រាជធានីភ្នំពេញ ៖ លទ្ធផលនៃការប្រកួតបាល់ទាត់ជើងឯកក្របខណ្ឌថ្នាក់ជាតិឆ្នាំ២០១២ ដែលបានធ្វើឡើងនៅទីលានពហុកីឡដ្ឋានជាតិ កាលពីថ្ងៃទី១៦ ឧសភាកន្លងមកនេះ ក្រុមព្រះខ័នរាជ្យបានយកឈ្នះក្រុមគិរីវង់សុខសែនជ័យ២-១ ។
ក្រុមគិរីវង់សុខសែនជ័យ មានឱកាសរកបាន១គ្រាប់នាំមុខមុន ប៉ុន្តែបែរជាជួបសំណាងមិនល្អដោយសារនៅតង់ទី២ ត្រូវក្រុមព្រះខ័នរាជ្យ តាមរកបាន២គ្រាប់នាំមុខវិញ ។ គិតមកត្រឹមថ្ងៃទី១៦ ឧសភា ក្រុមព្រះខ័នរាជ្យបានស្ទុះមកនៅលេខរៀងទី៣ នៃតារាង បន្ទាប់ពីប្រកួតបាន៨លើក ឈ្នះ៥ ស្មើ១ ចាញ់២ មាន១៦ពិន្ទុ ។ រីឯក្រុមគិរីវង់សុខសែនជ័យប្រកួតបាន៨លើកដូចគ្នា ឈ្នះ២ ស្មើ១ ចាញ់៥ ទើបតែរកបាន៧ពិន្ទុប៉ុណ្ណោះ ។
នៅថ្ងៃសៅរ៍ទី១៩ ឧសភា ខាងមុខនេះ ក្រុមព្រះខ័នរាជ្យ នឹងជួបស្វាគមន៍ជាថ្មីម្តងទៀតជាមួយក្រុមក្រសួងការពារជាតិ ឯក្រុមបៀលប្រាយយូណាយធីត ជួបជាមួយក្រុមសាកលវិទ្យាល័យវេស្ទើន ។ ក្រុមបៀលប្រាយយូណាយធីត មាន៩ពិន្ទុហើយ ក្នុងចំណោមការប្រកួតទាំង៨លើករបស់គេកន្លងមកនេះ ដោយឈ្នះ៣ ចាញ់៥ ។ ចំណែកឯក្រុមវេស្ទើន ស្ថិតនៅលេខរៀងទី៩ នៃតារាងប្រកួតបាន៨លើក ឈ្នះ១ ស្មើ១ ចាញ់៦ មាន៤ពិន្ទុ ។
ដោយឡែក នៅថ្ងៃអាទិត្យទី២០ ឧសភា មាន២ប្រកួតទៀត គឺក្រុមឆ្លាមសមុទ្រជួបក្រុមបឹងកេត និងក្រុមគិរីវង់សុខសែនជ័យ ជួបក្រុមអគ្គស្នងការដ្ឋាននគរបាលជាតិ ៕
ចែករំលែកព័តមាននេះ