កីឡាករលំដាប់ទី៤ពិភពលោកសញ្ជាតិអង់គ្លេសអ៊ែនឌី មូរ៉េកាលពីថ្ងៃទី១៧ឧសភាបានទទួលរងនូវភាពអាម៉ាស់យ៉ាងខ្លាំងបន្ទាប់ពីរូបគេធ្លាក់ចេញពីជុំទី៣កម្មវិធី Internazionali BNL d’Italia។ ការប្រកួតក្នុងជុំទី៣នោះរៀបចំធ្វើនៅទីក្រុងរ៉ូម ប្រទេសអ៊ីតាលី។
មូរ៉េបានបរាជ័យក្រោមថ្វីដៃកីឡាករបារាំង Richard Gasquet ក្នុងលទ្ធផល៦-៧,៦-៣និង៦-២ ។ បរាជ័យលើកនេះរូបគេអះអាងថា គឺមកពីរបួសឆ្អឹងខ្នងដែលកើតមានតាំងពីខែធ្នូឆ្នាំទៅមិញមកម្ល៉េះ។ គេនិយាយថា ៖«ខ្ញុំមិនចង់និយាយពីជំងឺនិងការព្យាបាលដែលខ្ញុំបានទទួលកន្លងមកទេ ប៉ុន្តែខ្ញុំសូមប្រាប់ថា របួសនេះបានកើតមានតាំងពីខែធ្នូមកម៉្លេះ»។ មូរ៉េបានបន្តថា ការប្រកួតជាប់គ្នារដឹកនាំឱ្យរូបគេគ្មានពេលវេលាឈប់សម្រាកដើម្បីព្យាបាលរបួសឱ្យជាដាច់។
កាលពីឆ្នាំទៅមិញមូរ៉េធ្វើបានល្អជាងលើកនេះដោយបានឆ្លងចូលដល់វគ្គពាក់កណ្តាលផ្តាច់ព្រ័ត្រ ។ ការប្រកួតក្នុងជុំទី២កាលពីថ្ងៃទី១៥ ឧសភា គេបានយកឈ្នះគូប្រកួតយ៉ាងត្រដាបត្រដួស ជាពិសេសក្នុងសិតទី២ដែលគេបានចាញ់ពិន្ទុ Nalbandian ទាំងស្រុង។ មូរ៉េបានប្រើពេលអស់២ម៉ោងនិង៣៧នាទីទើបអាចបញ្ចប់ការប្រកួតបាន។
សម្រាប់កីឡាករ Richard Gasquetវិញបើទោះជាជ័យជម្នះរបស់គេកើតឡើងចំពេលគូប្រកួតខ្លួនមានរបួសក៏ដោយ ប៉ុន្តែគេក៏នៅតែសប្បាយចិត្តចំពោះជោគជ័យនេះដែរ។ នៅវគ្គបន្ទាប់គេនឹងប៉ះជាមួយកីឡាករអេស្ប៉ាញ David Ferrerដែលបានបំបាក់កីឡាករមិត្តរួមជាតិបារាំងរបស់គេ Gilles Simonក្នុងលទ្ធផល ៦-០និង៧-៦ ។
កីឡាករលំដាប់ទី១ពិភពលោក ណូវ៉ាក់ យ៉ូកូវិចមិនបានជួបនឹងសំណាងអាក្រក់ដូចជាមូរ៉េទេ។ គេបានឡើងទៅវគ្គបន្តក្នុងថ្ងៃជាមួយគ្នានោះក្រោយពីបានយកឈ្នះកីឡាករអាហ្សង់ទីន Juan Monacoក្នុងលទ្ធផល៤-៦,៦-២និង ៦-៣។
ឯលទ្ធផលនៃការប្រកួតគូផ្សេងទៀតមានដូចជា កីឡាករអេស្ប៉ាញរ៉ាហ្វាអែល ណាដាល់ យកឈ្នះកីឡាករមិត្តរួមជាតិខ្លួន Marcel Granollersក្នុងលទ្ធផល ៦-១និង៦-១ខណៈកីឡាករបារាំងJo-Wilfried Tsongaយកឈ្នះកីឡាករអាហ្សង់ទីន Juan Martin del Potroក្នុងលទ្ធផល ៦-៤និង៦-១។ នៅវគ្គបន្ទាប់ណាដាល់នឹងជួបប្រកួតជាមួយកីឡាករឆែកតូម៉ាស់ បឺឌីដែលបានយកឈ្នះកីឡាករអេស្ប៉ាញ Nicolas Almagroក្នុងលទ្ធផល ៧-៦និង៦-៣ ។ កីឡាករលំដាប់ទី២ពិភពលោករ៉ូជើ ហ្វេដឺរ័រក៏បានឡើងទៅវគ្គបន្តជាមួយណាដាល់ផងដែរក្រោយពីបានយកឈ្នះកីឡាករអេស្ប៉ាញ Juan Carlos Ferreroក្នុងលទ្ធផល ៦-២,៥-៧និង ៦-១ ។
ចំណែកលទ្ធផលនៃការប្រកួតផ្នែកនារីវិញ កីឡាការិនីការពារជើងឯកម៉ារីយ៉ា សារ៉ាប៉ូវ៉ាបានយកឈ្នះកីឡាការិនស៊ែប៊ីអាណា អុីវ៉ាណូវិច ក្នុងលទ្ធផល៧-៦និង៦-៣ ។ ស្របពេលជាមួយគ្នានោះដែរ កីឡាការិនីឆែកប៉េត្រា គ្វីតូវ៉ាបានយកឈ្នះកីឡាការិនី Sorana Cirsteaក្នុងលទ្ធផល ៦-២,៥-៧និង៦-២ ។ ថ្លែងប្រាប់វិទ្យុ BBC គ្វីតូវ៉ាបញ្ជាក់ថា៖«ពេលនេះ ខ្ញុំសប្បាយចិត្តដែលបានឈ្នះការប្រកួតនេះ។ ខ្ញុំនៅត្រូវការពេលច្រើនទៀតដើម្បីរៀនសូត្រពីបច្ចេកទេសប្រកួតនៅលើតារាងដីឥដ្ឋ។ យើងមិនអាចឈរនៅចម្ងាយ២ម៉ែត្រពីគំនូសខ្សែវាយសឺវីសនោះទេ»។
នាងស៊េរីណា វីលៀមដែលជាជើងឯក Madrid Openបានឆ្លងផុតជុំទី៣ផងដែរបន្ទាប់ពីបានយកឈ្នះនាង Anabel Medina Garriguesក្នុងលទ្ធផល ៦-៣និង៦-១ ។ សម្រាប់ស៊េរីណា នេះគឺជាការត្រៀមខ្លួនយ៉ាងល្អមួយដើម្បីចូលរួមក្នុងក្របខណ្ឌធំ French Open។ នាងបាននិយាយថា៖«គិតដល់ការប្រកួតនោះ ខ្ញុំពិតជាភ័យ តែយ៉ាងណា ខ្ញុំបានប្រឹងប្រែងហ្វឹកហាត់ខ្លាំងណាស់។ ជាក់ស្តែង ការប្រកួតក្នុងថ្ងៃនេះខ្ញុំរត់ទៅមកបានលឿន។លទ្ធផលលើកនេះពិតជាធ្វើឱ្យខ្ញុំមានអារម្មណ៍ល្អខ្លាំងណាស់។ ខ្ញុំហាក់មិននឿយហត់ទាល់តែសោះ»៕
ចែករំលែកព័តមាននេះ