្ទឹងជ្រៃបាក់ ។ សព្វថ្ងៃនៅសល់ក្មេងកំព្រា៣នាក់បងប្អូនគឺ កូនស្រីបង ឈ្មោះ រ៉េត ចាន់ឌី អាយុ១៧ឆ្នាំ កុមារា រ៉េត ណារ៉ូត អាយុ១១ឆ្នាំ និងកុមារា រ៉េត វីរៈ អាយុ៧ឆ្នាំ ៕
