សារព័ត៌មានបរទេស កាលពីថ្ងៃទី១៧ ឧសភា ផ្សាយថាប្រទេសក្រិច ត្រៀមធ្វើការបោះឆ្នោតទូទៅជាថ្មីក្នុងថ្ងៃទី១៧ មិថុនា ក្រោយពីគ្មានគណបក្សនយោបាយណាមួយបង្កើតរដ្ឋាភិបាលបាន ក្រោមសម្ពាធដ៏តានតឹងចំពោះភាពមន្ទិលពីការធ្លាក់ពីសមាជិកភាពសហគមន៍អឺរ៉ុប ។ ស្របពេលជាមួយគ្នានេះ លោកគ្រីស្ទីន ឡាហ្គាត អគ្គនាយកនៃមូលនិធិអន្តរជាតិ (IMF) បញ្ជាក់ថា មានទំនោរយ៉ាងខ្ពស់ដែលក្រិចអាចជ្រុះចេញពីក្រុមប្រទេសដែលប្រើប្រាក់អឺរ៉ូ ។
របាយការណ៍បញ្ជាក់ថា ក្នុងអំឡុងពេល១សប្តាហ៍កន្លងមក តាំងពីថ្ងៃទី៧ ឧសភា ដែលជាការបោះឆ្នោតលើកដំបូង មានប្រជាជនបន្តដកប្រាក់ចេញពីធនាគារក្រិចយ៉ាងតិច៧០០លានអឺរ៉ូ ខណៈពេលទីផ្សារភាគហ៊ុននៅទូទាំងអឺរ៉ុប និងអត្រាប្តូរប្រាក់អឺរ៉ូ ធ្លាក់ចុះយ៉ាងគំហុកក្នុងអំឡុងពេល៤ខែកន្លងមក ។
ចំណែកកាសែត «ហ្វាយនេនស្យលថែម» បញ្ជាក់ថា ការដកប្រាក់ពីធនាគារនៅថ្ងៃទី១៤ និង១៥ ឧសភា ឡើងខ្ពស់ជាង១២.០០០លានអឺរ៉ូ ឬប្រហែល០,៧៥% នៃប្រាក់បញ្ញើសរុប ប៉ុន្តែនៅក្នុងថ្ងៃទី១៦ ឧសភា នៅមិនទាន់វិភាគថា ឈានចូលដល់វិបត្តិ ឬយ៉ាងណានៅឡើយ ។
លោកម៉ារីយ៉ូ ដ្រាហ្គី ប្រធានធនាគារកណ្តាលអឺរ៉ុប (ECB) និងនាយករដ្ឋមន្ត្រីនៃប្រទេសអេស្ប៉ាញ បញ្ជាក់ក្នុងលក្ខណៈដូចគ្នាថា ចង់ឱ្យប្រទេសក្រិចមានស្ថិរភាព ក្នុងក្រុមប្រទេសនៅអឺរ៉ុបបន្តទៀត ៕
ចែករំលែកព័តមាននេះ