អ្នកវិទ្យាសាស្ត្របានអះអាងថា ការដើរញាប់សរុប២ម៉ោងកន្លះក្នុងមួយសប្តាហ៍(ម្តងកន្លះអត្រាប្រឈមនឹងការឡើងឈាម ។ តាមការសិក្សាថ្មីមួយបានបង្ហាញថា ការធ្វើលំហាត់ប្រាណក្នុងកម្រិតមធ្យមអាចជួយកាត់បន្ថយអត្រាគ្រោះថ្នាក់នឹងការឡើងឈាមបាន២៦ភាគរយ ជាពិសេសចំពោះអ្នកដែលមានឪពុកម្តាយឬក្រុមគ្រួសារធ្លាប់កើតជំងឺនេះ។
លទ្ធផលនេះកើតចេញពីការពិសោធរយៈពេលជិត៥ឆ្នាំលើមនុស្សមានសុខភាពល្អ៦២៧៨នាក់អាយុពី២០ទៅ៨០ឆ្នាំ។ ក្នុងចំនួននេះមាន៣៣ភាគរយដែលមានឪពុកម្តាយធ្លាប់កើតជំងឺលើសឈាម។ អំឡុងការពិសោធមានមនុស្ស១៥៤៥កើតជំងឺលើសឈាម។
បន្ទាប់ពីការពិសោធ ពួកអ្នកវិទ្យាសាស្ត្រ អះអាងថា អ្នកមានភាពសមសួនផ្នែករាងកាយកម្រិតទាបនិងស្ថិតក្នុងគ្រួសារដែលធ្លាប់មាន ប្រវត្តិលើសឈាម ប្រឈមនឹងអត្រាកើតជំងឺនេះខ្ពស់ដល់ទៅ៧០ភាគរយធៀបទៅនឹងអ្នកដែលមានរាងកាយសមសួនកម្រិតខ្ពស់និងគ្មានឪពុកម្តាយធ្លាប់កើតជំងឺលើសឈាម ។
ការសិក្សាដែលបានចុះផ្សាយនៅក្នុងព្រឹត្តិប័ត្រ American Heart Associationលើកនេះគឺចង់បង្ហាញប្រាប់សាធារណជនថា ការធ្វើសកម្មភាពរាងកាយណាមួយក្នុងកម្រិតមធ្យមមានដូចជាការដើរញាប់ឱ្យបានកន្លះម៉ោង ឬច្រើនជាងនេះ៥ថ្ងៃក្នុងមួយសប្តាហ៍ គឺពិតជាអាចដោះស្រាយបញ្ហាប្រឈមដូចខាងលើបាន។ Robin Shookវេជ្ជបណ្ឌិតទើបបញ្ចប់ការសិក្សាពីសាកលវិទ្យាល័យ University of South Carolinaសហរដ្ឋអាមេរិកនិយាយថា ៖«ស្វែងយល់ពីតួនាទីដែលថាប្រវត្តិគ្រួសារនិងភាពសមសួនរាងកាយជាបញ្ហានាំឱ្យកើតជំងឺលើសឈាមគឺពិតជារឿងសំខាន់។
លទ្ធផលនៃការសិក្សានេះគឺជាការផ្ញើសារជាបន្ទាន់មួយដែលថា ហាត់ប្រាណក្នុងកម្រិតមធ្យមមានដូចជាការដើរញាប់១៥០នាទីក្នុងមួយសប្តាហ៍អាចផ្តល់នូវអត្ថប្រយោជន៍ដល់សុខភាពយ៉ាងធំធេងជាពិសេសចំពោះអ្នកដែលមានឪពុកម្តាយធ្លាប់កើតជំងឺលើសឈាម»៕
ចែករំលែកព័តមាននេះ