ជនសង្ស័យជួញដូរគ្រឿងញៀន៣នាក់ ត្រូវឃាត់ខ្លួន
បញ្ចូលអត្ថបទ ៖ បុប្ផា កោះ
ថ្ងៃសុក្រ ទី២២ ខែមិថុនា ឆ្នាំ២០១២ ម៉ោង ១៥:៤៧
ខេត្តកំពង់ធំ ៖ សមត្ថកិច្ចកងរាជអាវុធហត្ថខេត្តកំពង់ធំ បានបង្ហាញមុខជនសង្ស័យជួញដូរថ្នាំញៀនរួមទាំងវត្ថុតាងមានម៉ូតូ ថ្នាំញៀន និងថង់ប្លាស្ទីកសម្រាប់ច្រកចែកចាយកាលពីវេលាម៉ោង៨និង៣០នាទីព្រឹកថ្ងៃទី២១ មិថុនា ២០១២ ។
តាមប្រភពព័ត៌មានពីលោកប៊ុន ឃី អនុប្រធានមន្ទីរព័ត៌មានស្រាវជ្រាវ និងយុត្តិធម៌នៃកងរាជអាវុធហត្ថខេត្តកំពង់ធំ បានឱ្យដឹងថា កាលពីវេលាម៉ោង៥ល្ងាចថ្ងៃទី២០ មិថុនា សមត្ថកិច្ចកងរាជអាវុធហត្ថស្រុកសន្ទុក បានឃាត់ខ្លួនជនសង្ស័យជួញដូរគ្រឿងញៀន៣នាក់ត្រង់ចំណុចភូមិប្រាសាទ ឃុំប្រាសាទ ស្រុកសន្ទុក ១-ឈ្មោះប៉ក់ ពែក ភេទប្រុស អាយុ២៣ឆ្នាំ ទីលំនៅភូមិត្រស់ ឃុំបល័ង្ក ស្រុកបារាយណ៍ ទី២-ឈ្មោះខន ពិសី ភេទស្រី អាយុ១៦ឆ្នាំ នៅភូមិព្រែកស្បូវ សង្កាត់អូរកន្ធរ ក្រុងស្ទឹងសែន ទាំងពីរនាក់ជាសង្សានឹងគ្នាជិះម៉ូតូម៉ាកអ៊ែរប៊្លែត ពណ៌ខ្មៅ គ្មានស្លាកលេខ ធ្វើសកម្មភាពចែកចាយថ្នាំញៀន និងម្នាក់ទៀតឈ្មោះស្រួច ញ៉ ភេទស្រី អាយុ៤០ឆ្នាំ ចាប់ខ្លួននៅផ្ទះភូមិត្រស់ ឃុំបល័ង្គ ស្រុកបារាយណ៍។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
