កីឡាករជឺម៉េន ផេនណេន ខ្សែបម្រើយីអ៊ុនដាក់របស់ក្លឹបStoke ត្រូវតុលាការទីក្រុងម៉េនឆេស្ទ័រ ដាក់ទោសឱ្យជាប់ពន្ធនាគាររយៈពេល៨សប្តាហ៍ និងពិន័យហាមបើកបរយានយន្តរយៈពេល៣ឆ្នាំ ក្រោយពីបង្ករឿងដ៏អាម៉ាស់ បើកបរក្នុងពេលស្រវឹងកាលពីដើមខែកន្លងមក ។
កាលពីមុនខ្សែបម្រើអាយុ២៩ឆ្នាំ រូបនេះត្រូវអាជ្ញាធរចាប់ខ្លួនក្រោយពីទទួលការចោទប្រកាន់ថាវាយធ្វើបាបស្ត្រីម្នាក់នៅឯក្លឹបកម្សាន្តមួយ ប៉ុន្តែបានធានាឱ្យនៅក្រៅឃុំ ។ក្រោយពីបើករថយន្តBMW ចេញពីទីក្រុងម៉េនឆេស្ទើរ គេត្រូវចាប់ខ្លួនជាថ្មីពីបទស្រវឹងបើកបរទាំងគ្មានប័ណ្ណបើកបរ។
ជឺម៉េន ផេនណេន បានធ្វើដំណើរទៅតុលាការក្រុងម៉េនឆេស្ទ័រ ដើម្បីរៀបរាប់រឿងហេតុដែលកើតឡើង។ អតីតកីឡាករបាល់ទាត់ក្លឹបLiverpoolរូបនេះឱ្យដឹងថា គេមានភាពតប់ប្រមល់នៅពេលគូស្នេហ៍បញ្ជាក់ប្រាប់រឿងបែកផ្លូវគ្នា និងបានសម្រេចចិត្តឆ្លើយតបលើការអញ្ជើញរបស់មិត្តភក្តិនៅក្លឹបកម្សាន្ត និងកើតមានបញ្ហាកាលពីថ្ងៃទី២៩ មេសា ។
ចៅក្រមបានសម្រេចឱ្យកីឡាកររូបនេះ មានទោសជាប់ពន្ធនាគាររយៈពេល៨សប្តាហ៍ និងហាមបើកបររយៈពេល៣ឆ្នាំ ។ ទោសនេះកើតឡើងដោយសារកីឡាករផេនណេន ពិនិត្យឃើញមានជាតិអាល់កុលក្នុងកម្រិតខ្ពស់ដល់ទៅ៨៥មីល្លីក្រាមច្រើនជាងបទដ្ឋាន ដែលកំណត់ត្រឹម៣៥មីល្លីក្រាម ៕
ចែករំលែកព័តមាននេះ