ខេត្តកំពង់ចាម ៖ បុរសចំណាស់ជនជាតិជប៉ុនម្នាក់ឈ្មោះអ៊ុឈិ ថាក់អាគីអុ (UCHITA AKIO) អាយុ៦៥ឆ្នាំ មានប្រពន្ធខ្មែរស្នាក់នៅ ភូមិទី១៤ សង្កាត់កំពង់ចាម ក្រុងកំពង់ចាម ដោយសារតែមានជំងឺប្រចាំកាយព្យាបាលមិនជាក៏បង្អត់អាហារខ្លួនឯងរយៈពេល១ខែរហូតទាល់តែស្លាប់ចោលប្រពន្ធនិងកូន ។ ហេតុការណ៍នេះបានកើតឡើងនៅវេលាម៉ោង៩និង៣០នាទីយប់ថ្ងៃទី២៧ ឧសភា ២០១២ ហើយត្រូវកម្លាំងនគរបាលប៉ុស្តិ៍រដ្ឋបាលកំពង់ចាម និងនគរបាលក្រុងកំពង់ចាម ព្រមទាំងនគរបាលបច្ចេកទេសវិទ្យាសាស្រ្តចុះទៅពិនិត្យសពផងដែរ ។
តាមស្រ្តីឈ្មោះឃួន រស្មី អាយុ៣១ឆ្នាំ ត្រូវជាប្រពន្ធបុរសជប៉ុនរូបនេះបានរៀបរាប់ថា ចំណងដៃអាពាហ៍ពិពាហ៍ជាមួយបុរសជប៉ុនឈ្មោះអាគីអុ បានបន្សល់ទុកកូនប្រុសម្នាក់ឈ្មោះអ៊ុឈិ ថាក់ហ៊ិការុ អាយុ១០ឆ្នាំ រៀនថ្នាក់ទី៦«ក» នៅសាលាបឋមសិក្សាបឹងកុក ក្រុងកំពង់ចាម។ ស្ត្រីជាប្រពន្ធបានរំលឹកថា មានពេលមួយដោយសារតែជីវភាពរបស់នាងមានការខ្វះខាតក៏បានមកស៊ីឈ្មួលជាអ្នកបោសសម្អាតបន្ទប់នៅផ្ទះសំណាក់ត្រជាក់ចិត្តក្រុងកំពង់ចាមដើម្បីយកប្រាក់ផ្តត់ផ្គង់ជីវភាព ស្របពេលដែលបុរសជប៉ុនជាប្តីមកស្នាក់នៅផ្ទះសំណាក់នោះ ដោយចៃដន្យបានជួបនាងក៏ចាប់ចិត្តស្រឡាញ់លើរូបនាងតែម្តង ហើយបានចូលស្តីដណ្តឹងដល់ឪពុកម្តាយ នៅថ្ងៃទី២ កុម្ភៈ ២០០២ និងបានរៀបការទៅតាមប្រពៃណីដោយបានប្រព្រឹត្តទៅនៅផ្ទះសំណាក់នោះតែម្តង ។
ក្រោយមង្គលការពួកគាត់បានទៅចុះអេតាស៊ីវិលនៅថ្ងៃទី១៥ ខែតុលា ឆ្នាំ២០០២ ដោយមានលោកផ្លោក សុវណ្ណ ចៅសង្កាត់កំពង់ចាមជាសាក្សីផងដែរ ។ បុរសជាប្តីមានមុខរបរជាអ្នកថតរូបទោះបីជាប្តីដែលមានវ័យចំណាស់យ៉ាងណាក្តីនាងស្រឡាញ់ដោយស្មោះត្រង់ជាគូទៅអនាគតយូរអង្វែង ។
ក្នុងចំណងដែលអនុស្សាវរីយ៍នាងសម្រាលបានកូនប្រុសម្នាក់នៅពេលដែលកូនប្រុសនោះមានអាយុ១ខួប ប្តីនាងនាំទៅលេងនៅស្រុកកំណើតរបស់គាត់នៅក្រុងOSAKA ប្រទេសជប៉ុនបានជិត១ខែទើបត្រឡប់មកស្រុកខ្មែរវិញ ហើយនៅឆ្នាំ២០០៥ បាននាំម្តាយក្មេក ជនជាតិជប៉ុនមករស់នៅជាមួយម្តុំជិតវត្តជ្រោយថ្ម សង្កាត់បឹងកុក ក្រុងកំពង់ចាម ។ រហូតមកដល់ឆ្នាំ២០០៩ ម្តាយក្មេកដែលមានវ័យ៨៥ឆ្នាំ បានស្លាប់ដោយរោគាពាធ ហើយបានរៀបចំធ្វើបុណ្យទៅតាមប្រពៃណីខ្មែរ។ ប៉ុន្តែមួយរយៈពេល១ខែចុងក្រោយនេះប្តីនាងដោយសារតែមានជំងឺឫសដូងបាត មានសភាពធ្ងន់ធ្ងរ ទោះបីជានាងលួងលោមនាំទៅមន្ទីរពេទ្យដើម្បីព្យាបាលយ៉ាងណាក្តីក៏ប្តីមិនព្រមទៅដែរ ថែមទាំងបានបង្អត់អាហារខ្លួនឯងរយៈពេល១ខែដោយផឹកតែទឹកប៉ុណ្ណោះ ។
នៅយប់ថ្ងៃទី២៧ ឧសភា ប្តីរបស់នាងស្ថិតក្នុងសភាពឈឺធ្ងន់នាងក៏បានហៅចាស់ទុំ និមន្តព្រះសង្ឃ២អង្គ តាអាចារ្យមកសូត្រមន្តឲ្យ នៅពេលនោះប្តីបាននិយាយលេងជាមួយកូនប្រុសរហូតដាច់ខ្យល់ស្លាប់ ។
មុនពេលស្លាប់ប្តីនាងបានផ្តាំមិនឲ្យធ្វើបុណ្យទេ ប៉ុន្តែនាងនៅតែរៀបចំបុណ្យទៅតាមប្រពៃណី ដោយយកទៅបូជានៅវត្តបឹងកុក ។ ក្រោយពេលធ្វើបុណ្យចប់ទើបធ្វើដំណើរទៅរាជធានីភ្នំពេញដើម្បីរាយការណ៍ជូនស្ថានទូតជប៉ុនឲ្យបានដឹងពីមរណភាពរបស់ប្តី ។
លោកឃុត រុន នាយប៉ុស្តិ៍សង្កាត់កំពង់ចាម ឲ្យដឹងថា ក្នុងករណីស្លាប់នេះសមត្ថកិច្ចចុះទៅពិនិត្យដល់ផ្ទះស្នាក់នៅរបស់បុរសចំណាស់ជនជាតិជប៉ុនឈ្មោះអាគីអុ ឃើញថា ពិតជាបានស្លាប់ដោយសារជំងឺប្រាកដមែន ៕
ចែករំលែកព័តមាននេះ