រាជធានីភ្នំពេញ ៖ ស្ត្រីជនជាតិហូឡង់ម្នាក់ ត្រូវបានមិត្តភក្តិបញ្ជូនទៅមន្ទីរពេទ្យកាល់ម៉ែតដើម្បីសង្គ្រោះជីវិត បន្ទាប់ពីស្ត្រីរូបនោះត្រូវក្រុមចោរឆក់ប្រដាប់អាវុធធ្វើសកម្មភាពឆក់យកកាបូបស្ពាយនៅមុខផ្ទះសំណាក់ច័ន្ទរស្មីលេខ១៩ សង្កាត់ជ័យជំនះ ខណ្ឌដូនពេញ កាលពីវេលាម៉ោង៤ទៀបភ្លឺ ថ្ងៃទី១៤ មិថុនា និងបាញ់មួយគ្រាប់បណ្តាលឱ្យរបួសថែមទៀត ។
ស្ត្រីបរទេសដែលរងរបួសក្នុងអំពើប្លន់កណ្តាលរាជធានីភ្នំពេញនោះត្រូវបានគេស្គាល់ឈ្មោះ ក្រេស្ទីនជេស៊ីណា អាយុ២៧ឆ្នាំ ជនជាតិហូឡង់ ជាអ្នកទេសចរ ស្នាក់នៅសណ្ឋាគាររ៉ូយ៉ាល់ ផ្លូវលេខ១៥៤ សង្កាត់ផ្សារកណ្តាលទី ២ ខណ្ឌដូនពេញ ត្រូវក្រុមចោរបាញ់មួយគ្រាប់ចំកំភួនជើងខាងស្តាំ ។
យោងតាមសម្តីជនរងគ្រោះបានឱ្យសមត្ថកិច្ចដឹងថា នៅម៉ោងជាង៣ទៀបភឺ្លថ្ងៃទី១៤ មិថុនា គាត់និងមិត្តភក្តិបាននាំគ្នាដើរតាមផ្លូវលេខ១៩ ឆ្ពោះទៅទិសខាងជើង បន្ទាប់ពីផឹកស៊ី និងមើលការប្រកួតបាល់ទាត់យូរ៉ូចប់នៅរង្គសាលបរទេសមួយ ស្ថិតនៅផ្លូវលេខ២៤០ ក្រោយព្រះបរមរាជវាំង ។ លុះមកដល់មុខផ្ទះសំណាក់យីហោ ច័ន្ទរស្មី ផ្លូវលេខ១៩ ស្ថិតក្នុងសង្កាត់ជ័យជំនះ ខណ្ឌដូនពេញ មិត្តភក្តិបានបែកពីគាត់ ហើយដើរចូលផ្ទះសំណាក់ច័ន្ទរស្មី នៅសល់តែគាត់ម្នាក់ឯងដើរទៅផ្ទះសំណាក់រ៉ូយ៉ាល់ ដែលនៅកែងផ្លូវលេខ៥៤ ស្រាប់តែមានជនស្ទាវពីរនាក់ជិះម៉ូតូមិនចាំម៉ាក បានធ្វើសកម្មភាពឆក់យកកាបូបស្ពាយពីគាត់ ។ ពេលនោះគាត់បានប្រវាយប្រតប់ជាមួយ ពួកគេដើម្បីយកកាបូបវិញក៏ត្រូវជនដៃដល់ដកកាំភ្លើងខ្លីមិនស្គាល់ម៉ាកបាញ់មួយគ្រាប់ចំកំភួនជើងខាងស្តាំតែម្តង រួចហើយបានគេចខ្លួនបាត់ ឯគាត់ត្រូវបានមិត្តភក្តិបញ្ជូនទៅមន្ទីរពេទ្យកាល់ម៉ែត ។
ស្ត្រីរងគ្រោះបញ្ជាក់ថា ក្នុងកាបូបស្ពាយដែលចោរឆក់យកទៅនោះ មានម៉ាសីុនថតរូបអូឡាំពុស, ប័ណ្ណឥណទាន(Credit Card)មួយសន្លឹក និងគ្រឿងក្រអូបមួយចំនួនទៀត ៕
ចែករំលែកព័តមាននេះ