វាយប្រហារអត្តឃាតនៅក្រុងបាដាដស្លាប់12នាក់
ដោយ ៖ ប្រុសកោះ
ថ្ងៃចន្ទ ទី៦ ខែកញ្ញា ឆ្នាំ២០១០ ម៉ោង ១៤:៤២
គេហទំព័របរទេស
ខ្លោងទ្វារមូលដ្ឋានយោធារងការវាយប្រហារភេរវកម្ម
មនុស្សយ៉ាងតិច១២នាក់បានត្រូវស្លាប់ ហើយ៤០នាក់ទៀតត្រូវរបួសកាលពីថ្ងៃទី៥ កញ្ញា ក្នុងការវាយប្រហារអត្តឃាតប្រឆាំងនឹងមូលដ្ឋានយោធាមួយកន្លែងនៅក្រុងបាដាដ ដែលការវាយប្រហារនេះកើតឡើងមិនដល់មួយសប្តាហ៍ផង ក្រោយការចាកចេញរបស់បណ្តាកងឯកភាពប្រយុទ្ធចុងក្រោយរបស់អាមេរិក ។ យោងតាមព័ត៌មាននានាថា ជនអត្តឃាតរហូតដល់ទៅ៥នាក់បានចូលរួមក្នុងការវាយលុកទាំងកណ្តាលថ្ងៃ ប្រឆាំងនឹងមូលដ្ឋានយោធានេះដែលកាលពី២សប្តាហ៍មុន ធ្លាប់ជាគោលដៅនៃការវាយប្រហារអត្តឃាតមួយរួចមកហើយ បណ្តាឱ្យមនុស្សស្លាប់៥៧នាក់ និងរបួស១២៣នាក់ ក្នុងចំណោមកងទាហាន និងពួកអ្នកទើបជ្រើសរើសចូលធ្វើទាហាន ។
ការវាយលុកកាលពីថ្ងៃទី៥ កញ្ញា នេះបានចាប់ផ្តើមខណៈពេលរថយន្តបឺសធុនតូចមួយគ្រឿងផ្ទុកគ្រឿងផ្ទុះបើកបំបុកលើច្រកទ្វារចូលមួយទៅក្នុងមូលដ្ឋាននេះ ។ ជនអត្តឃាតម្នាក់ ឬ២នាក់ដែលរត់តាមរថយន្តនេះអាចធ្វើឱ្យគ្រឿងផ្ទុកក្នុងរថយន្តផ្ទុះឡើងពេលរងការបាញ់ប្រហាររបស់កងទាហាន ។ ជនប្រដាប់អាវុធ២នាក់ទៀត បានបាញ់ចេញពីអគារមួយស្ថិតនៅក្បែរនោះ ។ ការបាញ់ប្រហារមានរយៈពេល១ម៉ោង។
ឧត្តមសេនីយ៍កាស់ ស៊ីម មូសាវី អ្នកនាំពាក្យរបស់កងកំលាំងសន្តិសុខក្រុងបាដាដថ្លែងថា នេះជាការវាយប្រហារអត្តឃាតដោយប្រើរថយន្តផ្ទុកគ្រឿងផ្ទុះសំដៅលើច្រកចូលសំខាន់នៃទីបញ្ជាការយោធា ROUSSAFA ។ មូលដ្ឋាននេះឥឡូវក្លាយជាការិយាល័យនៃមជ្ឈមណ្ឌលជ្រើសរើសទ័ព និងទីបញ្ជាការដ្ឋាន ៕
