រាជធានីភ្នំពេញ ៖ មានហេតុការណ៍ហិង្សាមួយបានផ្ទុះឡើងនៅក្នុងប្លុកសួនច្បារមជ្ឈមណ្ឌលកោះពេជ្រ ស្ថិតក្នុងសង្កាត់ទន្លេបាសាក់ខណ្ឌចំការមន កាលពីព្រលប់ថ្ងៃទី៧ មិថុនា ឆ្នាំ២០១២ បណ្តាលមកពីជម្លោះរវាងជនស្ទាវ៣ក្រុម ។ ជម្លោះនេះកើតឡើងមកពីការប៉ះទង្គិចពាក្យសម្តីគ្នាបន្តិចបន្ទួចហើយឡើងធ្នង់ខ្លាំងរៀងខ្លួន ក៏បង្កជាទំនាស់ហិង្សាឡើងរហូតសមត្ថកិច្ចចុះអន្តរាគមន៍ឃាត់ខ្លួនបាន៧នាក់ ដកហូតបានអាវុធខ្លីម៉ាកប៉េអាកុលមួយដើម រួចបញ្ជូនមកកាន់ទីបញ្ជាការកងរាជអាវុធហត្ថខណ្ឌចំការមន ដើម្បីចាត់ការតាមច្បាប់ ។
តាមប្រភពព័ត៌មានឱ្យដឹងថា នៅល្ងាចនោះជនស្ទាវទាំង៣ក្រុម ដោយគ្រាន់តែប៉ះទង្គិចពាក្យសម្តីគ្នាតិចតួចក៏ផ្ទុះហិង្សាយកដុំថ្មគប់ និងវាយតប់គ្នា ផ្អើលឈុលពេញកោះពេជ្រ ។ ពេលនោះ សន្តិសុខប្រចាំការនៅកោះពេជ្រ សហការជាមួយនគរបាលមូលដ្ឋាន និងកងរាជអាវុធហត្ថខណ្ឌ ចុះអន្តរាគមន៍ឃាត់ខ្លួនបាន៧នាក់ និងដកហូតអាវុធខ្លីបានមួយដើម ។ នៅចំពោះមុខសមត្ថកិច្ច ក្រុមយុវជនទាំង៧នាក់បាននិយាយយកត្រូវរៀងៗខ្លួនថា ពួកគេអត់បានបង្កហិង្សាលើអ្នកដទៃទេ គឺក្រុមផ្សេងៗមកព្រួតវាយពួកគេ។ ប៉ុន្តែទោះបីជាជនទាំង៧នាក់នេះបានព្យាយាមនិយាយយកត្រូវរៀងៗខ្លួនយ៉ាងណាក៏ដោយ ក៏សមត្ថកិច្ចជំនាញបន្តកសាងសំណុំរឿងចាត់ការតាមច្បាប់ ។
យុវជនទាំង៧នាក់ដែលសមត្ថកិច្ចចាប់ឃាត់ខ្លួននេះមាន១-ឈ្មោះ ម៉ិច សុវណ្ណារ័ត្ន អាយុ១៧ឆ្នាំ ជាសិស្សវិទ្យាល័យឥន្ទ្រទេវី មានទីលំនៅក្នុងខណ្ឌទួលគោក និងជាអ្នកមានអាវុធខ្លីជាប់ខ្លួននៅក្នុងការបូបស្ពាយ (ស្ថិតក្នុងក្រុមទី១) ។ ២-ឈ្មោះ មាស សេងសុវណ្ណ អាយុ២១ឆ្នាំ មានទីលំនៅក្នុងភូមិត្នោតជ្រំ សង្កាត់បឹងទំពុន ខណ្ឌមានជ័យ ៣-ឈ្មោះ សោម ស៊ីម អាយុ២១ឆ្នាំ មានទីលំនៅក្នុងសង្កាត់ច្បារអំពៅទី២ ខណ្ឌមានជ័យ ៤-ឈ្មោះ ម៉ារ៉ា ដូសាណា អាយុ២១ឆ្នាំ ស្នាក់នៅផ្ទះលេខ២៨ ផ្លូវលេខ៣៦៨ សង្កាត់បឹងកេងកងទី១ ខណ្ឌចំការមន (៣នាក់នេះស្ថិតក្នុងក្រុមទី២) ។ ៥-ឈ្មោះ ឡាយ គឹមឡុង អាយុ១៨ឆ្នាំ មានទីលំនៅក្នុងភូមិត្នោតជ្រំ សង្កាត់បឹងទំពុន ៦-ឈ្មោះ ហែម ចាន់សុខា អាយុ១៩ឆ្នាំ ស្នាក់នៅផ្ទះលេខ២១E0 ផ្លូវលេខ២៧៨ សង្កាត់បឹងកេងកងទី៣ ខណ្ឌចំការមន និង៧-ឈ្មោះ បេង សម្បត្តិ អាយុ២០ឆ្នាំ ស្នាក់នៅក្នុងសង្កាត់បឹងកេងកងទី៣ ខណ្ឌចំការមន (៣នាក់នេះស្ថិតក្នុងក្រុមទី៣) ។
តាមចម្លើយរបស់ឈ្មោះ ម៉ិច សុវណ្ណារ័ត្ន ដែលជាអ្នកមានអាវុធខ្លីជាប់ខ្លួននិយាយថា កាំភ្លើងនេះខ្លួនបានពីមិត្តភក្តិផ្ញើទុក៤ថ្ងៃហើយ ។ នៅមុនពេលសមត្ថកិច្ចឃាត់ខ្លួន រូបគេនិងមិត្តភក្តិ៦នាក់ទៀតបាននាំគ្នាជិះម៉ូតូមកអង្គុយលេងលើបង់នៅសួនច្បារកោះពេជ្រ ខណៈនោះមានមនុស្សមួយក្រុមមានគ្នាប្រមាណ១០នាក់ ជិះម៉ូតូមកឈប់សួរនាំពីរបីម៉ាត់ ហើយយកដុំថ្មគប់ និងវាយលើពួកគេប្រាវតែម្តង មិត្តភក្តិ៥នាក់ផ្សេងទៀតបានរត់គេចខ្លួនបាត់អស់ ។ ចំណែកឯពីរក្រុមផ្សេងទៀតនិយាយដោះសាថា រូបគេអត់ដឹងរឿងអ្វីទាំងអស់ ។មានការកត់សម្គាល់ថា នៅសួនច្បារកោះពេជ្រតែងកើតមានអំពើហិង្សាបង្កឡើងដោយក្រុមក្មេងស្ទាវទាស់ទែងគ្នាស្ទើររាល់ថ្ងៃ ៕
ចែករំលែកព័តមាននេះ