កីឡាករគ្រីស្ទៀណូ រ៉ូណាល់ដូ ខ្សែបម្រើដែលមានតម្លៃខ្ពស់របស់ក្លឹបReal Midrid កំពុងក្លាយជាជើងឯកក្នុងក្របខណ្ឌបាល់ទាត់La Liga អេស្ប៉ាញក្នុងរដូវកាលនេះ បាននាំកូនប្រុសអាយុ២២ខែជិះរថយន្តឡាំប៊ឺហ្គីនី យ៉ាងរំភើយមិនខ្វល់ពីបញ្ហាអ្វីទាំងអស់ ។
រ៉ូណាល់ដូ នាំកូនប្រុសដែលចាប់កំណើតជាមួយស្ត្រីអនាមិកម្នាក់ដោយអង្គុយលើភ្លៅរួមទាំងបើកបររថយន្តឡាំប៊ឺហ្គីនីដែលមានតម្លៃប្រហែល២០០.០០០ផោន នៅតាមដងផ្លូវក្នុងទីក្រុងម៉ាឌ្រីត ប្រទេសអេស្ប៉ាញ ។ ហេតុការណ៍ខាងលើបានធ្វើឱ្យមនុស្សដែលប្រទះឃើញមានក្តីបារម្ភលើអាយុជីវិតរបស់គេ ព្រោះរថយន្តមួយគ្រឿងនេះមានថាមពលខ្លាំងអាចបើកបរបានក្នុងល្បឿន២១៧ម៉ៃល៍ ឬប្រហែល៣២០គីឡូម៉ែត្រ ក្នុងមួយម៉ោង ។
ប្រភពព័ត៌មាន«ដឹភីផល» បញ្ជាក់ថា ទង្វើបែបនេះ រ៉ូណាល់ដូ គ្រាន់តែចង់បង្ហាញពីក្តីស្រឡាញ់កូន និងរថយន្តរបស់គេ ប៉ុណ្ណោះ។ កាលពីខែមករាកន្លងមក កីឡាកររ៉ូណាល់ដូ បានបើករថយន្តហ្វើរ៉ារី (Ferrari) ជួបគ្រោះថ្នាក់ម្តងរួចមកហើយ តែរថយន្តឡាំប៊ឺហ្គីនី ថ្មីសន្លាងមួយគ្រឿងនេះមិនទាន់ជួបសំណាងអាក្រក់នៅឡើយទេ ៕
ចែករំលែកព័តមាននេះ