អត្តពលិករត់ប្រណាំងរបស់អេត្យូពី Haile Gebrselassieបានយកឈ្នះជើងឯកកម្មវិធី Great Manchester Runនៅប្រទេសអង់គ្លេសកាលពីថ្ងៃអាទិត្យ ទី២០ ឧសភា កន្លងមកនេះ។ អត្តពលិកវ័យ ៣៩ឆ្នាំរូបនេះដណ្តើមបានជ័យជម្នះជាលើកទី៥ដោយប្រើអស់ថិរវេលា ២៧នាទីនិង៣៩វិនាទីគឺជាពេលវេលាដែលលឿនជាងគេបំផុតនៃការរត់ចម្ងាយ១០គីឡូម៉ែត្រនៅក្នុងឆ្នាំនេះ។
Haile Gebrselassieពេលនេះបានផ្តោតការយកចិត្តទុកដាក់ទៅលើការចូលរួមជាលើកទី៥ក្នុងព្រឹត្តិការណ៍អូឡាំពិករដូវក្តៅ។ កាលពីប្រកួតរត់ម៉ារ៉ាតុងកម្មវិធី London 2012 Haile Gebrselassieបានខកខានដណ្តើមបានចំណាត់ថ្នាក់ល្អ។ ប៉ុន្តែទោះជាយ៉ាងណាក្តី គេបានផ្តោតការប្រកួតលើវិញ្ញាសារត់ចម្ងាយ១០គីឡូម៉ែត្រក្នុងព្រឹត្តិការណ៍អូឡាំពិករដូវក្តៅនាទីក្រុងឡុងខែកក្កដាខាងមុខនេះ។
នៅថ្ងៃអាទិត្យសប្តាហ៍ក្រោយ Haile Gebrselassieនឹងទៅចូលរួមប្រកួតនៅទីក្រុង Hengelo ប្រទេសហូឡង់។ ជើងឯកពិភពលោក៤ដងរត់ចម្ងាយ១០គីឡូម៉ែត្ររូបនេះបានថ្លែងថា៖«ថ្ងៃនេះខ្ញុំសប្បាយចិត្តខ្លាំងណាស់។ គ្រប់យ៉ាងបានដំណើរការទៅយ៉ាងរលូន។ ការរត់បានលឿនដូចជាពេលនេះមិនធ្វើឱ្យខ្ញុំភ្ញាក់ផ្អើលនោះទេ។ ខ្ញុំចង់រត់ឱ្យលឿនជាងនេះដោយប្រើពេលក្រោម២៧នាទី»។
Gebrselassieដែលជាម្ចាស់ជើងឯកអូឡាំពិក២លើកផងនោះបានបន្តថា៖«យោងតាមការហ្វឹកហាត់នៅឆ្នាំនេះ ខ្ញុំមានអារម្មណ៍ថានៅលើផ្លូវរត់លើទីលាន ខ្ញុំពិតជាអាចរត់បានលឿនជាងពេលមុនៗ។ ខ្ញុំចង់រត់ដោយប្រើពេលក្រោម២៧នាទី ។ នោះគឺជាអ្វីដែលខ្ញុំកំពុងគិត។ បើរត់នៅលើផ្លូវថ្នល់លឿនបានប៉ុនហ្នឹងហើយ ហេតុអ្វីនៅលើទីលានរត់ប្រណាំងខ្ញុំមិនអាចធ្វើបានល្អជាងនេះនោះ? »។
ចំណែកលទ្ធផលផ្នែកនារីវិញ អត្តពលិកកេនយ៉ា នាង Linet Masaiគឺជាអ្នកដណ្តើមបានជ័យជម្នះ។ Masaiដែលអតីតជាជើងឯកពិភពលោករត់ចម្ងាយ ១០.០០០ម៉ែត្រប្រើអស់ថិរវេលា ៣១នាទីនិង៣៥វិនាទី ៕
ចែករំលែកព័តមាននេះ