រាជធានីភ្នំពេញ ៖ នៅព្រឹកថ្ងៃទី១៨ ឧសភា ជាថ្ងៃដំបូងនៃការចាប់ផ្តើមឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៣ គណបក្សប្រជាជនកម្ពុជារាជធានីភ្នំពេញ បានបើកយុទ្ធនាការរបស់ខ្លួនជាទ្រង់ទ្រាយធំ ដើម្បីស្វែងរកសំឡេងគាំទ្រ ។
តាមព័ត៌មានឱ្យដឹងថា នៅវេលាម៉ោង៦ព្រឹក សមាជិក សមាជិកាបក្សទៅតាមខណ្ឌទាំង៩បានមកជួបប្រមូលផ្តុំគ្នានៅ កោះពេជ្រ ហើយបានធ្វើមិទ្ទីងមួយក្រោមអធិបតីភាពលោកកែប ជុតិមា ប្រធានគណៈកម្មាធិការបក្សប្រជាជនកម្ពុជារាជធានីភ្នំពេញ និងមានការចូលរួមពីអស់លោក លោកស្រី ជាក្រុមការងារ ហើយនៅវេលាម៉ោង៨ព្រឹកគណៈកម្មាធិការបក្សតាមខណ្ឌនីមួយៗបានដឹកនាំក្បួនដង្ហែនៅតាមមូលដ្ឋានរបស់ខ្លួនដោយក្បូននីមួយៗបានតុបតែងស្លាកសញ្ញា និងពាក្យស្លោកមេក្រូស្រែកឃោសនាយ៉ាងសប្បាយរីករាយ ហើយនៅតាមដងផ្លូវនានាមានសមាជិក សមាជិការឈរអបអរយ៉ាងច្រើនកុះករ ។
ដោយឡែកគណបក្សប្រជាជនកម្ពុជាខណ្ឌឫស្សីកែវ បន្ទាប់ពីជួបជុំគ្នានៅកោះពេជ្របានដង្ហែជាក្បួនទៅតាមមូលដ្ឋានរបស់ខ្លួន ដោយមានសមាជិក សមាជិការបក្សចូលរួមចំនួនប្រមាណ១.៦០០នាក់ ដែលក្នុងនោះមានរថយន្តចំនួន៦០គ្រឿង និងម៉ូតូចំនួន៥០០គ្រឿង ដឹកនាំ ដោយលោកឃ្លាំង ហួត ប្រធានគណៈកម្មាធិការបក្សខណ្ឌឫស្សីកែវ លោកស្រីទូត សារ៉ុម អនុប្រធានក្រុមការងារចុះជួយខណ្ឌឫស្សីកែវ និងលោកឧកញ៉ា អូស្មាន ហាស្សាន់ អនុប្រធានក្រុមការងារចុះជួយខណ្ឌឫស្សីកែវ ព្រមទាំងក្រុមការងារជាច្រើនរូបទៀត ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ