ខេត្តស្វាយរៀង ៖ កាលពីព្រឹកថ្ងៃទី២០ ឧសភា នៅវិមានតម្កល់អដ្ឋិធាតុអ្នករងគ្រោះក្នុងរបបប្រល័យពូជសាសាន៍ប៉ុល ពត នៅភូមិតាណរ សង្កាត់ស្វាយតឿ ក្រុងស្វាយរៀង បានរៀបចំពិធីគោរពវិញ្ញណក្ខន្ធប្រជាជនកម្ពុជា ដែលបានស្លាប់ដោយរបបប៉ុល ពត ។ ពិធីនេះប្រព្រឹត្តទៅក្រោមអធិបតីភាពលោក ជៀង អំ ប្រធានគណៈកម្មាធិការគណបក្សខេត្ត ព្រមទាំងលោក លោកស្រី និងប្រជាពលរដ្ឋយ៉ាងច្រើនកុះករ ។
ក្រោយពេលការសំណេះសំណាលរបស់លោក ជៀង អំ រួចមក ក្រុមសិល្បៈមន្ទីរវប្បធម៌ និងវិចិត្រសិល្បៈខេត្ត បានសម្តែងឈុតឆាកក្នុងរបបអាវខ្មៅដែលបានបង្ខំឱ្យប្រជាពលរដ្ឋខ្មែរធ្វើការហួសកម្លាំង បង្អត់អាហារ ការធ្វើទារុណកម្មយ៉ាងសាហាវ ហើយកាប់សម្លាប់ និងវាយដោយគល់ឫស្សី ត្បូងចប និងស្វាយកាំភ្លើង មើលទៅគួរឱ្យឈឺចាប់ក្រៃលែងធ្វើឱ្យអ្នកចូលរួមក្នុងពិធីនោះមានការរន្ធត់ចិត្តស្រក់ទឹកភែ្នកគ្រប់ៗគ្នា ។ សូម្បីតែក្មេងដែលកើតមិនទាន់របបវាលពិឃាដនោះក៏ទប់ទឹកភ្នែកមិនបានដែរ ខណៈឃើញការសម្តែងពីអំពើដ៏ឃោរឃៅ និងការធ្វើទារុណកម្មដល់តួជនរងគ្រោះ ជាពិសេសការទួញសោកសង្រេងរបស់កុមារីដែលទ្រហោយំ ស្រែកអង្រួនឪពុកម្តាយដែលដេកស្លាប់ដោយពួកប៉ុល ពត សម្លាប់ ។
ក្នុងឱកាសនោះ លោកឧត្តមសេនីយ៍ត្រី ប្រាជ្ញ រឹម ស្នងការនគរបាលខេត្តបានទៅដាក់កម្រងផ្កាអុជធូបទៀន គោរពវិញ្ញាណក្ខន្ធអ្នករងគ្រោះបានមានប្រសាសន៍ទាំងក្តុកក្តួលថា ទីទួលតម្កល់អដ្ឋិធាតុតាណរនេះ ពួកប៉ុលពតបានចាប់រូបលោក និងអ្នកទោស២៦នាក់ មកពីស្រុកចន្ទ្រា ព្រមទាំងប្រជាជនប្រមាណ ១.០០០ នាក់ យកមកឃុំខ្លួននៅទីនេះ ហើយបានកាប់សម្លាប់យ៉ាងឃោរឃៅ ។ ប៉ុន្តែរូបលោកមានសំណាងល្អ ត្រូវពួកខ្មែរក្រហមបញ្ជូនយកទៅដាក់ទោសនៅបឹងគ្រៀលក៏ត្រូវរណសិរ្សសាមគ្គីសង្គ្រោះជាតិកម្ពុជារំដោះឱ្យរួចផុតពីការស្លាប់ ។
ពិធីនោះ ក៏មានការរាប់បាត្រប្រគេនព្រះសង្ឃចំនួន៧៩អង្គ ដើម្បីឧទ្ទិសកុសលផលបុណ្យជូនដល់វិញ្ញាណក្ខន្ធអ្នករងគ្រោះរាប់លាននាក់ ដែលស្លាប់យ៉ាងអយុតិ្តធម៌ ៕
ចែករំលែកព័តមាននេះ