ខេត្តព្រះសីហនុ ៖ ជនបរទេសម្នាក់ទៀតហើយ បានដេកស្លាប់សង្ស័យជំងឺគាំងបេះដូងកាលពីយប់ថ្ងៃទី១៨ មិថុនា នៅក្នុងផ្ទះសំណាក់យីហោ សុខុម ដែលមានទីតាំងស្ថិតនៅក្រុមទី១៤ ភូមិ៤ សង្កាត់លេខ៤ ក្រុងព្រះសីហនុ ។
តាមប្រភពពីលោក អនុសេនីយ៍ទោ សុខន ស៊ីម៉ន នាយប៉ុស្តិ៍រដ្ឋបាលសង្កាត់លេខ៤ បានឱ្យដឹងតាមទូរស័ព្ទថា ជនបរទេសដែលដេកស្លាប់នោះឈ្មោះដ្រាយវិត អាមស្ត្រង ភេទប្រុស អាយុ៣៣ឆ្នាំ ជាជនជាតិអាមេរិក កាន់លិខិតឆ្លងដែនលេខ៤៥១០៧៣៣០៥ ជាភ្ញៀវទេសចរបានចូលមកស្នាក់នៅផ្ទះសំណាក់នេះកាលពីថ្ងៃទី៥ មិថុនា ។ លោកបន្តថា ពាក់ព័ន្ធករណីនេះ លោកបានទទួលដំណឹងនៅវេលាម៉ោង៩និង៣០នាទីយប់ថា មានជនបរទេសម្នាក់ទៀតហើយបានស្លាប់ ។ ក្រោយពេលធ្វើកោសល្យវិច័យរួច ឃើញថា ជនរងគ្រោះបានស្លាប់ដោយសារគាំងបេះដូង ។ សពត្រូវសមត្ថកិច្ចប្រគល់ឱ្យតំណាងស្ថានទូតប្រចាំនៅកម្ពុជាយកទៅចាត់ចែងបន្ត ។
ដោយឡែកមានមតិជាច្រើនបាននិយាយតៗគ្នាថា ការស្លាប់នេះគឺប្រហែលជាមកពីជនបរទេសរូបនោះសេពគ្រឿងញៀនច្រើនហួសកំណត់ ទើបបណ្តាលឱ្យប្រតិកម្មរហូតដល់គាំងបេះដូងស្លាប់ ។ ទាក់ទិននឹងករណីជនបរទេសស្លាប់នេះគឺខាងសមត្ថកិច្ចដឹងច្បាស់ណាស់ តែមិនព្រមផ្តល់ព័ត៌មានឱ្យអ្នកកាសែតទេ ៕
ចែករំលែកព័តមាននេះ