កីឡាករបារាំងសេបាស្ទៀន ឡូអែបបានក្លាយជាម្ចាស់ពានជើងឯកនៃការប្រណាំងរថយន្តកម្មវិធី WRC Acropolis rally បន្ទាប់ពីគេបន្តយកឈ្នះដំណាក់កាលផ្តាច់ព្រ័ត្រកាលពីថ្ងៃអាទិត្យទី២៧ខែឧសភា ។ ការប្រណាំងក្នុងថ្ងៃទី៣នេះបញ្ចប់នៅទីក្រុង Loutrakiប្រទេសក្រិច។
ឡូអែបបានបើករថយន្ត Citroenរបស់ខ្លួនចូលដល់ទីព្រ័ត្រក្នុងថិរវេលា៤ម៉ោង៤២នាទីនិង០៣.៣វិនាទីយកឈ្នះកីឡាករមិត្តរួមក្រុមសញ្ជាតិហ្វាំងឡង់មីកកូ ហ៊ីវ៉ូណិនដែលប្រើពេលអស់៤ម៉ោង៤២នាទីនិង៤៣.៣វិនាទីយឺតជាងឡូអែប ៤០.០០វិនាទី។
កីឡាករន័រវេស Mads Ostbergបើកបរឱ្យក្រុម Adapta Fordបានបញ្ចប់ការប្រណាំងក្នុងចំណាត់ថ្នាក់លេខ៤ក្រោយពីបានប្រើពេលអស់៤ម៉ោង៤៨នាទីនិង១៩.៧វិនាទី ពោលគឺយឺតជាងឡូអែប៦នាទីនិង១៦.៤វិនាទីខណៈ ចំណាត់ថ្នាក់លេខ៣បានទៅលើកីឡាករហ្វាំងឡង់ Jari-Matti Latvalaដែលបានប្រើអស់ថិរវេលា ៤ម៉ោង ៤៥នាទីនិង០៨.១វិនាទី ។
ចំណែកកីឡាករឆែក Martin Prokopបើកបរឱ្យក្រុម Czech Fordបញ្ចប់ការប្រណាំងក្នុងលំដាប់ទី៥បន្ទាប់ពីបានប្រើពេលអស់៤ម៉ោង៤៩នាទីនិង៤៩.៨វិនាទី ខណៈកីឡាករស៊ុយអែត ភីធ័រ សូលបឺកបញ្ចប់ការប្រណាំងនៅក្រៅចំណាត់ថ្នាក់បន្ទាប់ពីកង់រថយន្តរបស់គេមានបញ្ហា។ សម្រាប់កីឡាករឡូអែបនេះគឺពានលើកទី៧១ហើយនៅក្នុងអាជីព ។
ម្ចាស់ជើងឯកពិភពលោក៨ជំនាន់រូបនេះនិយាយថា៖«ការប្រណាំងក្នុងថ្ងៃនេះ វាមិនសូវជាពិបាកដូចជាថ្ងៃមុនៗទេ។ ខ្ញុំសប្បាយចិត្តណាស់ដែលដណ្តើមបានជ័យជម្នះជាថ្មីម្តងទៀត។ នេះជាជ័យជម្នះដែលមិនអាចកាត់ថ្លៃបានដ្បិតនេះជាលើកទី៧១ក្នុងអាជីព »។
កីឡាករជើងខ្លាំងបារាំងម្នាក់ទៀត សេបាស្ទៀន អូហ្ស៊ីយ៉េបញ្ចប់ការប្រណាំងក្នុងលំដាប់ទី៧។ កីឡាកររូបនេះបញ្ជាក់ថា គូប្រជែងដ៏ខ្លាំងរបស់គេគឺកីឡាករសេបាស្ទៀន ឡូអែប។ ទោះជាយ៉ាងណាក្តី គេអាចមិនមែនជាគូប្រជែងរបស់ឡូអែបទៀតទេ ដ្បិតការប្រកួត៦លើកមកនេះគេមិនដែលទទួលបានលទ្ធផលល្អឡើយ។
ឆ្លងកាត់ការប្រណាំងអស់ចំនួន ៦ជុំមកនេះ ឡូអែបសន្សំពិន្ទុបានច្រើនជាងគេស្ថិតនៅលំដាប់កំពូលតារាងដដែល។ ពេលនេះគេមាន១១៩ពិន្ទុនាំមុខកីឡាករហ្វាំងឡង់ហ៊ីវ៉ូណិនស្ថិតនៅលំដាប់ទី២មាន៨៩ពិន្ទុ។ ឯកីឡាករន័រវេស Mads Ostbergស្ថិតនៅលំដាប់ទី៣ក្រោយពីសន្សំបាន៨០ពិន្ទុនាំមុខកីឡាករស៊ុយអែត សូលបឺកដែលមាន៧៣ពិន្ទុ។
ការប្រណាំងរថយន្តប្រភេទរែលលីសម្រាប់ឆ្នាំ២០១២នេះមាន១៣ជុំ។ ជុំទី១ចាប់ផ្តើមកាលពីថ្ងៃទី១៧ខែមករាដើមឆ្នាំនៅប្រទេសបារាំង និងជុំចុងក្រោយបំផុតនឹងធ្វើនៅថ្ងៃទី០៨ដល់ទី១១ខែវិច្ឆិកាខាងមុខនៅប្រទេសអេស្ប៉ាញ ។ ដោយឡែកការប្រណាំងនៅប្រទេសក្រិចលើកនេះគឺស្ថិតនៅក្នុងជុំទី៦ ៕
ចែករំលែកព័តមាននេះ