រាជធានីភ្នំពេញ ៖ សិង្ហ សាវ៉ន មកពីក្លឹបសិង្ហកីឡា ចង់សាកកម្លាំងជាមួយពុទ្ធ ហ៊ុច មកពីក្លឹបពុទ្ធសេរីវង្ស នៅលើសង្វៀនស្ថានីយទូរទស្សន៍ CTN នាថ្ងៃសុក្រទី១៨ ឧសភា ខណៈលាប សំណាង មកពីក្លឹបកងពលតូចលេខ៧០ជួប សារឹម ង៉ា មកពីក្លឹបកីឡាប្រដាល់ក្រសួងការពារជាតិ ។
សាវ៉ន ជាអ្នកប្រដាល់ដែលមានចិត្តមិនសូវសឿងប៉ុន្មានឡើយ រីឯស្នៀតប្រយុទ្ធនៅលើសង្វៀន ក៏អត់មានអ្វីដែលអស្ចារ្យប៉ុន្មានដែរ។ កន្លងមក សាវ៉ន មិនធ្លាប់ប៉ះជាមួយពុទ្ធ ហ៊ុច ឡើយ ហើយល្អបានតែស្នៀតដៃ និងស្នៀតជើងបន្តិចប៉ុណ្ណោះ ម៉្យាងចលនាវាយលុករបស់គេមានរបៀបផ្សងព្រេងច្រើនជាង ។ ចំណែកឯពុទ្ធ ហ៊ុច វិញ ក៏អត់មានស្នៀតអ្វីដែលពូកែជាងដែរ តែចិត្តរបស់គេសឿង កម្លាំងខ្លាំង អាចស៊ីសងជាមួយសាវ៉នបាន ឯចរិតរបស់គេអត់ចេះក្អេងក្អាងឡើយ ។ ចាំមើលមើល៍ ការជួបគ្នាលើកនេះអ្នកណាមានសំណាងជាង ?
លាប សំណាង និងសារឹម ង៉ា ធ្លាប់ប៉ះគ្នាច្រើនលើកច្រើនសាមកហើយ ប៉ុន្តែអត់មានអ្នកណាឈ្នះដាច់ឡើយ ។ គូនេះមានល្បិចវាយលុកនៅលើសង្វៀនក្រាស់ដូចគ្នា ប៉ុន្តែចិត្តរបស់សារឹម ង៉ា សឿងជាង រីឯស្នៀតកែង និងជង្គង់របស់គេក៏អស្ចារ្យជាង ចលនាវាយលុកក៏រហ័សរហួនជាង ប៉ុន្តែគេអត់ចេះមើលស្រាលគូប្រកួតឡើយ ។ លាប សំណាង មានចិត្តសឿង ល្អទាំងស្នៀតជើង និងស្នៀតដៃ អាចវាយចេញបានត្រង់ល្អ ហើយខ្លាំងទៀតផង ប៉ុន្តែគូនេះអត់មានអ្នកហា៊នមើលស្រាលលើអ្នកណាឡើយ ។
ទឹម សាន មកពីក្លឹបអាស៊ីកីឡា ជួបសេក គឹមគីម មកពីក្លឹបសឹករងខេត្តសៀមរាប ។ ទឹម សាន ក្នុងប្រវត្តិឡើងសង្វៀនជាច្រើនឆ្នាំមកនេះចាញ់ច្រើនជាងឈ្នះ ព្រោះថាគេអត់មានស្នៀតដែលពិសេសសម្រាប់ផ្តួលគូប្រកួតឡើយ ឯ កម្លាំងរបស់គេក៏មិនសូវខ្លាំង ហើយមានចិត្តតូចទៀតផង ។
ចំណែកគឹមគីម វិញ ក៏មិនលើសមិនខ្វះគ្នាដែរ តែកម្លាំងរបស់គេខ្លាំង ស្នៀតជើង និងស្នៀតកណ្តាប់ដៃអាចវាយចេញបានត្រង់ល្អ ។ គូនេះភាគច្រើនគេមានជំនឿចិត្តលើគឹមគីម ច្រើនជាង ។ ឈាន រស្មី មកពីក្លឹបខេត្តរតនគិរី ជួបយិន បូរិន មកពីក្លឹបកងពលធំអន្តរាគមន៍លេខ៣ព្រះវិហារ ៕
ចែករំលែកព័តមាននេះ