ទោះបីជាមិនអាចប្រជែងយកតំណែងជើងឯកក្របខណ្ឌអ៊ីតាលីស៊េរី A បានក៏ដោយ ក៏ក្រុម Napoli មិនបញ្ចប់រដូវកាលដោយដៃទទេសោះឡើយ ពោលគឺគេបានបំបាក់ក្រុមគ្រងតំណែងជើងឯកអ៊ីតាលីស៊េរី A Juventus ដោយលទ្ធផល 2-0 កាលពីរាត្រីថ្ងៃអាទិត្យទី២០ ឧសភា ឆ្នាំ២០១២ នៅពហុកីឡដ្ឋាន Stadio Olimpico ក្នុងទីក្រុងរ៉ូម មានឱកាសលើកពានអ៊ីតាលីខាប់ មួយដែរ។
នេះគឺជាការលើកពានរង្វាន់អ៊ីតាលីខាប់លើកទី១របស់ក្លឹប Napoli ដែលបានទទ្ទឹងរង់ចាំអស់រយៈពេល២៥ឆ្នាំមកហើយ ។
ក្លឹបបាល់ទាត់ Napoli ធ្លាប់ទទួលបានពានរង្វាន់ក្របខណ្ឌអីុតាលីស៊េរី A ចុងក្រោយនៅឆ្នាំ១៩៩០ និងពានរង្វាន់អ៊ីតាលីខាប់ចុងក្រោយនៅឆ្នាំ១៩៨៧ ។ ការយកឈ្នះ 2-0 របស់ក្លឹប Napoli បានធ្វើឱ្យក្លឹប Juventus រងការបរាជ័យលើកទី១នៅក្នុងរដូវកាលនេះ បន្ទាប់ពីគេលេងឈ្នះ២០ប្រកួត និងស្មើ ១៦ប្រកួត ។
នៅក្នុងដំណើរការប្រកួតតង់ទី១ ទោះបីជាមានការសម្រុកគ្នាទៅវិញទៅមករវាងក្រុមទាំងពីរបែបណាក្តី ក៏ពួកគេមិនអាចរកគ្រាប់បាល់បញ្ចូលទីបានឡើយ ធ្វើឱ្យចប់ការប្រកួតតង់ទី១ ទទួលបានលទ្ធផលស្មើ 0-0 ។ចូលមកដល់តង់ទី២ ក្រុម Napoli ទទួលបានបាល់សំណាងប៉េណាល់ទី១គ្រាប់ បន្ទាប់ពីកីឡាករចាំទី Marco Storari ប៉ះទង្គិចជាមួយកីឡាករ Lavezzi ក្លឹប Lazio ធ្វើឱ្យកីឡាករ Cavani មានឱកាសស៊ុតបាល់បញ្ចូលទីបាន១គ្រាប់នាំមុខ 1-0 ។ ចូលមកដល់នាទីទី៨៣ កីឡាករ Hamsik បានស៊ុតបាល់បញ្ចូលទីបាន១គ្រាប់បន្ថែមទៀត ហើយបានរក្សាលទ្ធផល 2-0 នេះរហូតដល់ចប់ការប្រកួត៩០នាទី មានឱកាសលើកពាន ។ ចំណែកឯក្រុម Juventus ក៏មិនមានការសោកស្តាយប៉ុន្មានដែរ ដោយសារគេទទួលបានពានរង្វាន់អីុតាលីស៊េរី A មួយរួចហើយ៕
ចែករំលែកព័តមាននេះ