រាជធានីភ្នំពេញ ៖ រថយន្តដឹកកុងតឺន័រមួយគ្រឿង របស់កំពង់ផែស្វយ័តភ្នំពេញ បានបុកកៀបជាប់ជាមួយរថយន្តម៉ាកហ៊ីយ៉ាន់ដាយ មួយគ្រឿងដឹកទឹកក្រូច បណ្តាលឱ្យរថយន្តទាំងពីរគ្រឿងរងការខូចខាតធ្ងន់ធ្ងរ ទោះជាយ៉ាងណា ពុំបង្កឱ្យមនុស្សរងរបួសឡើងយ។ គ្រោះថ្នាក់នេះបានកើតឡើងកាលពីវេលាម៉ោង១១និង៣០នាទីព្រឹកថ្ងៃទី១៦ ឧសភា នៅតាមផ្លូវជាតិលេខ៥ ក្នុងភូមិមិត្តភាព សង្កាត់ឫស្សីកែវ ខណ្ឌឫស្សីកែវ ។
តាមបុរសឈ្មោះចាន់ ថន អាយុ៤១ឆ្នាំ ជាអ្នកបើករថយន្តម៉ាកហ៊ីយ៉ាន់ដាយ ដឹកទឹកក្រូច ឱ្យដឹងថា នៅមុនពេលកើតហេតុគាត់ដឹកទឹកក្រូចចេញពីក្រុមហ៊ុន ដើម្បីុយកទៅចែកចាយតាមផ្លូវជាតិលេខ៥ ។ ពេលបើកចេញពីក្រុមហ៊ុន ដោយបើកសសៀរខាងចេញក្បាលរថយន្តបានបន្តិចទៅទិសខាងជើង ស្រាប់តែរថយន្តដឹកកុងតឺន័រម៉ាកហ៊្វុយហ្សូ ពណ៌សមួយគ្រឿង ជារថយន្តរបស់កំពង់ផែស្វយ័តភ្នំពេញ ធ្វើដំណើរមកពីទិសខាងត្បូងក្នុងល្បឿនលឿន បានមកបុកត្រូវពីចំហៀងខាងឆ្វេង ហើយកៀបជាប់ទៅមុខលែងរួច ។
នៅក្នុងគ្រោះថ្នាក់នេះបណ្តាលឱ្យរថយន្តទាំងពីរគ្រឿងរងការខូចខាតធ្ងន់ធ្ងរ ហើយម្ចាស់រថយន្តទាំងសងខាងបានសម្របសម្រួលគ្នាដោះស្រាយ តែគេពុំដឹងពីលទ្ធផលយ៉ាងណាឡើយ ៕
ចែករំលែកព័តមាននេះ