ខេត្តកែប-កំពត ៖ នៅថ្ងៃបញ្ចប់យុទ្ធនាការឃោសនាបោះឆ្នោតក្រុមប្រឹក្សាឃុំ-សង្កាត់ នាថ្ងៃទី១ មិថុនា ២០១២ គេសង្កេតឃើញការដង្ហែក្បួនព្យុហយាត្រារបស់គណបក្សប្រជាជនកម្ពុជា មានសភាពផុលផុសក្នុងខេត្តទាំងពីរ កំពត-កែប ។
ដោយឡែកខេត្តកែបនៅព្រឹកថ្ងៃទី១ មិថុនា ២០១២នេះ គ្រប់ស្នាក់ការគណបក្សប្រជាជនសង្កាត់ឃុំ ស្រុក និងក្រុងផងដែរ បានរៀបចំបណ្តាពាក្យស្លោក ទង់ជាតិ ទង់បក្ស យ៉ាងអធិកអធម ។ ទិដ្ឋភាពជារួមគេឃើញវត្តមានថ្នាក់ដឹកនាំបក្សក្រុមការងារថ្នាក់កណ្តាលចុះជួយខេត្ត ស្រុក និងឃុំ សង្កាត់ រួមជាមួយសមាជិក សមា ជិកាគណបក្សប្រជាជនកម្ពុជាទូទាំងខេត្ត បានដង្ហែក្បួនព្យុះហយាត្រានៅគ្រប់ទីកន្លែង យ៉ាងក្លៀវក្លាអមដោយសំឡេងជ័យឃោសដ៏កងរំពងតាមបណ្តោយផ្លូវជាតិ ផ្លូវលំ ទូទាំងខេត្តកែបនាព្រឹកនោះ ។
វត្តមាននៃថ្នាក់ដឹកនាំដែលបានចូលរួមក្នុងក្បួនព្យុះហយាត្រានាព្រឹកនោះមានលោកចម ប្រសិទ្ធ ប្រធានគណៈកម្មាធិការគណបក្សក្រសួងពាណិជ្ជកម្ម និងជាសមាជិកគណៈកម្មា ធិការកណ្តាលចុះជួយខេត្តកែប លោកអាន ហេ អ្នកតំណាងរាស្ត្រមណ្ឌលខេត្តកែប លោកហាស់ សារ៉េត ប្រធានគណៈកម្មាធិការបក្សខេតត្តកែប លោកមាន សុភា ទីប្រឹក្សាក្រសួងពាណិជ្ជកម្ម និងជាប្រធានក្រុមការងារចុះជួយឃុំពងទឹក និងមន្ត្រីប្រធានក្រុមការងារចុះជួយភូមិ ឃុំ សង្កាត់ ទូទាំងខេត្តបានចូលរួមក្នុងក្បួនព្យុះហយាត្រា បញ្ចប់យុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៣ ដែលប្រព្រឹត្តទៅនៅថ្ងៃអាទិត្យទី៣ មិថុនា ២០១២ ។ ពុំមានបញ្ហាអ្វីធ្វើឱ្យរាំងស្ទះ ដល់ភាគីគណបក្សនយោបាយដូចគ្នាឡើយ ៕
ចែករំលែកព័តមាននេះ