រាជធានីភ្នំពេញ ៖ អំឡុងថ្ងៃឈប់សម្រាកបុណ្យចំរើនព្រះជន្មព្រះមហាក្សត្រព្រះនរោត្តមសីហមុនីកន្លងទៅថ្មីៗនេះ គេសង្កេតឃើញភ្ញៀវទេសចរទៅកម្សាន្តនៅតាមតំបន់ទេសចរណ៍ជិតឆ្ងាយនៅក្នុងព្រះរាជាណាចក្រកម្ពុជា ច្រើនកុះករ។ដោយឡែកគេសង្កេតឃើញភ្ញៀវទេសចរជាតិ និងអន្តរជាតិជាច្រើនរយនាក់ នាំគ្នាពពាក់ពពូនទៅដើរកម្សាន្តនៅរមណីយដ្ឋានផ្ទះទឹកកៀនស្វាយតាំងពីព្រឹកព្រលឹមទល់ព្រលប់ ។
នៅកៀនស្វាយថ្វីបើម្ហូបអាហារមិនឡើងថ្លៃក៏ដោយក៏គ្រែទឹកឡើងថ្លៃគឺគ្រែនៅលើទឹកខាងមុខតម្លៃ១៥.០០០រៀល និងនៅខាងក្នុងតម្លៃ១០.០០០រៀល ។ ទោះបីជាគ្រែទឹកឡើងថ្លៃក៏ដោយក៏នៅតែភ្ញៀវទេសចរទៅកម្សាន្តច្រើនស្ទើរតែរកកន្លែងអង្គុយមិនបាន ។
ភ្ញៀវជាតិ និងអន្តរជាតិជាច្រើនបានរិះគន់អ្នករកស៊ីនៅតំបន់រមណីយដ្ឋានផ្ទះទឹកកៀនស្វាយថា ការធ្វើម្អូបបាយមិនសូវមានអនាម័យទេ ។
ជាពិសេសនោះនៅក្រោមតូបលក់ម្អូបអាហារភាគច្រើនសំរាមគរដូចភ្នំ រលួយជះក្លិនស្អុយ ឯនៅខាងក្រោយតូបលក់ម្ហូបអាហារតាមផ្លូវដើរចុះទៅផ្ទះទឹកមានគំនរសំរាមដូចភ្នំសម្រាប់ទុកជូនភ្ញៀវទេសចរជាតិ អន្តរជាតិទស្សនា ។ ជាងនេះទៅទៀតនៅមាត់ទឹកតាមច្រាំងទន្លេក្បែរផ្ទះទឹក គេសង្កេតឃើញមានសំរាមអណ្តែតស្ទើរតែមើលទឹកមិនឃើញទេ ធ្វើឱ្យទឹកមានក្លិនស្អុយ បង្កជាបរិស្ថានមិនល្អទេ ។
ការបង្កឱ្យខូចបរិស្ថានតំបន់ទេសចរណ៍ និងបរិស្ថានទឹកបែបនេះ មន្ត្រីទេសចរប្រចាំការនៅតំបន់នោះមើលមិនឃើញទេ គឺដឹងតែពីទទួលផ្ញើរថយន្តក្នុងមួយគ្រឿង៥.០០០រៀល ចង់អ្នកប្រកបមុខរបរលក់ដូរ ឬអ្នកទេសចរមួយចំនួនបោះសំរាមចោលក៏គេធ្វើមិនឃើញដែរ ។
អ្នកទេសចរជាតិមួយចំនួនរិះគន់ថា អ្នករស់នៅតំបន់នោះទាំងប្រជាពលរដ្ឋ ទាំងមន្ត្រីមូលដ្ឋាន និងមន្ត្រីទេសចរដឹងតែពីរកប្រាក់ គ្មានចេះជួយថែរក្សាបរិស្ថានច្រាំងទន្លេ ឬបរិស្ថានទឹកឱ្យបានស្អាតល្អទេ ។ ការបង្កបរិស្ថានឱ្យអាប់អួបែបនេះគឺជាការបង្កឱ្យមានមេរោគជាច្រើនចម្លងជំងឺផ្សេងៗទៅភ្ញៀវទេសចរ និងប្រជាពលរដ្ឋខ្លួនឯងនៅតំបន់នោះ ។ ជាពិសេសខែនេះជាខែភ្លៀងធ្លាក់ច្រើន គឺអាចកើតសត្វមូសខ្លា ចម្លងជំងឺគ្រុនចាញ់ និងជំងឺគ្រុនឈាមដល់កុមារទៀតផង ។
ដូច្នេះហើយមន្ត្រីមូលដ្ឋាន និងមន្ត្រីទេសចរដែលប្រចាំការនៅទីនោះគួរតែរកធុងសំរាមឱ្យប្រជាជន ឬអ្នកទេសចរចោលសំរាមឱ្យបានត្រឹមត្រូវ និងមិនបង្កឱ្យខូចបរិស្ថាន ។ កាលណាបរិស្ថានល្អ ភ្ញៀវទេសចរនឹងកើនឡើង មួយវិញទៀតបរិស្ថានល្អសុខភាពរបស់យើងក៏ល្អដែរ តែបើបរិស្ថានមិនល្អស្អាតទេនោះ ភ្ញៀវទេសចរនឹងធ្លាក់ចុះ ចំណូលក៏ថយចុះ ហើយសេដ្ឋកិច្ចគ្រួសារក៏ធ្លាក់ចុះដូចគ្នា ។
ភ្ញៀវទេសចរនិយាយថា គួរតែធ្វើយ៉ាងណាឱ្យតំបន់ទេសចរណ៍ផ្ទះលើទឹកតំបន់រមណីយដ្ឋានកៀនស្វាយនេះ មានបរិស្ថានល្អ ដើម្បីប្រសើរ ទើបទទួលបានភ្ញៀវទេសចរកាន់តែច្រើនឡើង។ ពិសេសតម្លៃម្ហូបអាហារត្រូវគិតសមរម្យមិនត្រូវកាប់ឆៅខ្ពស់ហួសហេតុដូចភ្ញៀវធ្លាប់ជួបប្រទះកន្លងមកទេ ៕
ចែករំលែកព័តមាននេះ