បិទការប្រកួតកីឡាវាយកូនឃ្លីលើតុផ្នែកយុវជនដណ្តើមពានរង្វាន់ក្រុមហ៊ុន រ័ត្ន សុខន អ៊ិនខបភើរេសិនឆ្នាំ2012
បញ្ចូលអត្ថបទ ៖ ស្រីណា កោះ
ថ្ងៃចន្ទ ទី២៨ ខែឧសភា ឆ្នាំ២០១២ ម៉ោង ១៦:២៥
កោះសន្តិភាព
លោកឧកញ៉ា រ័ត្ន សុខន ចែករង្វាន់ដល់កីឡាករដែលទទួលជ័យលាភីក្នុងការប្រកួតវាយកូនឃ្លីលើតុ
រាជធានីភ្នំពេញ ៖ ការប្រកួតកីឡាវាយកូនឃ្លីលើតុដែលបានប្រព្រឹត្តទៅកាលពីថ្ងៃទី២៤ ឧសភា រហូតមកនោះ បានបញ្ចប់ទៅយ៉ាងរលូននៅត្រឹមថ្ងៃទី២៧ ឧសភា ហើយនៅក្នុងឱកាសបិទការប្រកួតនេះផងដែរ ក៏មានការប្រកួតជាលក្ខណៈមិត្តភាពអន្តរជាតិ រវាងក្រុមយុវជនទីក្រុងហូជីមិញ និងក្រុមយុវជនរាជធានីភ្នំពេញ ដើម្បីដកស្រង់បច្ចេកទេសពីគ្នាទៅវិញទៅមក ។
រីឯលទ្ធផលបច្ចេកទេសដែលទទួលបានសម្រាប់ការប្រកួតពានរង្វាន់ក្រុមហ៊ុនរ័ត្នសុខន វិញនោះ លើផ្នែកយុវនារី ចំណាត់ថ្នាក់លេខ១ បានទៅលើកីឡាការិនី ហ៊ឹម សោភ័ណ្ឌ មកពីក្លឹប អូឡាំពិក ។ លេខ២ បានទៅលើកីឡាការិនី ចាន់ ណាវី មកពីក្លឹបសីុធីស្ព័ត ។ លេខ៣បានទៅលើ កីឡាការិនី រេ៉ត សំណាង មកពីក្លឹបអង្គការជំនុំទួលគោកបរិស័ទ និងលេខ៣ស្ទួន បានទៅលើកីឡាការិនី សុក មេសា មកពីក្លឹបអង្គការជំនុំទួលគោកបរិស័ទ ។
ផ្នែកយុវជនឯកត្តជន អាយុក្រោម១៥ឆ្នាំ លេខ១បានទៅលើកីឡាករ សឺន តុលា មកពីសាលារៀនចិនក្វាងសៀវ លេខ២ បានទៅលើកីឡាករ អ៊ុក ចាន់រតនៈ មកពីក្លឹបស៊ីធីស័្ពត លេខ៣ បានទៅលើកីឡាករ ទៀ តិចអួយ មកពីសាលារៀនទួនហ្វា និងលេខ៣ស្ទួន បានទៅលើកីឡាករតាំង ហេង មកពីសាលារៀនទួនហ្វា ។ ផ្នែកឯកត្តជន អាយុក្រោម១៨ឆ្នាំ លេខ១ បានទៅលើ កីឡាករ គឹម សុវណ្ណ មកពីសាលារៀនទួនហ្វា លេខ២បានទៅលើកីឡាករ អុឹង ស្រូ៊យហួរ មកពីសាលារៀនទួនហ្វា លេខ៣ បានទៅលើកីឡាករឈួរ ឈីឃី មកពីក្លឹបស៊ីធីស្ព័ត និងលេខ៣ស្ទួនបានទៅលើកីឡាករ អៀ យ៉េកឃៀង មកពីក្លឹបស៊ីធីស្ព័ត។
ចំពោះលទ្ធផលសម្រាប់ការប្រកួតជាក្រុម ផ្នែកយុវជនអាយុក្រោម១៥ឆ្នាំ លេខ១ បានទៅក្រុមមកពីក្លឹបស៊ីធីស្ព័ត លេខ២ បានទៅក្រុមមកពីសាលារៀនក្វាងសៀវ លេខ៣បានទៅក្រុមមកពីសាលារៀនទួនហ្វា និងលេខ៣ស្ទួន បានទៅក្រុមមកពីសាលារៀនអន្តរទ្វីបអាេមរិកាំង ។
លោកឧកញ៉ា រ័ត្ន សុខន នាយកក្រុមហ៊ុន រ័ត្នសុខន ខូអិលធីឌីគ្រុប អនុប្រធានសហព័ន្ធកីឡាវាយកូនឃ្លីលើតុ តំបន់អាស៊ីអាគ្នេយ៍ និងជាប្រធានសហព័ន្ធកីឡាវាយកូនឃ្លីលើតុ កម្ពុជាទៀតផងនោះ បានមានប្រសាសន៍ថា ព្រឹត្តិការណ៍នៃការប្រកួតថ្ងៃនេះ ធ្វើឡើងក្នុងគោលបំណងសំខាន់គឺ ដើម្បីអបអរសាទរពិធីបុណ្យចម្រើនជន្មាយុគម្រប់៧៨ ឈានចូល៧៩ឆ្នាំ របស់សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា ហើយក៏ជាការបង្ហាញនូវការប្រកួតដកស្រង់បច្ចេកទេសពីគ្នាទៅវិញទៅមក រវាងយុវជនមកពីរាជធានីភ្នំេពញ និងយុវជនទីក្រុងហូជីមិញនៃប្រទេសវៀតណាមផងដែរ ។
លោកឧកញ៉ា រ័ត្ន សុខន ដែលជាទីប្រឹក្សាសម្តេចអគ្គមហាពញាចក្រី ហេង សំរិន ក៏បានគូសបញ្ជាក់បន្ថែមទៀតថា ការប្រកួតថ្ងៃនេះគឺជាការជំរុញលើកទឹកចិត្តបន្ថែមដល់យុវជនកម្ពុជា ដើម្បីឱ្យពួកគេរឹតតែមានការស្រឡាញ់និងចូលចិត្តចូលរួមហ្វឹកហាត់ឱ្យបានសស្រាក់សស្រាំថែមទៀត ចំពោះកីឡាវាយកូនឃ្លីលើតុនេះ ដើម្បីឈានទៅដណ្តើមជ័យជម្នះ រាល់ការប្រកួតនៅលើឆាកអន្តរជាតិ ។
បច្ចុប្បន្ន លោកកំពុងតែមានការយកចិត្តទុកដាក់លើកកម្ពស់វិស័យកីឡាវាយកូនឃ្លីលើតុនៅកម្ពុជា ហើយលោកបានចំណាយថវិកាផ្ទាល់ខ្លួនយ៉ាងច្រើន ទាំងពេលនេះក៏ដូចជាព្រឹត្តិការណ៍នៃការប្រកួតផ្សេងៗ និងទាំងការទៅហ្វឹកហាត់នៅបរទេសផងដែរ៕
