កាលពីថ្ងៃទី១៦ ឧសភា កន្លងមក សារព័ត៌មាន«ឆាយណា ដេលី»បានចុះផ្សាយព័ត៌មានគួរឱ្យរន្ធត់មួយនៅពេលមន្ត្រីនៃមន្ទីរសុខាភិបាលតំបន់ជាំងស៊ី ប្រទះឃើញត្រចៀកជ្រូកមានដាក់សារធាតុ«ជេឡាទីន» ដោយលាយផ្សំនឹងសារធាតុសូដ្យូម«អូលីអេត»ដាក់លក់ពេញផ្សារក្នុងទីក្រុងកានចូវ ។ រឿងរ៉ាវត្រចៀកជ្រូកដាក់សារធាតុគីមីនេះ បានបែកធ្លាយក្រោយពីបុរសម្នាក់នៅស្រុកកានសៀនធុំក្លិនស្អុយចេញពីត្រចៀកជ្រូកដែលទិញពីផ្សារ ទើបហែកពិនិត្យមើលស្រាប់តែប្រទះឃើញសារធាតុស្អិតស្រដៀងចាហួយនៅផ្នែកខាងក្នុង ។
បុរសដែលសុំមិនបញ្ចេញឈ្មោះខាងលើក៏បានបញ្ជូនត្រចៀកជ្រូកនោះទៅមន្ទីរឧស្សាហកម្មនិងពាណិជ្ជកម្មក្នុងស្រុក កានសៀន ពិនិត្យទើបដឹងថាជាត្រចៀកជ្រូកមានដាក់លាយសារធាតុគីមីជេឡាទីន ។ លោកហ្វានជីហុង អ្នកជំនាញផ្នែកត្រួតពិនិត្យសុវត្ថិភាពម្ហូបអាហារនៅមហាវិទ្យាល័យក្សេត្រសាស្ត្រប្រទេសចិនថ្លែងថា សារធាតុគីមីដែលដាក់ក្នុងត្រចៀកជ្រូកនោះធ្វើឱ្យវាមានរសជាតិឆ្ងាញ់ និងពិបាកចាប់កំហុសណាស់ប៉ុន្តែការទទួលទានសូដ្យូម«អូលីអេត»ច្រើនមានផលប៉ះពាល់ដល់រាងកាយ ធ្វើឱ្យមានសម្ពាធឈាមខ្ពស់ខុសប្រក្រតី និងប្រព័ន្ធដំណើរការបេះដូងខុសប្រក្រតី ។
«ជេឡាទីន» ដែលគេនិយមប្រើក្នុងមុខជំនួញគ្រឿងស្បែក គឺជាសារធាតុហាមឃាត់ក្នុងការផលិតជាអាហារ ព្រោះមានក្រូមីញូមជាសារធាតុបង្កមហារីក ។ក្នុងអំឡុងពេលដំបូង អាជ្ញាធរមិនទាន់ដឹងពីប្រភពផលិតច្បាស់លាស់នៅឡើយ គ្រាន់តែប្រកាសអាសន្នឱ្យអ្នកស្រុកដែលចង់ទិញត្រចៀកជ្រូក ត្រូវពិនិត្យឱ្យបានច្បាស់លាស់មុននឹងទិញយកទៅបរិភោគ ៕
ចែករំលែកព័តមាននេះ