អង្គរក្សលោកឧកញ៉ាម្នាក់ខ្យល់គរស្លាប់តាមផ្លូវ ខណៈកំពុងបើកម៉ូតូ
បញ្ចូលអត្ថបទ ៖ ស្រីណា កោះ
ថ្ងៃអាទិត្យ ទី១០ ខែមិថុនា ឆ្នាំ២០១២ ម៉ោង ១៨:០១
កោះសន្តិភាព
ជនរងគ្រោះកំពុងត្រូវបានជួយសង្គ្រោះ
រាជធានីភ្នំពេញ ៖ អង្គរក្សរបស់លោកឧកញ៉ាម្នាក់ បានកើតខ្យល់គរហើយស្លាប់ ខណៈកំពុងជិះម៉ូតូតាមផ្លូវ កាលពីវេលាម៉ោង៤ និង៣០នាទីរសៀលថ្ងៃទី១០ មិថុនា ២០១២ នៅចំណុចមុខសាលាបឋមសិក្សាវឌ្ឍនវិទ្យា ផ្លូវលេខ២៣៨ សង្កាត់បឹងព្រលិត ខណ្ឌ៧មករា ។
បុរសរងគ្រោះឈ្មោះសេង ចន្ទវុទ្ធី អាយុ៣៤ឆ្នាំ មានទីលំនៅផ្ទះលេខ២៤៤ ផ្លូវ២៧១ សង្កាត់ផ្សារដើមថ្កូវ ខណ្ឌចំការមន ។ ប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុ បុរសរងគ្រោះបានជូនដំណើរប្រពន្ធរបស់ចៅហ្វាយនាយទៅផ្សារឡាក់គី លុះពេលជូនដំណើរទៅដល់ផ្សារ បុរសខាងលើ ហាក់មានអាការមិនសូវស្រួលខ្លួន ក៏ជិះម៉ូតូចេញពីផ្សារ ដើម្បីទៅរកកន្លែងកោសខ្យល់ លុះជិះមកដល់ចំណុចកើតហេតុ បានឈប់ម៉ូតូ ហើយស្រែកឱ្យគេជួយ រួចក៏ដួលសន្លប់ទៅ ។ អ្នកឃើញហេតុការណ៍បាននាំគ្នាជួយរឹត គក់ច្របាច់ ប៉ុន្តែអកុសលបុរសរងគ្រោះបានស្លាប់ដោយមិនអាចសង្គ្រោះទាន់ពេល ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង ៕
